1 Samuel 8 - Maung A Balita Biblia

Akikerew iray Totoo na Ari

¹ Nen masiken lay Samuel, impagmaliw ton huis ed Israel iray lalaki anak to.

² Joel so ngaran na pangulowan, tan Abias so yogtan; huis irad Beer-seba.

³ Balet ag da inalig so ama ra; kayamanan labat so pilalek dan nagamuran, kanyan nanaala ray pasoksok tan pinipekewet day katunongan.

⁴ Lapud saya, amin da ray pangulo na Israel nantitipon ira, linma ran nanoolup ed kinen Samuel diad Rama,

⁵ tan kuandad sikato, “Masiken ka la, tan saray anak mo et ag da ka aaligen. Kanyan sirin, manuro ka na ari a manoley ed sikami, pian wala met so ari mi, a singa saray arum a bansa.”

⁶ Naermenan si Samuel ed sayan inkerew da na sakey ya ari; kanyan nampikasid Katawan,

⁷ et inkuan na Katawan, “Onur mon amin so ibagay totoo ed sika. Aliwan sikay impolisay da; siak so impolisay da ya ari ra.

⁸ Nanlapu lad impangipaway kod sikara ed Egipto, ibebeneg da ak tan manlilingkur irad saray arum a diriyos; natan gagawaen dad sika so gagawaen da lan gendat ed siak.

⁹ Onur mo ra sirin, balet itdan mo ray mapeget a pasakbay tan ipaliwawam no panoy panoley na ari ed sikara.”

¹⁰ Imbaga nen Samuel ed saray totoon onkekerew na ari ed sikato iray amin ya imbaga na Katawan ed sikato.

¹¹ Impaliwawa to, “Onyay panoley ed sikayo na ari yo: Pagmaliwen ton sondalo ray anak yon lalaki; manlogan iray arum ed saray karwahi ton para bakal, mankabayo ray arum, tan mambatik iray arum diad onaan da ray karwahi to.

¹² Pagmaliwen to ray arum ed sikara a pangulo na tunggal libon sondalo, tan saray arum pangulo na tonggal limamplon sondalo. Pambakaen tod alog to iray anak yo, pananien to ra, tan panggawaen to ra na armas tan kagawaan na saray karwahi to.

¹³ Pagmaliwen to ray anak yon bibii a managgaway pabalingit to, managluto to ra, tan managgawa ray tinapay to.

¹⁴ Alaen to ray sankaabigan ya kaalogan yo, saray kaubasan yo, tan saray kaolibaan yo, insan to ra iter ed saray opisyal to.

¹⁵ Alaen toy kakaplo na saray naani yo tan saray bungay ubas yo, insan to ra iter ed saray opisyal na palasio to tan saray arum ya opisyal to.

¹⁶ Alaen to ray aripen yo, lalaki may bibii, saray sankaabigan a baka yo tan saray asno yo, tan ikana to rad dilin pankaabigan to.

¹⁷ Alaen toy kakaplo na saray karniro yo. Pagmaliwen to kayo ran aripen to.

¹⁸ No onsabi yan panaon, onakis kayon manriklamo lapud ari yo—et sikayon diliy nanlabay a nawalaan kayoy ari—balet ag kayo dengelen na Katawan.”

¹⁹ Ag dinengel na saray totoo si Samuel. Inkuanda, “Andi! Labay miy nawalaan na ari,

²⁰ pian singa kami saray arum a bansa, a walay dilin ari mi a manoley ed sikami, tan mangipangulod sikami a mibakal.”

²¹ Dinengel nen Samuel ya amin iray imbaga ra tan linman imbaga tod Katawan.

²² Inmebat so Katawan, “Gawam so labay da tan itdan mo ray sakey ya ari.” Insan inkuanen Samuel ed saray amin a totood Israel, “Pawil kayo lad kaabungan yo.”