1 Saray Arari 15 - Maung A Balita Biblia

Si Ari Abiam na Juda

¹ Diad kumalabinwalon taon na panooley nen Ari Jeroboam ed Israel, nagmaliw ya ari na Juda si Abiam,

² tan nanoley ed Jerusalem na taloy taon. Si Maaca ya anak nen Absalom so ina to.

³ Ginawa to ray kasalanan a ginagawa nen ama to tan aliwan sigput a matoor ed Katawan a Dios to; ag to naaligan si laki tod dapan a si David.

⁴ Balet lapud kinen David, say Katawan a Dios to initdan toy Abiam na sakey a lakin anak ya onsalat ed sikaton manoley ed Jerusalem tan mamasiansian arawid kaatapan so Jerusalem.

⁵ Ginagawa ya na Katawan, lapud ginawa nen David iray makapaliket ed sikato tan ag ton balut sinumlang iray ganggan to, likud ed samay ginawa to ed Urias a Heteo.

⁶ Legan na impanoley nen Abiam naynay so impanbabakal dan dua nen Jeroboam.

⁷ Nisulat ed libron Say Awaran da ray Ararid Juda iray arum nin ginagawa nen Abiam.

⁸ Inatey si Abiam, nipompon ed Siudad nen David, insan sinmalat ed sikaton nanari si Asa a lakin anak to.

Si Ari Asa na Juda

⁹ Diad kumaduamplon taon na panooley nen Ari Jeroboam ed Israel, nagmaliw ya ari na Juda si Asa,

¹⁰ tan nanoley ed Jerusalem na apataplo tan sakey a taon. Si Maaca ya anak nen Absalom so bai to.

¹¹ Ginagawa nen Asa iray makapaliket ed Katawan, a singa saray ginagawa nen David.

¹² Pinataynan tod bansa iray amin a lalaki tan bibiin marotak a manlilingkur ed saray paganon altar, tan inekal to ray amin a talintaoy diriyos a ginagawa na saray akaonan nanoley nen say sikato.

¹³ Inekal to si bai ton Maaca ed kipapasen ton riynan ina, ta nanggawa na makapaingungot a talintao na diosan Asera. Binatang nen Asa imay talintao, insan to pinoolan ed Patar na Cedron.

¹⁴ Nansiansian matoor ed Katawan si Asa legan na impanbilay to, anggan ag to dineral ya amin iray paganon pasen a panangigalangan.

¹⁵ Inyan tod dalem na Timplo ya amin iray kagawaan ya insasaklang nen ama to ed Dios. Inyan to met iray balituk tan pilak a kagawaan ya insasaklang ton dili.

¹⁶ Legan a walad pakaoley ira di Ari Asa na Juda tan Ari Baasa na Israel, naynay iran nambabakal a dua.

¹⁷ Nilooban nen Baasa so Juda tan ginapwan ton paliberan na padir so Rama, pian anggapoy makaonla o makapaway ed Juda.

¹⁸ Kanyan inala nen Ari Asa iray amin a pilak tan balituk ya atilak nid dalem na Timplo tan diad dalem na palasio, insan to ingganggan iray pigaran opisyal to ya iyakar da rad Damasco. Diad Damasco so panaayaman na ari na Siria a si Ari Ben-hadad a lakin anak nen Tabrimon tan apo nen Hezion. Inter dad ari imay pilak tan balituk, insan da sinalita so papaibaga nen Ari Asa:

¹⁹ “Manibaan ita, a singa ginawa na saray kaamaan ta. Panangarok ed sika ra yay pilak tan balituk. Lingwanan mo lay impigampim ed Ari Baasa, et ekalen to ray sondalo ton walad nasasakopan kon dalin.”

²⁰ Inmabubon ed kinen Asa si Ari Ben-hadad, kanyan imbaki ton ondogpad saray siudad na Israel iray sondalo to tan saray pangulo ra. Adakep day Ijon, Dan, Abel-bet-maaca, say pasen ya asingger ed Dayat na Galilea, tan say intiron nasasakopan na Neftali.

²¹ Nen nadngelan nen Ari Baasa so nagagawa, tinondaan toy pamapadir tod Rama tan linma lad Tirza.

²² Insan ingganggan nen Ari Asa a balang sakey a tood Juda, anggapoy impoktil, et ontulong ed pangekal ed Rama na saray bato tan saray tablan impanpadir nen Baasa. Impamadir nen Asa ira yan bato tan tabla ed Mizpa tan Geba, sakey a siudad a nasasakopan na Benjamin.

²³ Nisulat ed libron say Awaran da ray Ararid Juda iray arum nin ginagawa nen Ari Asa, saray impanatalo tod bakal tan saray baley a pinapadir to. Balet nen masiken la, alopuy lapud sakit na sali a nilikna to.

²⁴ Inatey si Asa, nipompon ed kamposanto da ray arari diad Siudad nen David, insan sinmalat ed sikaton nanari si Josafat a lakin anak to.

Si Ari Nadab na Israel

²⁵ Diad kumadwan taon na panooley nen Ari Asa na Juda, nagmaliw ya arid Israel si Nadab a lakin anak nen Ari Jeroboam, tan nanoley a duay taon.

²⁶ Nanggagaway kaogsan ed arap na Katawan tan inlagyat ton nankasalanan so Israel, a singa ginawa nen ama to.

²⁷ Si Baasa a lakin anak nen Ahias tan kabyangan na tribu nen Isacar et niliputan toy Nadab tan pinatey to legan a lolooban nen Nadab so siudad na Gibeton diad Filistia.

²⁸ Agawa ya nen kumatlon taon na panooley nen Ari Asa ed Juda. Kanyan sinalatan nen Baasa si Nadab a nanari ed Israel.

²⁹ Kayorung ton ari, ginapwan ton pinatey ya amin iray kabyangay pamilya nen Jeroboam. Onung na imbagay Katawan diad panamegley na aripen ton si Propita Ahias na Silo, apatey ya amin iray kabyangay pamilya nen Jeroboam; anggapoy anggan sakey ya atilak.

³⁰ Agawa ya lapud impanpasnuk nen Jeroboam so Katawan a Dios na Israel, diad impankasalanan to tan diad impangilagyat ton nankasalanan so Israel.

³¹ Nisulat ed libron Say Awaran da ray Ararid Israel iray arum nin ginagawa nen Nadab.

³² Legan a walad pakaoley si Ari Asa na Juda tan si Ari Baasa na Israel, naynay iran nambabakal a dua.

Si Ari Baasa na Israel

³³ Diad kumatlon taon na impanoley nen Ari Asa ed Juda, nagmaliw ya ari na Israel si Baasa a lakin anak nen Ahias, tan nanoley ed Tirza a duamplo tan apat a taon.

³⁴ Nanggagaway kaogsan ed arap na Katawan tan inlagyat ton nankasalanan so Israel a singa ginawa nen Jeroboam ya akaonan nanoley nen say sikato.