1 Saray Arari 17 - Maung A Balita Biblia

Si Elias tan say Panaon ya Anggapoy Oran

¹ Inkuanen propita Elias a taga Tisbe na Galaad ed kinen Ari Aca, “Diad ngaran na Katawan a mabilay a Dios na Israel a panlilingkuran ko, ibagak ed sikan anggapoy napelag a linaew o oran ed loob na arapen a duara odino taloy taon ya anggad ag ko pangibagan onoran la.”

² Insan inkuan na Katawan ed kinen Elias,

³ “Taynan mo yan pasen tan lakad bokig, insan ka onamut ed Kolus na Carit a nibokig na Jordan.

⁴ Diad kolus ka manalay inomen mo, tan ingganggan kon maniter ed sikay taganom iray wawak.”

⁵ Inonur nen Elias so ganggan na Katawan; linman nanayam ed abay na Kolus na Carit.

⁶ Naniinom ed danum na kolus, tan kabwasan tan labi ya inyaakaran na saray wawak na tinapay tan karni.

⁷ Ag abayag nakatan imay kolus, lapud anggapoy oran.

Si Elias tan say Biin Balo ed Sarepta

⁸ Insan inkuan na Katawan ed kinen Elias,

⁹ “Lakad baley na Sarepta, diad asingger ed Sidon tan manayam kad man. Ingganggan koy sakey a biin balo a tagad man a pakanen to ka.”

¹⁰ Kanyan linmad Sarepta si Elias; nen manasingger lad puirta na baley akanengneng na sakey a biin balo a mandodokdok na kiew ya itotongo. Inkuantod sikato, “Itdan mo ak pay danum ya inomen.”

¹¹ Nen oonla lan mangala may balo na inomen, impaabot ton inkuan, “Iyalaan mo ak pa met na pigaran tinapay.”

¹² Inmebat imay bii, “Diad ngaran na mabilay a Katawan a Dios mo, sambaan kod sikan anggapoy tinapay ko. Sankaakup labat so arinak a walad pasig tan dagdaiset a larak na oliban walad garapon. Linma ak diad mandokdok na itongo, insan ko isempet, ta iparaan ko may arinak a para siak tan say anak kon laki. Kaonuran la man a kanen mi, insan ompatey kami lad eras.”

¹³ “Ag ka mapaga,” kuanen Elias ed sikato. “Laka la, ta iparaan moy kanen yo. Balet igawaan mo ak ni ed satay walad sikan arina na sakey a tinapay, insan mo dia iyakar. Kayarim iparaan moy kera para sika tan say anak mon laki.

¹⁴ Ta onyay inkuan na Katawan a Dios na Israel, ‘Ag naandian na arina so pasig, tan ag naandian na larak so garapon anggad ed agew a siak, say Katawan et mangipelag ak na oran.’”

¹⁵ Anempet imay balo tan ginawa toy onung na imbagad sikato nen Elias, et awalaan iran amin na nakan ed amayamay ya agew.

¹⁶ Onung na insipan na Katawan, diad panamegley nen Elias, ag naandian na arina so pasig tan ag naandian na larak so garapon.

¹⁷ Nen ontombuk iran agew, akainagem imay lakin anak na samay balo; dinmenden lan dinmenden so sakit to, insan diad kaonuran inatey.

¹⁸ Inkuantod kinen Elias, “Too na Dios, akin et ginawam ed siak ya? Linma ka dian mangipanunot ed Dios na kasalanan ko, pian onsabiy patey ed anak ko?”

¹⁹ “Iyakar mod siak itay anak mo,” kuanen Elias. Sinakloy nen Elias imay ogaw, inyakar tod kuartod tagey a panaayaman to, tan imparokul tod katri.

²⁰ Insan maksil so bosis ton nampikasi, “O Katawan kon Dios, akin et onya lan makapasinagem so ginawam ed samay balo? Pinatuloy to ak tan pinagaan to ak; akin et binabawim lad bilay so anak to?”

²¹ Insan amitlon inyonat toy laman to ed tapew na samay ogaw, tan nampikasi, “O Katawan a Dios ko, pabilay mo pa yan ogaw!”

²² Inebatan na Katawan so pikakasi nen Elias; pinmawil so kamarerwa to may ogaw, et abilay.

²³ Impawil nen Elias imay ogaw diad leksab na abung ed kinen ina to tan kuantod sikato, “Nengneng mo, mabilay so anak mo!”

²⁴ Inmebat imay balo, “Amtak la natan a sakey kan too na Dios, tan tuan mansasalitay Katawan diad panamegley mo!”