1 Saray Awaran 14 - Maung A Balita Biblia

Saray Ginagawa nen David ed Jerusalem

¹ Si Ari Hiram na Tiro angibaki na totoo to ed kinen David; initdan to na saray troson sidro, tan saray karpintiro tan saray kantiro, ta igawaan day palasio si David.

² Abirbir nen David ed satan a say Katawan et pinili ton manari ed Israel, tan papaaligwasen toy nanarian to a pankaabigan na saray totoo to.

³ Diad Jerusalem, angasawa ni na pigara si David tan dinmakel iray anak ton lalaki tan bibii.

⁴ Niay kangaranan da ray anak ton nianak ed Jerusalem: Samua, Sobab, Natan, Solomon,

⁵ Ibhar, Elisua, Elpelet,

⁶ Noga, Nefeg, Jafia,

⁷ Elisama, Beeliada, tan Elifelet.

Say Impanalo ray Israelita ed saray Filisteo

⁸ Nen nadngelan na saray Filisteo ya agawa lan arid intiron bansa na Israel si David, linma ray sondalo ran manakep ed sikato. Kanyan si David pinmaway a mibakal ed sikara.

⁹ Akasabid Patar na Refaim iray Filisteo tan ginapwan day nandederal.

¹⁰ Tinepet nen David ed Dios, “Dogpaan ko ray Filisteo? Panaloen mo ak kasi?” Inmebat so Katawan, “On, dogpaan mo ra! Panaloen ta ka!”

¹¹ Kanyan dinogpaan ira nen David diad Baal-perazim, et tinalo to ra. Inkuanto, “Say Dios inkana to ak ya ondogpa ed saray kalaban a sondalo. Singa ra dinalan na delap.” Kanyan saman a pasen atawag na Baal-perazim.

¹² Tinaynan diman na saray Filisteo iray talintaoy diriyos da, tan impapopoolan ira nen David.

¹³ Ag abayag pinawil na saray Filisteo imay patar tan ginapwan da lamet so nandederal.

¹⁴ Impanon lamet nen David ed Dios, et say Dios inmebat, “Ag ka dia manlalapu no dogpaan mo ra. Saliberber ka tan dogpa kan manlapud biek a dapag, diad abay na saray kiew a balsamo.

¹⁵ No narengel mod tagey na kakiewan so tanul na panaakar da ray sondalo, dogpa ka, ta wala ak ed onaan mo a mibakal ed saray sondalo na Filistia.”

¹⁶ Ginawa nen David so ingganggan na Dios tan pinasoner to ray Filisteo manlapud Gabaon ya anggad Gezer.

¹⁷ Binmawag ed anggan iner a pasen so inkabantug nen David, tan say Katawan pinatakot ton amin iray bansa ed kinen David.