1 Saray Arari 2 - Maung A Balita Biblia

Saray Kaonuran a Bilin nen David ed kinen Solomon

¹ Nen magano lan ompatey si David, binilin toy anak ton Solomon.

² Inkuanto, “Magano lay ipatey ko. Pabiskeg moy linawam tan ipanengneng mon laki ka;

³ sumpal moy amin ya iganggan ed sika na Katawan a Dios mo. Toluk mon amin iray ganggan tan bilin to onung na nisulat ed Ganggan nen Moises, pian onaligwas ka ed antokaman a gawaen mo, inerman so laen mo.

⁴ No onuren mo ray ganggan to, sumpalen met na Katawan so sipan tod siak a manoley ed Israel iray kabyangay boleg ko, legan a mabolbolus tan matoor iran mangonur ed saray ganggan to.

⁵ “Wala niy ibagak ed sika. Amtam iman so ginawa nen Joab ed siak nen pinatey to ray duaran pangulo na saray sondalo na Israel a di Abner a lakin anak nen Ner tan Amasa a lakin anak nen Jeter. Amtam no panoy impamatey tod sikara nen panaon na kareenan lapud imbawi tod impamatey da nen panaon na bakal. Pinatey to ray totoon anggapoy kasalanan tan natan siak so natetetel lapud saray ginawa to, tan siak so manaani na saray bungay kaogsan to.

⁶ Gawam so isisipen mon maabig; ag mo aabuloyan a nasabi toy agew na ipatey to.

⁷ “Balet kasian mo ray lalakin anak nen Barsillai a taga Galaad; itdan mo ra lawas na nakaukolan da, ta kinasian da ak nen ibabatikan koy agim ya Absalom.

⁸ “Sakey met iman si Simei a lakin anak nen Gera tan taga baley na Bahurim a sakop nen Benjamin. Mapalalo so impangisamba tod siak diad samay agew a linma ak ed Mahanaim, balet nen inabet to ak ed Ilog na Jordan sinambaan kod sikato ya ag ko papatey.

⁹ Natan balet ag mo papaolyan ya ag nadusa. Gawam so isisipen mon maabig; nepeg mon papatey ya andi-saew.”

Say Impatey nen David

¹⁰ Inatey si David tan nipompon ed Jerusalem.

¹¹ Nanari na apataplon taon, pitoy taon ed Hebron tan talomplo tan taloy taon ed Jerusalem.

¹² Si Solomon sinalatan ton ari si ama ton David, tan binmiskeg so inkiletneg na nanarian to.

Say Impatey nen Adonias

¹³ Aminsan ya agew, linmad kinen Bat-seba ya ina nen Solomon si Adonias a say ina to et si Hagit. Tinepet nen Bat-seba ed sikato, “Maabig kasiy iter to yan imbisitam?” “On,” ebat to,

¹⁴ insan to inyarum, “Wala pa labat so kerewen kod sika.” “Anto tan?” tepet nen Bat-seba.

¹⁵ Inmebat, “Amtam a siak komuy nagmaliw ya ari tan inilaloan ya na amin a too ed Israel. Balet sananey so agawa, ta say agik so nagmaliw ya ari lapud linawa na Katawan a sikatoy manari.

¹⁶ Wala natay labay kon kerewen; ag mo ak komun papabaingan.” “Anto tan?” tepet nen Bat-seba.

¹⁷ Inmebat, “Kerew mo pad Ari Solomon ya iter ton asawak si Abisag a taga Sunem. Amtak ya ag to ka pabaingan.”

¹⁸ “Maung so kanunotan mo,” ebat nen Bat-seba. “Onla ak, ta isalitaan ta kad ari.”

¹⁹ Kanyan linmay Bat-seba ed ari, ta isalitaan toy Adonias. Inmalagey so ari a pangilugay tod ina to, insan tinmuek ya angigalang. Inmirung ed trono to tan amaiyan na yorungan ed nikawanan to tan inirungan nen ina to.

²⁰ Inkuanen Bat-seba, “Walay melag a bengatlan kerewen kod sika; ag mo ak komun papabaingan.” “Antoy kerew yo, ina?” tepet nen Solomon, “Ag ta kayo pabaingan.”

²¹ Inmebat, “Iter mo pan asawa nen Adonias si Abisag.”

²² “Akin et kekerewen yon iter kod sikatoy Abisag?” tepet na ari. “Kerew yo met ni laingen ya iter ko met ed sikatoy trono. Andi-bali ta sikatoy pangulowan ko, tan walad diking to si Abiatar a pari tan si Joab!”

²³ Insan insamba nen Solomon diad ngaray Katawan, “Pateyen ak komun na Dios no aliwan bilay nen Adonias so paibayar kod sikato, lapud sayan kekerewen to!

²⁴ Pinaletan na Katawan a pairungen ak ed trono nen amak a David; tinoor toy sipan to tan inter toy nanarian ed siak tan saray kabyangay pamilyak. Isambak ed ngaran na mabilay a Katawan ya ompatey si Adonias natad sayan agew!”

²⁵ Kanyan ingganggan nen Ari Solomon si Benaya; linmay Benaya tan pinatey toy Adonias.

Nibantak si Abiatar tan Apatey si Joab

²⁶ Insan inkuanen Ari Solomon ed kinen Abiatar a pari, “Sempet ka lad abung mod bario diad Anatot. Kanepegan moy ompatey, balet ag ta ka pateyen natan, lapud sikay nanasikasod Kaban na Sipanan legan a kaibam si amak a David tan lapud akidamay kad saray gunigon da.”

²⁷ Kanyan pinaekal nen Solomon si Abiatar ed kipapasen ton pari na Katawan; lapud saya apatwa so sinalita na Katawan diad Silo nipaakar ed kinen Eli a pari tan saray kabyangay boleg to.

²⁸ Nadngelan nen Joab so agawa. (Tinulongan toy Adonias, balet ag to tinulongan si Absalom.) Kanyan batik ed Masanton Tulda tan pinmeket ed pinagkasaklur na altar.

²⁹ Nen nibalitad kinen Ari Solomon a batik ed Tuldan Ayamay Katawan si Joab tan walad abay na altar, angibaki na toon anepet ed sikato no akin et batik ed altar. Inmebat si Joab a sikatoy batik ed Katawan, ta antakot toy Solomon. Kanyan imbaki nen Ari Solomon si Benaya a pateyen toy Joab.

³⁰ Linmad samay tulda si Benaya tan kuantod kinen Joab, “Ingganggan na ari ya ompaway ka.” “Andi,” ebat nen Joab. “Labay ko diay ompatey.” Pinmawil ed ari si Benaya tan imbalita toy imbaga nen Joab.

³¹ “Gawam so imbaga nen Joab,” ebat nen Solomon. “Patey mo tan ipompon mo. Diad satan anggapo lay ebatan ko tan siopaman nin kabyangay boleg nen David, lapud samay ginawa nen Joab nen pinatey to ray totoon anggapoy kasalanan.

³² Dusaen na Katawan si Joab lapud saraman ya impamatey to ya anggapoy pikakabat nen amak a David. Pinatey nen Joab si Abner a pangulo na saray sondalo na Israel, tan si Amasa a pangulo na saray sondalo na Juda. Pinatey to ran anggapoy kasalanan, anta maung tan matonung ni ra nen say sikato.

³³ Andi-anggaan so pakadusa nen Joab tan saray kabyangay boleg to, lapud sarayan impamatey tod saray totoon anggapoy kasalanan. Balet paaligwasen lawas na Katawan so siopaman ed saray kabyangay boleg nen David ya onyorung ed trono to.”

³⁴ Kanyan linmay Benaya ed Tuldan Ayamay Katawan tan pinatey toy Joab, insan nipompon ed dilin abung to diad kalawakan.

³⁵ Si Benaya so insalat na ari ed kinen Joab a pangulo na saray sondalo, tan si Sadoc a pari so insalat tod kinen Abiatar.

Say Impatey nen Simei

³⁶ Insan impatawag na ari si Simei tan kuantod sikato, “Mangipaalagey kad Jerusalem na abung mo. Manayam kad man tan ag ka ompapaway ed baley.

³⁷ No ompaway tan labasan moy Kolus na Kidron, andi-duaruwan ompatey ka, et sikan diliy natetel.”

³⁸ “Maung itan so imbagam, Kagalang ya Ari,” ebat nen Simei. “Gawaen ko so labay mo.” Kanyan abayag a nanayam ed Jerusalem si Simei.

³⁹ Kalabas na taloy taon balet, duaran aripen nen Simei so batik ed ari na Gat a si Akis a lakin anak nen Maaca. Nen nadngelan nen Simei a wala rad Gat,

⁴⁰ kinabayoan toy asno to tan linmad Gat diad kinen Ari Akis, ta anapen to ray aripen to. Nalmo to ra, kanyan insempet to ra.

⁴¹ Nen nadngelan nen Solomon so ginawa nen Simei,

⁴² impatawag to tan kuantod sikato, “Ag ko ta impasambaan ed sika diad ngaran na Katawan ya ag ka ontataynan ed Jerusalem? Ag ka ta inmabubon tan insipan mon onuren mo ak?

⁴³ Akin sirin et ag mo tinoor so sinambaan mod Katawan tan ag mo sinumpal so ganggan ko?”

⁴⁴ Insan to inyarum ya inkuan, “Kabkabat mo ray maoges a ginagawam ed kinen amak a David, anto? Dusaen kay Katawan, lapud saraman a maoges a ginagawam.

⁴⁵ Balet bindisionan to ak tan paletan toy inkiletneg na nanarian nen David ed ando lan ando.”

⁴⁶ Insan ingganggan na ari si Benaya; linmay Benaya tan pinatey toy Simei. Kanyan maligen la natan so panaari nen Solomon.