1 Saray Arari 9 - Maung A Balita Biblia

Pinmayawar Lamet so Dios ed kinen Solomon

¹ Kayarin impaalagey nen Ari Solomon so Timplo tan say palasio to tan amin nin arum a nilabay ton impaalagey,

² pinmayawar lamet so Katawan ed sikato, a singa samay agawa lad Gabaon.

³ Inkuan na Katawan ed sikato, “Nadngel koy pikakasim. Pasantosen ko yan Timplon impaalagey mo, ta sikatoy pasen a pangigalangan ed siak diad ando lan ando. Asikasoen tan iyagel ko ed anggan anton panaon.

⁴ No panlingkuran mo ak diad katooran tan kasantosan a singa impaglingkur nen amam a David tan onuren mon amin iray bilin tan saray ganggan ko,

⁵ sumpalen ko may insipan kod kinen amam a David nen imbagak ed sikato a sakey a kabyangay boleg to so lawas manoley ed Israel.

⁶ Balet no sika odino saray kabyangay boleg mo et tondaan yo ak ya onuren, tan ag yo la onuren iray ganggan tan saray bilin kod sikayo, tan manlingkur tan mangigalang kayo lad saray arum a diriyos,

⁷ paekalen ko ray totook ya Israelita ed dalin ya inter kod sikara. Ikaindan ko met yan pinasantok a Timplo a sikatoy pangigalangan ed siak; balawen tan melag-melagen met na saray totoo ed inerman a pasen so bansan Israel.

⁸ Bontun na saray deral-deral so pagmaliwan na sayan Timplo, tan nabiglaan tan nikelawan so siopaman ya ondalan. Tepetan da, ‘Akin et ginawa na Katawan so onya ed sayan dalin tan diad sayan Timplo?’

⁹ Onebat iray totoo, ‘Lapud inkaindan na saray totoo so Katawan a Dios da, ya angipaway ed saray lalaki ra ed dalin na Egipto. Sinmingger irad arum a diriyos tan sikara yay inggalang tan nanlingkuran da. Kanyan inter na Katawan yan kaogsan ed sikara.’”

Akipaknaan si Solomon ed kinen Hiram

¹⁰ Duamploy taon ya impaalagey nen Solomon so Timplo tan say palasio to.

¹¹ Si Ari Hiram na Tiro so angiter ed sikato na amin a kiew a sidro tan saleng tan amin a balituk a kinaukolan tod sayan kimey. Nen asumpal la ran nipaalagey, initdan nen Ari Solomon si Hiram na duamplon baley a walad sakop na dalin na Galilea.

¹² Linmay Hiram, ta nengnengen to ra may baley, balet ag akaliket ed anengneng to.

¹³ Kanyan inkuantod kinen Solomon, “Anto ra man a klasin baley so inter mod siak, agi?” Lapud saya atawag ni ya anggad natan iman a pasen na Cabul.

¹⁴ Ngalngalin limaran toniladan balituk so impaiyakar nen Hiram ed kinen Solomon.

Saray Arum a Ginagawa nen Solomon

¹⁵ Pinasoot ya impankikimey nen Ari Solomon iray angipaalagey na Timplo tan say palasio, saray nantabun na dalin ed bokig na siudad, tan saray angipaalagey na padir na siudad. Pinasoot to met ya impankikimey iray amasimbalon angipaalagey na saray baley na Hazor, Megido, tan say Gezer. (

¹⁶ Nen saman dinogpaan na ari ed Egipto so Gezer tan adakep to. Pinapatey to ray Cananeo a manaayam ed sayan baley, insan pinoolan to. Insan to impangaro ed kinen anak to nen naasawa nen Solomon,

¹⁷ kanyan si Solomon so amasimbalon angipaalagey ed sayan baley.) Pinasoot met ya impankikimey nen Solomon iray totoon amasimbalon angipaalagey na Aleksab a Bet-horon,

¹⁸ Baalat, Tamar ed kalawakan na Juda,

¹⁹ saray baley a panagsinupan na saray abasto to, saray baley a kawalaan da ray kabayo tan saray karwahi to, tan saray arum a nilabay ton inpaalagey ed Jerusalem, diad Libano, tan diad saray arum a pasen ed nanarian.

^20-21 Saray pinapasoot nen Solomon ya impankikimey et saray kabyangay boleg na saray totoon manaayam ed Canaan ya ag pinatey na saray Israelita nen nilooban day dalin. Kabyangan na sayan boleg iray totoon Amorreo, Heteo, Perezeo, Heveo, tan Jebuseo. Aripen ni ya anggad natan iray totoon kabyangay boleg na sarayan totoo.

²² Si Solomon anggapoy Israelitan ginawa ton aripen, no ag ingen impanlingkur to ran sondalo, opisyal, pangulo na saray sondalo, kapitan na saray kumakarwahi, tan kumakabayo.

²³ Liman lasus tan limamplon opisyal iray makaoley ed saray totoon pinasoot a mankimey ed saray nandoroman impaalagey nen Solomon.

²⁴ Nen say biin anak na ari na Egipto ya asawa nen Solomon et akaalis lan manlapud Siudad nen David tan manaayam lad palasion impagawa nen Solomon para sikato, impatabunan nen Solomon so dalin a walad bokig na siudad.

²⁵ Mamitlod sakey taon a mangisaklang si Solomon na saray bagat a popoolan tan saray bagat a para kareenan, diad altar ya impaalagey ton para Katawan. Nampopool met na insinson para Katawan. Onya so impakasusumpal na Timplo.

²⁶ Nanggawa met si Solomon na amayamay a barko diad Ezion-geber ya asingger ed Elot diad gilig na Dayat na Akaba tan sakop na dalin na Edom.

²⁷ Angibakiy ari Hiram na pigaran totoo ton walad saray barko to ya angibad saray totoo nen Solomon.

²⁸ Nambiahi rad dalin na Ofir, tan diad impawil da angawit irad kinen Solomon na ngalngali labinanem a toniladan balituk.