1 Saray Arari 13 - Maung A Balita Biblia

¹ Lapud ganggan na Katawan, linmad Betel a nanlapud Juda so sakey a propita tan asabian ton manalalagey ed abay na altar si Jeroboam a mangibabagat.

² Diad panangonur tod Katawan imay propita, inkuanto, “O altar, altar, onyay inkuan na Katawan: Nianak ed pamilya nen David so sakey a lakin ogaw a manngaran na Josias. Pateyen tod tapew mo ray paparin managlingkur ed saray paganon altar tan mangibabagat irad sika; poolan to met ed tapew mo ray pokel na inaatey a totoo.”

³ Intuloy na samay propita ya inkuan, “Natemek yan altar, tan nataytayak iray dapul to. No nagawa ya, naamtaan mod satan a nansalitay Katawan diad panamegley ko.”

⁴ Nen nadngel ya nen Jeroboam, intoro to may too tan ingganggan to, “Erel yo man a too!” Aparalitikon tampol so taklay na ari, kanyan ag to la napikus.

⁵ Insan biglan atemek so altar tan ataytayak ed dalin iray dapul, a singa samay impasakbay na propita diad ngaran na Katawan.

⁶ Inkuanen Ari Jeroboam ed samay propita, “Ipikasi mo ak pa ed Katawan a Dios mo, tan kerew mon paabigen toy taklay ko.” Nampikasid Katawan imay propita, et inmabig so taklay na ari.

⁷ Insan inkuan na ari ed samay propita, “Mila kad siak ed abung, ta pakanen ta ka. Itdan ta ka met na tumang mod ginawam.”

⁸ Inmebat imay propita, “Anggan iter mod siak so kapalduay kayamanan mo, ag ak milad sika, odino say oninom o mangan ed sayan lugar,

⁹ ta ingganggan na Katawan ya ag ak mangan o oninom, tan ag ak ondalan ed dalan a dinalan ko no ompawil ak.”

¹⁰ Kanyan nen pinmawil ag la dinmalan ed dinalan to, no ag ingen diad sananey lan dalan.

Say Masiken a Propita ed Betel

¹¹ Diad saman a panaon, walay masiken a propitan manaayam ed Betel. Linmad sikato ray lalakin anak to tan imbalita rad sikato may ginawa na propitan taga Juda diad Betel ed saman ya agew, tan no anto so imbaga tod kinen Ari Jeroboam.

¹² “Nen tinmaynan imay propita, dinay dinalan to?” tepet ed sikara na samay masiken a propita. Intoro rad sikato so dalan,

¹³ insan to imbaga a sintaan day asnon kabayoan to. Ginawa ra, insan kinmabayo.

¹⁴ Tinombuk to may propitan taga Juda, insan to nalmon manyodyorung ed silong na kiew a robli. “Sikay propitan taga Juda?” tepet to. “Siak,” ebat to may too.

¹⁵ “Mila kad siak ed abung, ta mangan ka,” inkuanto.

¹⁶ Balet inmebat imay propitan taga Juda, “Ag ak milad sikad abung mo odino awaten koy panangkailim ed siak. Ag ak mangan odino oninom na antokaman ed sayan lugar,

¹⁷ ta ingganggan na Katawan ya ag ak mangan odino oninom, tan ag ak ondalan ed dinalan ko no ompawil ak.”

¹⁸ Insan inkuan na samay masiken a propitan taga Betel, “Propita ak met a singa sika, tan diad ganggan na Katawan inkuan ed siak na anghil ya itagar ta kad abung ko, ta sangkailien ta ka.” Balet mantitila may masiken a propita.

¹⁹ Kanyan akilad samay masiken a propita imay propitan taga Juda, insan ira dinmongo.

²⁰ Legan dan mangakan ed lamisaan, nadngel na samay masiken a propita so salita na Katawan,

²¹ kanyan ineyag ton inkuan ed samay propitan taga Juda, “Imbagay Katawan a lapud ag mo inonur tan ag mo ginaway pagagawa tod sika,

²² no ag ingen pinmawil ka tan angan kad lugar ya ingganggan ton ag mo panganan, napatey ka tan ag nipompon ed lobuk na pamilyam so bangkay mo.”

²³ Kayari ran angan samay masiken a propita insintaan toy asno may propitan taga Juda.

²⁴ Linma la may propitan taga Juda, tan diad dalan inabet na lion tan pinatey da. Abaktar ed dalan so bangkay na samay propita, tan nanalagey ed abay to imay asno tan samay lion.

²⁵ Wala ray pigaran totoon dinmalan, et anengneng dad dalan so bangkay, tan samay lion a manalalagey ed ag arawi. Tinmuloy irad Betel, insan da imbalitay anengneng da.

²⁶ Nen nadngelan na samay masiken a propita, inkuanto, “Bangkay iman na samay propitan ag to inonur so ganggan na Katawan! Ag tinmoluk kanyan angibakiy Katawan na lion ya amatey ed sikato, onung na imbaga na Katawan a gawaen to.”

²⁷ Insan to inkuan ed saray lalakin anak to, “Isintaan yo ak na asnon kabayoan ko.” Ginawa ray imbaga to,

²⁸ insan nankabayon linma. Nalmo to may bangkay na propitan abaktar ed dalan, tan manalalagey nid abay to ira may asno tan lion. Ag kinan na lion imay bangkay odino diniwit to may asno.

²⁹ Inalsa na samay masiken a propita imay bangkay, inlogan tod beneg na asno, impawil tod Betel, ta panermenan to, insan to ipompon.

³⁰ Imponpon tod lobuk na dilin pamilya to imay masiken a propita tan inermenan to pati saray lalakin anak to. Inkuanda, “Agi, O agi!”

³¹ Kayariy pompon inkuan na samay propita ed saray anak to, “No ompatey ak, ipompon yo ak ed angipomponan ed samay propita, tan iyabay yoy bangkay kod sikato.

³² Ontuan ontua ira may sinalita to, lapud ganggan na Katawan, sumpad altar ed Betel tan saray amin a panangigalangan a pasen ed saray baley na Samaria.”

Say Kasalanan ya Inateyan nen Jeroboam

³³ Ag siansian inkaindan nen Ari Jeroboam so maoges a gagawaen to. Intuloy to ingen a pinilid saray ordinarion pamilya iray totoon magmaliw a paparin manlingkur ed saray altar a ginagawa to. Ginawa ton pari so siopaman a toon malabay a mampari.

³⁴ Kasalanan nen Jeroboam yan ginawa to, tan lapud saya sikatoy makasengeg na inkaderal tan inkaandipat na panoley na saray kabyangay boleg to.