1 Saray Arari 22 - Maung A Balita Biblia

Pinaksakbayan nen Micaya si Acab

¹ Duay taon ya anggapoy balingaan na Israel tan Siria,

² balet diad kumatlon taon linman akitongtong si Ari Josafat na Juda ed kinen Ari Acab na Israel.

³ Tinepet nen Acab ed saray opisyal to, “Amta yo a kayaryan tayoy Ramot-Galaad. Akin balet et ag tayo babawien ed ari na Siria?”

⁴ Inkuanen Acab ed kinen Josafat, “Mila ka pad sikamin mibakal ed Ramot-galaad.” Inmebat si Josafat, “No akaparaan kayo la, akaparaan kami met la. Mikasakey kamid sikayon mibakal.”

⁵ Insan inkuanto ni, “Balet ipanon tayo ni ya ed Katawan.”

⁶ Impantitipon sirin nen Acab iray propita a sakey ya apat a lasus ira tan tinepet tod sikara, “Laen kon dogpaan so Ramot-galaad odino andi?” “Dogpaan mo,” ebat da. “Panaloen ka na Katawan.”

⁷ Balet tinepet nen Josafat, “Anggapo ta lay sananey a propita na Katawan a pangipanonan tayo?”

⁸ Inmebat si Acab, “Wala niy sananey, si Micaya a lakin anak nen Imla. Balet kabosul ko, ta ag balut mampropropisiya na pankaabigan ko; pakaderalan kon amin.” “Ag mo nepeg ya ibaga tan!” ebat nen Josafat.

⁹ Tinawag sirin nen Ari Acab so sakey ya opisyal, tan imbaga tod sikato ya awiten ton tampol si Micaya.

¹⁰ Saramay duaran ari akasolung ira na kawes da ray arari et akayorung irad saray trono ra diad samay pasen a panagilikan ya asingger ed puirta na Samaria. Mampropropisiyad arap da ira may amin a propita.

¹¹ Nanggawa na saray saklur a balatyang so sakey ed sarap propita a si Sedekias a lakin anak nen Canaana tan kuantod kinen Acab, “Onyay inkuan na Katawan: ‘Diad panamegley na saraya, labanan mo ray Siriano, et sigput a taloen mo ra.’”

¹² Nampapara so imbaga na amin da ra may propita. Inkuanda, “Lakad Ramot-galaad, et manalo ka. Panaloen ka na Katawan.”

¹³ Legan to ya, samay opisyal a mangaawit ed kinen Micaya inkuantod sikato, “Aligwas na ari so impropisiya na amin da ray arum a propita, kanyan onya met so ipropisiyam.”

¹⁴ Balet inmebat si Micaya, “Diad ngaran na mabilay a Katawan, say papaibaga tod siak so ibagak!”

¹⁵ Nen pinmarontal ed arap nen Ari Acab si Micaya, inkuan na ari ed sikato, “Micaya, dogpaan mi nen Ari Josafat so Ramot-galaad odino andi?” Inmebat si Micaya, “Laka yo, ta manalo kayo. Panaloen kayo na Katawan.”

¹⁶ Balet inmebat si Acab, “Mamimpigan ibagak ed sikan say katwaan labat so ibagam ed siak diad ngaray Katawan?”

¹⁷ Inmebat si Micaya “Anengneng kon ataytayak ed saray pokdul iray totood Israel, a singa ra karniron anggapoy pumapastol da. Insan inkuan na Katawan, ‘Anggapoy pangulo da ra yan totoo; pasempet mo la ran walay kareenan.’”

¹⁸ Inkuanen Acab ed kinen Josafat, “Imbagak ed sikan ag balut mampropropisiyay pankaabigan ko; pakaderalan kon amin!”

¹⁹ Intuloy nen Micaya ya inkuan, “Dengel mo natan so ibabagay Katawan! Anengneng koy Katawan a manyodyorung ed trono tod tawen, tan manalalagey ed diking to iray amin ya anghil to.

²⁰ Tinepet na Katawan, ‘Siopay mamalikdod kinen Acab, pian onlad Ramot-galaad tan diman napatey?’ Sananey so imbaga na saray arum ya anghil tan sananey met so imbaga na arum.

²¹ Kabebekta inmasingger so sakey ya ispiritu, nanalagey ed arap na Katawan tan kuanto, ‘Siak so mamalikdo.’ ‘Panon mon palikdoen?’ tepet na Katawan.

²² Inmebat imay ispiritu, ‘Onla ak, ta pantilaen kon amin iray propita nen Acab.’ Inkuan na Katawan, ‘Laka, ta palikdom si Acab. Nagaway pilalek mo.’”

²³ Inkuanen Micaya ed kaonuran, “Saya sirin so agawa. Impantila na Katawan ed sika ra yan propitam. Balet imbaga la na Katawan ed sika so kaogsan a nagawad sika.”

²⁴ Balet inasinggeran nen Sedekias si Micaya, tinampal to, tan kuanto, “Kapigan ya inmekal ed siak so ispiritu na Katawan, insan nansalita ed sika?”

²⁵ “Naamtaan mo no onla kan onamut ed kuarton walad beneg,” ebat nen Micaya.

²⁶ Insan ingganggan nen Acab so sakey ed saray opisyal to, “Singkat moy Micaya, insan mo iyakar ed kinen Amon a gobirnador na siudad, tan kinen Prinsipi Joas.

²⁷ Ibagam ed sikaran ipriso ra tan pakanen da labat na tinapay tan itdan day danum ya anggad isabik ya anggapoy maoges ya agawad siak.”

²⁸ “No ompawil kan anggapoy maoges ya agawa,” kuanen Micaya, “ag nansalitad panamegley ko so Katawan!” Insan to inyarum ya inkuan, “Tandaan yon amin a totoo—imay imbagak!”

Say Impatey nen Acab

²⁹ Linman dinmogpad siudad na Ramot-galaad si Ari Acab na Israel tan si Ari Josafat na Juda.

³⁰ Inkuanen Acab ed kinen Josafat, “No onla itayon mibakal ag ak pabirbir, balet mansolung kay kawes na ari.” Kanyan ag nampabirbir so ari na Israel nen linman mibakal.

³¹ Ingganggan na arid Siria iray talomplo tan duan pangulo na saray sondalon akakarwahi ya anggapoy arum a dogpaan da no ag say ari na Israel.

³² Nen anengneng day Ari Josafat abaloan dan ari na Israel, kanyan dinogpaan da. Balet nen inmeyag,

³³ abirbir dan aliwan ari na Israel, kanyan tinondaan dan dogpaan.

³⁴ Balet apalaranan ya apana na sakey a sondalon Siriano si Acab diad nanleetan na saray kawes ton para bakal. Ineyag tod kutsiroy karwahi to, “Asugatan ak! Poliktar ka, ta onarawi ta lad bakalan.”

³⁵ Legan na pinasian laban, nansiansian akasaral ed karwahi to si Ari Acab tan sankaarap to ray Siriano. Managagos so dala a manlalapud sugat to tan aluak na dala so datal na karwahi, insan inatey nen labi la.

³⁶ Nen onlalabi la niganggan ed saray sondalo na Israelita, “Onsempet lay balang sakey a laki ed dilin bansa tan siudad to!”

³⁷ Kanyan inatey si Ari Acab. Niakar ed Samaria so bangkay to tan diman nipompon.

³⁸ Naorasan ed dipositoway danum so karwahi to diad Samaria a diman dinidildilan na saray aso so dala to tan dimay nanoorasan na saray marotak a bibii, onung na sinalita na Katawan.

³⁹ Nisulat ed libron Say Awaran da ray Ararid Israel iray arum nin ginagawa nen Ari Acab, pati say nipaakar ed palasio ton garing tan saray siudad ya impapaalagey to.

⁴⁰ Kapatey nen Acab sinmalat ed sikaton nanari so lakin anak to a si Ahazias.

Si Ari Josafat na Juda

⁴¹ Diad kumapat a taon na panooley nen Ari Acab ed Israel, nagmaliw ya ari na Juda si Josafat a lakin anak nen Asa.

⁴² Talomplo tan limay taon to nen ginmapon manari, tan nanayam ed Jerusalem legan ton nanoley a duamplo tan limay taon. Si Azuba ya anak nen Silhi so ina to.

⁴³ Ginawa toy kaptekan ed arap na Katawan a singa ginawa nen Asa ya ama to; balet ag to aderal iray paganon pasen a panangigalangan, kanyan intuloy na saray totoo so nambabagat tan nampopool na insinso ed saraman a pasen.

⁴⁴ Akikaaro si Josafat ed ari na Israel.

⁴⁵ Nisulat ed libron Saray Awaran da ray Ararid Juda iray arum nin ginagawa nen Josafat, say inkasebeg to tan saray impibakal to.

⁴⁶ Pinataynan ton amin ed dalin iray marotak a lalaki tan bibiin atilak nid saramay panaon nen ama ton Asa, tan manlilingkur irad saray paganon altar.

⁴⁷ Nen saman anggapoy ari ed dalin na Edom; inoleyan na toon tinoro na ari ed Juda.

⁴⁸ Wala ray barko nen Josafat a para biahid dalin na Ofir, ta manalay balituk; balet aderal irad Ezion-geber, kanyan ag la ra nambiahin balut.

⁴⁹ Insan imbaga nen Ari Ahazias na Israel a mambiahid bapor iray totoo to a kaolup da ray totoo nen Josafat, balet ag inmabubon si Josafat.

⁵⁰ Inatey si Josafat tan nipompon ed Siudad nen David, insan sinmalat ed sikaton nanari si Jehoram a lakin anak to.

Si Ari Ahazias na Israel

⁵¹ Diad kumalabinpiton taon na panooley nen Ari Josafat ed Juda, nagmaliw ya ari na Israel si Ahazias a lakin anak nen Acab, tan nanoley ed Samaria na duay taon.

⁵² Nankasalanan ed Katawan, ta inalig toy ginagawa di Acab ya ama to, Jezebel ya ina to, tan Ari Jeroboam a nilagyat dan nankasalanan so Israel.

⁵³ Inggalang tan nanlingkuran toy Baal tan impanpasnuk toy Katawan a Dios na Israel, a singa si ama to.