1 Saray Arari 21 - Maung A Balita Biblia

Say Kaubasan nen Nabot

¹ Diad asingger ed palasio nen Ari Acab diad Jezreel, walay kaubasan a kayaryan na sakey a lakin manngaray Nabot.

² Aminsan inkuanen Acab ed kinen Nabot, “Iter mo pad siak so kaubasan mo; asingger ed palasiok, et labay kon pantanemay pising. Salatan ko na magmaung a kaubasan, o no labay mo bayaran koy kanepegan ton bili.”

³ “Tinawir ko yan kaubasan ed saray lalakik,” ebat nen Nabot. “Ag iyabuloy na Katawan ya iter kod sika!”

⁴ Agunigon tan akapasnuk a sinmempet ed abung si Acab lapud samay imbaga nen Nabot ed sikato. Dinmokul ed katri to, inarap toy padir, tan ag mangan.

⁵ Dinago nen Jezebel ya asawa to tan tinepet to, “Akin et mapalaloy kagugunigon mo? Akin et ag ka mangan?”

⁶ Inmebat si Acab, “Lapud samay imbaga nen Nabot ed siak. Imbagak ed sikaton saliwen ko may kaubasan to o no labay to, salatan koy sananey a kaubasan, balet imbaga ton ag ko naala!”

⁷ “Aliwa tan ari ka na Israel?” ebat nen Jezebel. “Bangon kad tad katri, manliket ka tan mangan ka. Iter kod sikay kaubasan nen Nabot!”

⁸ Insan nanggawa na saray sulat, impirma toy ngaran nen Acab, intimbri toy timbri nen Acab, insan to impawit ed saray opisyal tan saray manonan totoo ed Jezreel.

⁹ Onyay tanul na saray sulat: “Ibawag yoy sakey ya agew a panayuno, pantitipon yo ray totoo, insan yo payorungen ed pasen na kagalangan si Nabot.

¹⁰ Mangala kayoy duaran luko-lukon lalaki, paalagey yo rad arap nen Nabot, insan akusaen dan aayewen toy Dios tan say ari. Ipaway yod satan ed siudad, insan yo tupaken ya anggad ompatey.”

¹¹ Ginawa na saray opisyal tan saray manonan totoo ed Jezreel so ingganggan nen Jezebel.

¹² Imbawag day sakey ya agew a panayuno, impantitipon da ray totoo, insan da pinayorung ed pasen na kagalangan si Nabot.

¹³ Diad arap na saray totoo, inakusa na saramay duaran lalaki si Nabot ya aayewen toy Dios tan say ari. Kanyan impaway dad siudad si Nabot, tan tinupak da ya anggad inatey.

¹⁴ Insan impaibaga rad kinen Jezebel. “Apatey lay Nabot.”

¹⁵ Kapangawat nen Jezebel ed balita, inkuantod kinen Acab, “Inatey lay Nabot. Laka la, ta kayaryanen mo la may kaubasan ton ag to ilakod sika.”

¹⁶ Linman tampol si Acab a mangayaryan ed samay kaubasan.

¹⁷ Insan inkuan na Katawan ed kinen propita Elias a taga Tisbe,

¹⁸ “Lakad kinen Ari Acab na Samaria. Nasabim a mangakayaryan ed kaubasan nen Nabot.

¹⁹ Ibagam ed sikato a siak, say Katawan, kuankod sikato, ‘Anta pinatey mo la may too, alaen mo ni lamet so kayaryan to?’ Ibagam ed sikaton onyay kuanko, ‘Dildilan na saray aso so dalam ed pasen a nandildilan na saray aso ed dala nen Nabot!’”

²⁰ Nen anengneng nen Acab si Elias inkuanto, “Nalmo mo ak lamet, kalaban ko?” “On, nalmo ta ka lamet,” ebat nen Elias. “Sigput so panggagawam na kaogsan ed arap na Katawan.

²¹ Kanyan inkuan na Katawan ed sika, ‘Panliknaen ta kay segsegang. Ekalen ta kan ari tan paandipaten kon amin iray lalakin kabyangay pamilyam, malangwer may matakken.

²² Saray kabyangay pamilyam magmaliw iran singa saray kabyangay pamilya di Jeroboam a lakin anak nen Nebat tan Ari Baasa a lakin anak nen Ahias, lapud impanpasnuk mo ak diad impangilagyat mon mankasalanan iray taga Israel.’

²³ Inkuan met na Katawan a kanen na saray aso diad siudad na Jezreel so bangkay nen Jezebel.

²⁴ Kanen met na saray aso so bangkay na siopaman a kakanayon mon ompatey ed siudad, tan kanen na saray buitri so bangkay na siopaman ya ompatey ed kaalogan.” (

²⁵ Anggapoy manoley a singa si Acab a sigput so impanggawa toy kaogsan ed arap na Katawan—si asawa ton Jezebel so nantatanggoyur ed sikato.

²⁶ Nanggagawa na saray makapabaing a tuloy a kasalanan na panangigalang ed saray talintao, a singa ginagawa na saray Amorreo, saray totoon pinataynan na Katawan ed dalin nen nilooban na saray Israelita.)

²⁷ Nen asumpal a nansalitay Elias, pinilat nen Acab so kawes to, inekal to tan nansolung na sako. Ag angan, dinmokul ed sako, tan nanakar-akar a maerermen.

²⁸ Inkuan na Katawan ed kinen propita Elias,

²⁹ “Naimanom no panoy impamaabeba nen Acab ed sikaton dili diad arap ko? Lapud onyan ginawa to, ag ko iter ed sikato so dusa legan ton mambilay; legan na pambilay na anak ton laki, iter koy dusa ed saray kabyangay pamilya nen Acab.”