1 Saray Awaran 11 - Maung A Balita Biblia

Si David Nagmaliw ya Ari ed Israel tan Juda

¹ Amin a totood Israel linma rad kinen David diad Hebron tan kuandad sikato, “Kadalaan tan kalamanan mo kami.

² Nen saman, anggan nen ari mi ni si Saul, impangulom ed bakal iray totood Israel, tan insipan ed sikayo na Katawan a Dios mo ya iwanwan mo ray totoo to tan oleyan mo ra.”

³ Kanyan amin a panguloy Israel linma rad kinen Ari David diad Hebron. Diad arap na Katawan akisipanan ed sikara si David; nilanaan da et nagmaliw ya ari na Israel onung na insipan na Katawan ed panamegley nen Samuel.

⁴ Si Ari David tan saray Israelita dinogpaan day Jerusalem. Say ngaran ni nen saman na Jerusalem et Jebus, tan manaayam nid man iray Jebuseo, saray inmona-onan totoo a nanayam ed saman a dalin.

⁵ Imbaga na saray Jebuseo ed kinen David ya ag balut makaloob ed Jerusalem, balet adakep nen David so tirinsira ed Sion, kanyan atawag na “Siudad nen David.”

⁶ Inkuanen David, “Magmaliw a pangulo na saray sondalo so siopaman a makaonan makapatey na Jebuseo.” Impangulo nen Joab a lakin anak nen Sarvia so indogpa ra tan nagmaliw a pangulo na saray sondalo.

⁷ Atawag na “Siudad nen David” so tirinsira, ta diman nanayam si David.

⁸ Pinasimbalo tan inletneg so siudad ed kaliber-liber na tirinsira; inggapo tod pasen a tinabonan diad bokig na pokdul. Inapiger nen Joab iray arum a pasen na siudad.

⁹ Pinmalalo lan pinmalalo so inkatalonggaring nen David, lapud walad sikatoy Katawan a Makapanyarin-amin.

Saray Bantug a Sondalo nen David

¹⁰ Saya so listaan na saray bantug a sondalo nen David. Diad tulong da tan amin da ray arum a totood Israel nagmaliw ya ari si David, onung na insipan na Katawan. Impansiansia ran mabiskeg so nanarian to.

¹¹ Say onona si Jasobeam a kabyangay boleg nen Hacmon, tan sikatoy pangulo na “Saray Talora.” Inkana toy pika diad impilaban tod talon lasus a lalaki tan apatey to ran amin legan na sakey a bakal.

¹² Say kumadwa ed “Saray Talora” a bantug et si Eleazar a lakin anak nen Dodo a kabyangay boleg nen Aho.

¹³ Kaiba ton akibakal ed saray Filisteo si David diad bakal na Pasdamim. Walad alog na sibada si Eleazar nen ginapwan na saray Israelita so ombatik,

¹⁴ kanyan sikato tan saray totoo to et ag ira inmalis ed pegley na alog tan nilabanan da ray Filisteo. Say Katawan initdan to na baleg ya impanalo.

¹⁵ Aminsan ya agew, talora ed saray talomplon manonan sondalo et linma rad ongib na Adullam a kawalaan nen David legan a mankakampod Patar na Refaim iray pigaran Filisteo.

¹⁶ Diad saman a panaon walad pokdul a tirinsira si David tan sakey ya olup na saray Filisteo so linmoob ya anakop ed Betlehem.

¹⁷ Sinmabid kinen David so pakakailiw kanyan inkuanto, “Wala komuy makapangiter ed siak na danum a nanlapud bobun a walad abay na puirtay Betlehem.”

¹⁸ Saramay taloran bantug a sondalo et pinasoot day sinmelak ed kampo da ray Filisteo, angala ray danum ed bobun, insan da inter ed kinen David. Balet ag to inomen, no ag ta inkalbo ton imbagat ed Katawan

¹⁹ tan kuanto, “Ag nayarin balut ya inomen ko ya! Ta no inomen ko, singa iinomen ko so dala da ra yan totoo ya angipostay bilay da!” Kanyan ag to ininom. Sikara ya so ginagawa na saramay taloran bantug a sondalo.

²⁰ Say lakin agi nen Joab a si Abisai so pangulo da ray “Talomplon Bantug.” Inkana toy pika diad impilaban tod talon lasus a lalaki tan pinapatey to ra, kanyan nagmaliw a bantug ed “Saray Talomplo.”

²¹ Sikatoy sankabantugan ed “Saray Talomplo,” kanyan nagmaliw a pangulo ra, balet ag to aparaan so inkabantug na “Saray Talora.”

²² Say lakin anak nen Joiada a si Benaya a taga Cabseel et sakey a bantug a sondalo; wala ray ginagawa ton makapakebyew. Pinatey toy duaran matalonggaring a bumabakal a taga Moab. Aminsan ya agew ya ambetebetel, linma ed dalem na ongib tan pinatey toy sakey a lion.

²³ Pinatey to met so sakey ya Egipsion baleg so laman to; masoluk a duaran mitroy kaatagey to, tan nanarmas na balbaleg a pika. Pinekpek to na baston, sinamsam toy pika to tan sikatoy impamatey to.

²⁴ Saraya so ginagawa nen Benaya a sakey ed “Saray Talomplo.”

²⁵ Bantug ed “Saray Talomplo,” balet et ag to aparaay inkabantug na “Saray Talora.” Si David ginawa ton pangulo na saray umaantabay to.

^26-47 Sikara yay arum a matalonan sondalo: Asael a lakin agi nen Joab Elhanan a lakin anak nen Dodo, tan taga Betlehem Samot a taga Harod Helez a taga Pelet Ira a lakin anak nen Ikes, tan taga Tecoa Abiezer a taga Anatot Sibecai a taga Husa Ilai a taga Aho Maharai a taga Netofa Heled a lakin anak nen Baana, tan taga Netofa Itai a lakin anak nen Ribai, tan taga Gabaa a sakop nen Benjamin Benaya a taga Piraton Hurai a taga saray patar a kaabay na Gaas Abiel a taga Arba Asmavet a taga Bahurum Eliaba a taga Saalbon Hasem a taga Gizon Jonatan a lakin anak nen Sagee tan taga Arar Ahiam a lakin anak nen Sacar, tan taga Arar Elifal a lakin anak nen Ur Hefer a taga Mekera Ahias a taga Pelon Hezro a taga Carmel Naarai a lakin anak nen Ezbai Joel a lakin agi nen Natan Mibhar a lakin anak nen Hagri Zelec a taga Ammon Naharai a taga Beerot tan sikatoy umaawit na armas nen Joab ya anak nen Sarvia Ira tan Jareb a taga ra Jatir Urias a Heteo Zabad a lakin anak nen Ahlai Adina a lakin anak nen Siza (a matalonan kabyangay tribu na Ruben tan walay olup na talomplon sondalo ton dili) Hanan a lakin anak nen Maaca Josafat a taga Mitan Uzia a taga Astera Sama tan Jeiel a lalakin anak ira nen Hotam tan taga ra Aroer Jediael tan Joha a lalakin anak nen Simri tan taga ra Tiz Eliel a taga Mahava Jeribai tan Josavia a lalakin anak nen Elnaam; Itma a taga Moab Eliel, Obed, tan Jasael a taga Zoba.