1 Saray Arari 12 - Maung A Balita Biblia

Linmaban iray Tribu ed Baybay

¹ Linmay Roboam ed Sikem a nantitiponan na saray totood Israel a wala rad baybay, ta gawaen dan ari.

² Nadngelan ya nen Jeroboam a lakin anak nen Nebat, a wadman nid Egipto a dimay nila to nen imbatikan toy Ari Solomon, kanyan pinmawil manlapud Egipto.

³ Impaawit na saray tribu ed baybay, insan ira linman amin ed kinen Roboam tan kuandad sikato,

⁴ “Ambelat so impasakbat nen amam ed sikami. No palemewan moy sasakbaten mi tan painomayan moy panagbilay mi, panlingkuran mi ka.”

⁵ “Pawil ki dia kayariy taloy agew, ta ibagak ed sikayoy ebat ko,” inkuantod sikara. Kanyan linma la ra.

⁶ Insan impanon ya nen Roboam ed saray mamatakken a lalakin sumisimbawa nen ama ton Solomon. “Antoy isimbawa yon iyebat kod saraman a totoo?” tepet tod sikara.

⁷ Inmebat ira, “No labay mo a maung so panlingkur mod saraman a totoo, iter moy kerew da, et matoor ira lawas a manlingkur ed sika.”

⁸ Balet ag dinengel nen Roboam so simbawa ra. Ingen linmad saray lalakin binmaleg a kaiba to a sikaray sumisimbawa to la natan.

⁹ Tinepet tod sikara, “Antoy isimbawa yod siak? Antoy ibagak ed saraman a totoon onkekerew a palemewan koy sasakbaten da?”

¹⁰ Inmebat ira, “Onyay ikuan mod saraman a totoo: ‘Mabiskeg niy kiking ko nen say ulpo nen amak.

¹¹ Ambelat so impasakbat ed sikayo nen amak; ambelat niy ipasakbat kod sikayo. Nilatiko kayo nen amak; pekpeken ta kayoy balatyang!’”

¹² Kayariy taloran agew, pinmawil ed kinen Ari Roboam si Jeroboam tan amin a totoo, onung na imbaga na ari ed sikara.

¹³ Maruksa ya inmebat ed sikara tan ag to tinombuk so simbawa da ra may mamatakken a sumisimbawa.

¹⁴ Sinalita to may impaikuan na saray mamalangwer a sumisimbawa: “Ambelat so impasakbat ed sikayo nen amak; ambelat niy ipasakbat kod sikayo. Nilatiko kayo nen amak; pekpeken ta kayoy balatyang!”

¹⁵ Say Katawan so akanlinawa a si Roboam et ipolisay toy kerew na saray totoo, pian napatwa so imbaga tod kinen Jeroboam diad panamegley nen propita Ahias a taga Silo. Sikato yay makasengeg ya ag dinengel na ari iray totoo.

¹⁶ Nen abirbir na saray totoo ya ag ira dengelen na ari, inmeyag ira, “Anggapo lay pibibiang tayod kinen David tan say pamilya to. Antoy ginawa ran para sikatayo? Totood Israel, onsempet ti la! Akaoley lad sikaton dili si Roboam!” Kanyan sinmempet lan amin iray totood Israel.

¹⁷ Pinaolyan da lay Roboam a nanoley ed saray totoon manaayam labat ed sakop na Juda.

¹⁸ Insan imbaki nen Ari Roboam si Adoniram, say makaoley ed saray totoon pinasoot a mankimey, ya onlad saray Israelita, balet tinutupak da ya anggad inatey. Lapud saya, nangganat si Roboam a linmogan ed karwahi to, insan batik ed Jerusalem.

¹⁹ Nanlapud saman, sumpad saray manaarin kabyangay boleg nen David iray totood baybay a nanarian na Israel.

²⁰ Nen nadngelan na saray totood Israel a pinmawil lay Jeroboam a nanlapud Egipto, binagaan dan mitongtong ed saray totoo, insan da ginawan ari na Israel. Saray kabyangan labat na tribu nen Juda so nansiansian matoor ed saray kabyangay boleg nen David.

Say Propisiya nen Semaya

²¹ Nen akasabid Jerusalem si Roboam, impantitipon to ray sanlasus tan walomplon libo a pinilin lalaki ed saray tribu di Juda tan Benjamin, ta mibakal ira pian nipawil tod sikaton dili so panagoley tod saray tribu na Israel a wala rad baybay.

²² Balet imbaga na Dios ed kinen propita Semaya

²³ ya onlad kinen kinen Ari Roboam na Juda, ta ibaga tod sikato tan amin a totood saray tribu di Juda tan Benjamin

²⁴ a say Katawan kuanto, “Ag yo dodogpaan iray dilin agagi yo, saray totood Israel. Sempet kayo la, balang sakey ed sikayo, ta siak so nanlapwan na samay agawa.” Inonur dan amin so ganggan na Katawan, kanyan sinmempet la ra.

Inkaindan nen Jeroboam so Dios

²⁵ Si Ari Jeroboam na Israel niliber toy padir so baley na Sikem diad nipokdul a luyag na Efraim tan nanayam diman ya agano. Tinmaynan diman tan niliber toy padir so baley na Penuel ya inalisan to.

^26-27 Inkuantod sikaton dili, “No onya lan onyay nagagawa ya onlad Jerusalem iray totook a mangibagat ed Katawan diad Timplod man, naayat iran migampid kinen Ari Roboam na Juda, insan da ak pateyen.”

²⁸ Kayari to yan dinalepdep, nanggawa na duaran balituk a kilaw na bakan kalakyan, insan inkuantod saray totoo, “Abaybayag lay iyaakar yo lan iyaakar a mangigalang ed Jerusalem. Tondaan yo la. Totood Israel, nia ray diriyos yo ya angipaway ed sikayo ed Egipto!”

²⁹ Inyan tod Betel imay sakey a bakan balituk tan diad Dan so sakey.

³⁰ Kanyan nankasalanan iray totoo diad iyaakar dan mangigalang ed Betel tan diad Dan.

³¹ Nanggawa met ed saray toktok na pokdul na saray pasen a panangigalangan, tan anoro na saray papari diad saray pamilya ya aliwa ran kabyangan na tribu nen Levi.

Dineral na Dios so Altar ed Betel

³² Ginawa nen Jeroboam a sakey a pista so kumalabinliman agew na kumawalon bulan, kaparay agew a sisilibraan ed Juda. Diad tapew na altar diad Betel nambabagat ed saray bakan balituk a ginawa to, tan angipasen ed Betel na saray papari a manlingkur ed altar a ginawa to.

³³ Diad kumalabinliman agew na kumawalon bulan, say agew a sikaton diliy angigana, linmad Betel, ta mansilibra onung na imbaga ton gawaen na saray totood Israel, diad panamegley na pambagat tod tapew na altar.