1 Saray Arari 8 - Maung A Balita Biblia

Niayan ed Timplo so Kaban na Sipanan

¹ Insan impaawit nen Ari Solomon a mankakasakey ed Jerusalem iray amin a pangulo na saray tribu tan saray boleg na Israel, ta iyakar dad Timplo so Kaban na Sipanan na Katawan manlapud Sion, say siudad nen David.

² Nantitipon iran amin nen Pista na saray Abung-abung ed kumapiton bulan na Etanim.

³ Nen akapantitipon lan amin iray pangulo, inalsa na saray papari so Kaban na Sipanan,

⁴ tan inyakar dad Timplo. Saray papari tan saray Levita inyalis da met ed Timplo so Tuldan Ayamay Katawan, tan amin a kagawaan to.

⁵ Nantitipon ed arap na Kaban na Sipanan ira di Ari Solomon tan amin a totoo, tan angibagat ira na amayamay a karniro tan baka ya ag ira nabilang lapud karakel da.

⁶ Insan saray papari inawit dad dalem na Timplo so Kaban na Sipanan tan inyan dad Sankasantosan a Pasen, diad silong na saray payak da ray kirubin.

⁷ Saray akabuskag a payak da ray kirubin et asakbungan da may kaban tan saramay tiken a panagsakbatan.

⁸ Siopamay toon manalalagey ed arap na Sankasantosan a Pasen a nanengneng to ray ngoro na saramay tiken. Balet diad arum a pasen ag to ra nanengneng. (Wadman ni ra yan tiken ya anggad natan.)

⁹ Anggapoy arum a karga to may Kaban na Sipanan likud labat ed saramay duaran tapyak a bato ya inyan nen Moises diman nen walad Palandey na Sinai, nen akisipanan so Katawan ed saray Israelita nen tataynan day Egipto.

¹⁰ Kapaway ed Timplo na saray papari, biglan napno na lorem so Timplo na Katawan.

¹¹ Ag ira makapawil a manggawa na saray susumpalen da, lapud pinano na kagalangan na Katawan so Timplo.

¹² Insan nampikasiy Solomon: “Katawan, sikay angilira na agew ed tawen, balet nilabay moy manayam ed kaloreman tan diad ambilonget a pasen.

¹³ Amaalagey ak na marakerakep a Timplon para sika, sakey a pasen a panayaman mo diad ando lan ando.”

Say Paliwawa nen Solomon ed saray Totoo

¹⁴ Legan a manalalagey iray totood man, inarap ira nen Ari Solomon, tan kinerew ton bindisionan iray Dios.

¹⁵ Inkuanto, “Nagalang komun so Katawan a Dios na Israel! Sinumpal toy sipan tod amak a David, nen inkuantod sikato,

¹⁶ ‘Manlapud samay agew ya impangipaway kod Egipto na saray totook ya Israelita, ag ak nampili na anggan anton siudad ed intiron dalin na Israel a pangipaalageyan na timplon pangigalangan ed siak. Balet pinili ta ka, David, a manoley ed saray totook.’”

¹⁷ Intuloy nen Solomon ya inkuan, “Nampilalekan nen amak a David so mangipaalagey na timplo a pangigalangan ed Katawan a Dios na Israel,

¹⁸ balet inkuan na Katawan ed sikara, ‘Maung so impanpilalek mon mamaalagey na timplo a para siak,

¹⁹ balet aliwan sikay mangipaalagey. Say dilin lakin anak mo so mangipaalagey na timplok.’

²⁰ “Sinumpal natan na Katawan yan sipan to; sinalatan kon manarid Israel si amak a David, tan nipaalagey koy timplon pangigalangan ed Katawan a Dios na Israel.

²¹ Nanggawa ak met na pasen ed Timplo a pangiliraan na Kaban na Sipanan a nankarga na saray tapyak a bato a tanda na impisipanay Katawan ed saray lalaki tayo nen impaway to ra ed Egipto.”

Say Pikakasi nen Solomon

²² Kayari to ya, dia nid arap na saray totoo, nanalagey si Solomon ed arap na altar. Intagey to ray lima to

²³ tan nampikasi, “Katawan a Dios na Israel, anggapoy arum a dios a miparad sika diad tawen odino diad dalin! Matoor kad impisipanan mod saray totoom tan ipapanengneng moy ag mangoman a panangarom ed saray totoon sigput a matoor ed sika.

²⁴ Tinoor moy sipan mod amak a David ya aripen mo, tan diad sayan agew sinumpal moy amin ya imbagam.

²⁵ Et natan, Katawan a Dios na Israel, pikasik ed sika a sumpal mo pa ni may sakey ya insipan mod amak a David nen inkuan mod sikaton wala lawas so kabyangay boleg ton manari ed Israel, no saray kabyangay boleg to et mapeleng iran mangonur ed sika a singa impangonur tod sika.

²⁶ Kanyan pikasik ed sika, O Dios na Israel, a sumpal mo pay amin ya insipan mod kinen amak a David ya aripen mo.

²⁷ “Balet tua kasin makapanayam ka ed tapew na dalin, O Dios? Ag ka nakarga na anggan say intiron tawen; panon ko sirin a kargaen na sayan Timplon impaalagey ko?

²⁸ Katawan a Dios ko, dengel mo pay pikakasik tan saray kerew ko natad sayan agew, siak ya aripen mo.

²⁹ Bantayan mo pad agew tan labi yan Timplo, say pasen a pinilim a pangigalangan ed sika. Dengel mo ak pa sirin legan kon mampipikasi ya akaarap ed sayan Timplo.

³⁰ Dengel mo pa ray pikakasik tan saray pikakasi na saray totoom no mampikasi ran akaarap ed sayan Timplo. Diad ayaman mon tawen, dengel mo kami pa tan pirdona mo kami.

³¹ “No nidalem so siopaman a too lapud impanggawa toy kaogsan ed kapara ton too tan niakar ed altar mo diad sayan Timplo, ta mansamban anggapoy kasalanan to,

³² O Katawan, dengel ka pad tawen tan sintinsiaan mo ray aripen mo. Dusam pay toon nankasalanan onung na kanepegan to, tan ibolus moy anggapoy kasalanan.

³³ “No atalo na saray kalaban da iray totoom ya Israelita lapud nankasalanan irad sika, insan ira ompawil ed sika tan mampikasi rad sika diad sayan Timplo, ta onkerew iray pirdona,

³⁴ dengel ka pad tawen. Pirdonam pa ray kasalanan da tan ipawil mo rad dalin ya inter mod saray lalaki ra.

³⁵ “No mankasalanan ed sika ray totoom, et dusaen mo ra diad panamegley na ag mo pangiter na oran, insan ira magbabawi tan onarap irad sayan Timplo diad pampikasi ra,

³⁶ dengel mo pa rad tawen. Pirdonam pa ray kasalanan na ari tan saray totoom ya Israelita. Ibangat mo pad sikaray matonung a pambilay da, tan ipelag moy oran ed sayan dalin mo ya impatawir mod saray totoom.

³⁷ “No walay eras ed dalin, odino salot, odino namagaan iray tanaman, odino deralen ira na saray dorun, odino dogpaan na saray kalaban iray totoom, odino mansakit o manginagem ira,

³⁸ dengel mo pa ray pikakasi ra. No siopaman ed saray totoom ya Israelita, odino amin da, et iyonat day kalimaan da ed sayan Timplo diad pampikasi ra lapud impapuson ermen da,

³⁹ dengel mo pay pikakasi ra. Diad ayaman mod tawen dengel mo pa ra, pirdonam ira, tan tulongan mo ra. Sika labat so makaamta ed kanunotan na balang sakey a too. Iter mo pad balang sakey so kanepegan ton awaten,

⁴⁰ pian takotan ka na saray totoom legay panaon na pambilay da ed dalin ya inter mod saray lalaki ra.

^41-42 “No say sakey a sangkailin manaayam ed arawin bansa et nadngelan toy inkabantug mo tan saray ankakabaleg a bengatlan gagawaen mod saray totoom, et onla diad igalang to ka tan mampikasi diad dalem na Timplo,

⁴³ dengel mo pay pikakasi to. Diad ayaman mod tawen dengel mo pa, tan iter mo so antokaman a kerewen tod sika, pian naamtaan tan takotan ka na amin a katoowan ed mundo a singa pakaamta tan itatakot ed sika na saray dilin totoom. Naamtaan dad satan a diad sayan Timplo ya impaalagey ko so nepeg a pangigalangan ed sika.

⁴⁴ “No iganggan mo ray totoom ya onla ran mibakal ed saray kalaban da et mampikasi rad sika iner man so kawalaan da ya akaarap irad sayan siudad a pinilim tan diad sayan Timplo ya impaalagey kon para sika,

⁴⁵ dengel mo pa ray pikakasi ra. Dengel mo pa rad tawen tan panalom ira.

⁴⁶ “No mankasalanan ed sika iray totoom—ta anggapo lantiy anggan sakey a toon ag mankakasalanan—tan diad pasnuk mo, et ipatalom irad saray kalaban da tan ipadakep mo rad arum a dalin ya anggan anto lay kaarawi to,

⁴⁷ dengel mo pa ray pikakasi na saray totoom. No diad saman a dalin et magbabawi ra tan mampikasi rad sika, ipatwa ray inkakasalanan tan inkaoges da, dengel mo pay pikakasi ra, O Katawan.

⁴⁸ No diad saman a dalin et petepeteg tan masimoon iran magbabawi tan mampikasi ran akaarap ed sayan dalin ya inter mod saray lalaki mi, diad sayan siudad a pinilim tan diad sayan Timplo ya impaalagey kon para sika,

⁴⁹ dengel mo pa ray pikakasi ra. Dengel mo pa rad ayaman mon tawen, tan kasian mo ra.

⁵⁰ Pirdonam pan amin iray kasalanan da tan say inkasumlang dad sika, tan iyabuloy mon kasian ira na saray kalaban da.

⁵¹ Totoom iran dili ya impaway mod Egipto, say bansan singa tonaway balatyang.

⁵² “Katawan a Dios, maabig lawas komun so linawam ed saray totoom tan say ari ra, tan dengel moy pikakasi ra kapag onkerew irad sikay tulong.

⁵³ Ta pinilim irad saray katoowan ed intiron mundo, pian magmaliw iran dilin totoom, onung na imbagam ed panamegley nen Moises ya aripen mo nen impaway mod Egipto iray lalaki mi.”

Say Kaonuran a Pikakasi nen Solomon

⁵⁴ Kasumpal nen Solomon a nampikasi ed Katawan, nanalagey ed arap na altar, a diman lay nantalimukoran ton akatagey iray lima to.

⁵⁵ Diad maksil a bosis kinerew ton bindisionan na Dios iray totoon nandaragop diman. Inkuanto,

⁵⁶ “Nadayew komun so Katawan ya angiter na kareenan ed saray totoo to, onung na insipan to. Sinumpal ton amin iray maabig ya insipan to diad panamegley na aripen ton si Moises.

⁵⁷ Miayam komun ed sikatayo so Katawan a Dios tayo, a singa impiayam tod saray lalaki tayo; ag to itayo komun taynanan o kaindanan;

⁵⁸ pagmaliwen to itayo komun a maonur ed sikato, pian mambilay itayo lawas onung ed linawa to tan onuren tayo ray ganggan tan saray bilin ya inter tod saray lalaki tayo.

⁵⁹ Lawas nanunotan komun na Katawan yan pikakasik tan saray kerew kod sikato. Lawas kasian to komun iray totoo ton Israelita tan say ari ra ya iter to ray inagew-agew a nakaukolan da.

⁶⁰ Diad saya, naamtaan na amin a katoowan ed intiron mundo a bukbukor na Katawan so Dios—anggapo lay arum.

⁶¹ Sikayo ran totoo to, matoor kayo komun lawas ed Katawan a Dios tayo, maonur ed saray ganggan tan saray bilin to, a singa gagawaen yo la natan.”

Say Impangisaklang ed Timplo

⁶² Insan angibagat ed Katawan si Ari Solomon tan amin da ray totoo.

⁶³ Duamplo tan duan libon baka tan sanlasus tan duamplon libon karniro so insaklang nen Solomon a bagat a para kareenan. Diad onya insaklang nen Solomon tan amin da ray totoo so Timplo.

⁶⁴ Diad saman met ya agew insaklang met nen Solomon ed Katawan so pegley a parti na patio a walad arap na Timplo, insan angisaklang diman na saray bagat a popoolan, saray bagat a trigo, tan say taba na saray bagat a para kareenan. Dia to ra insaklang ta say gansan altar et melag a pangisaklangan ed sarayan bagat.

⁶⁵ Pitoy agew, diad Timplo a sinilibraan nen Solomon tan amin da ray Israelita so Pista na saray Abung-abung. Dinmago ya amin iray totoo a nanlapud nandoroman pasen, manlapud dalan a tatawagey Hamat diad baybay ya anggad ketegay Egipto diad abalaten.

⁶⁶ Diad kumawalon agew, pinasempet la nen Solomon iray totoo. Inggalang na amin a totoo si Ari Solomon tan sinmempet iran maliket lapud amin a bindision ya inter na Katawan ed aripen ton David tan saray totoo ton Israelita.