1 Samuel 4 - Maung A Balita Biblia

Asamsam so Kaban na Sipanan

¹ Diad saman a panaon, nantitipon iray Filisteo a mibakal ed saray totood Israel, kanyan namparaan iray Israelita. Saray Israelita nankampo ra ed Ebenezer tan saray Filisteo diad Afec.

² Dinmogpa ray Filisteo, tan kayariy pinasyan laban, tinalo da ray Israelita tan pinatey dad lawak na bakalan so sakey ya apat a libon lalaki.

³ Nen pinmawil ed kampo iray ag apatey ed bakal, inkuan na saray pangulod Israel, “Akin et inyabuloy na Katawan a taloen itayo natan na saray Filisteo? Tila ta alaen tayod Silo so Kaban na Sipanan na Katawan, pian milad sikatayo so Katawan tan iyagel to itayod saray kalaban tayo.”

⁴ Kanyan angibaki ray pigaran totoo ed Silo tan inala ra may Kaban na Sipanan na Katawan a Makapanyarin-amin, a walad trono diad tagey na saray kiruben. Inolup na saray lalakin anak nen Eli, a di Ofni tan Finees, so Kaban na Sipanan.

⁵ Nen sinmabiy Kaban na Sipanan, ayegyeg so dalin diad kasil na maliket ya impaneyag-eyag da ray Israelita.

⁶ Nadngel na saray Filisteo so eyagan, tan kuanda, “Dengel yoy maksil ya eyagan ed kampo da ray Hebreo! Anto kasiy kabaliksan to?” Nen naamtaan da a sinmabid kampo da ray Hebreo so Kaban na Sipanan na Katawan,

⁷ ataktakot ira tan kuanda, “Sinmabid kampo ra so sakey a dios! Pakaskasi itayo la! Anggapo niy singa onyan agawad sikatayo nen saman!

⁸ Siopay makapangilaban ed sikatayo ed saray makapanyarin diriyos? Sikaray diriyos ya amatey ed saray Egipsio diad panamegley na saray nandoroman salot diad kalawakan!

⁹ Mampabiskeg kayoy linawa, sikayo ran Filisteo! Milaban kayon singa tuan lalaki, ta no andi, magmaliw itayon aripen na saray Hebreo, a singa impangaripen tayod sikara. Kanyan milaban kayon singa tuan lalaki!”

¹⁰ Akilaban iray Filisteo; atalo ray Israelita tan kibatiktik irad kaabungan da. Amayamay a maung so inaatey: talomplon libon Israelitan sondalo so inaatey.

¹¹ Asamsam so Kaban na Sipanan na Katawan, tan inatey ira di Ofni tan Finees a lalakin anak nen Eli.

Say Impatey nen Eli

¹² Manlapud lawak na bakalan walay sakey a toon kabyangay boleg nen Benjamin a binmatik ya onlad Silo. Sinmabi ed samay agew lamlamang ya insiput to. Diad pangipanengneng toy ermen to, pinipilat toy kawes to tan ininan toy dabuk so olo to.

¹³ Manyodyorung si Eli ed yorungan to diad gilig na dalan, ta manaalagar. Mapaga lapud Kaban na Sipanan. Samay too imbalita tod intiron baley so agawa, et nanakis ya amin iray totoo diad takot da.

¹⁴ Nadngel nen Eli so akisan tan tinepet to, “Antoy kabaliksan to yan akisan?” Nangganat ya inmasingger ed kinen Eli imay too, tan imbaga to met ed sikatoy balita. (

¹⁵ Siamaplo tan walo lay taon nen Eli natan tan ngalngalin ag la makanengneng.)

¹⁶ Inkuan na samay too, “Akapaliis ak manlapud lawak na bakalan tan ag ak tinmondan binmatik ya angga dia, diad sayan agew.” Tinepet nen Eli ed sikato, “Antoy agawa, anak ko?”

¹⁷ Inmebat may mangibabalita, “Imbatikan na saray Israelita iray Filisteo; agaylay inkatalo tayo! Apatey met iray lalakin anak mo a di Ofni tan Finees, tan asamsam so Kaban na Sipanan!”

¹⁸ Nen asalita na samay too so Kaban na Sipanan na Dios, abalintuag si Eli manlapud yorungan to diad abay na puirta. Masikesiken la tan mataba-taba, kanyan apoter so tenger to, tan inatey. Apataploy taon a sikatoy pangulo na Israel.

Say Impatey na Asawa nen Finees

¹⁹ Say manugang nen Eli, say asawa nen Finees, et malokun tan ngalngali la mananak. Nen nadngelan ton asamsam so Kaban na Sipanan na Dios tan inatey so katolangan to tan say asawa to, biglan nampasakit tan nananak.

²⁰ Nen ompapatey, inkuan ed sikato na saray bibiin ontutulong ed sikato, “Pabiskeg moy linawam! Sakey a laki so anak mo!” Balet ag to inimano, tan ag inmebat.

²¹ Icabod so inngaran tod samay ogaw, ta inkuanto, “Say Israel tinaynan na kagalangan na Dios”—totokuyen toy inkasamsam na Kaban na Sipanan tan say impatey na katolangan to tan say asawa to.

²² Inkuanto, “Say Israel tinaynan na kagalangan na Dios, lapud asamsam so Kaban na Sipanan na Dios.”