1 Samuel 23 - Maung A Balita Biblia

Inyagel nen David so Baley na Keila

¹ Nadngelan nen David a dodogpaan na saray Filisteo so baley na Keila tan tatakewen day kasumsumpal ya inani.

² Kanyan tinepet tod Katawan, “Laen kon dogpaan iray Filisteo?” “On,” ebat na Katawan. “Dogpaan mo ra tan iyagel moy Keila.”

³ Balet inkuan ed sikato na saray totoo to, “Antakot kami la diad Juda; aloor so takot mi no onla tayod Keila tan dogpaan tayo ray sondalon Filisteo!”

⁴ Kanyan impanon lamet nen David ed Katawan, tan imbagay Katawan ed sikato, “Lakad Keila tan dogpaan mo ray Filisteo ta panaloen ta kad sikara.”

⁵ Kanyan si David tan saray totoo to et linma rad Keila tan dinogpaan da ray Filisteo; dakerakel so pinapatey dad sikara tan inaala ray baka ra. Kanyan inyagel nen David iray totoo ed saman a baley.

⁶ Nen si Abiatar a lakin anak nen Ahimelec et akabatik tan akikasakey ed kinen David ed Keila, inawit toy ipod.

⁷ Nibagad kinen Saul a linmay David ed Keila, tan kuanto, “Say Dios impasilong to lad pakayarik si David. Inkolung toy sikaton dili diad inyakar tod baley ya aliber na padir tan abalewetan iray puirta to.”

⁸ Kanyan tinawag to ray totoo to ta mibakal irad Keila, pian nadakep day David tan saray totoo to.

⁹ Nen nadngelan nen David a getma nen Saul a dogpaan, inkuantod kinen Abiatar a pari, “Iyakar mo dia may ipod.”

¹⁰ Insan kuanen David, “Katawan a Dios na Israel, nadngelan kon getma nen Saul so onla diad Keila tan deralen to, lapud siak ya aripen mo.

¹¹ Ipalima ak kasi na saray totood Keila ed kinen Saul? Talaga kasin onla diay Saul onung na nadngelan ko? Katawan a Dios na Israel, pikasik ya ebatan mo ak!” Inmebat so Katawan, “Onsabiy Saul.”

¹² “Siak kasi tan saray totook et ipalima na saray totood Keila ed kinen Saul?” tepet lamet nen David. “On, ipalima da kayo,” ebat na Katawan.

¹³ Kanyan si David tan saray totoo to—sakey a anem a lasus iran amin—tinmayinan ran tampol so Keila tan nanalis-alis ira. Nen nadngelan nen Saul a tinaynan nen David so Keila, ag to la intuloy so getma to.

Si David diad Nipokdul a Dalin

¹⁴ Nanaamut ed nipokdul a dalin si David diad kalawakan ya asingger ed Zif. Ag tinondaan nen Saul ya anapen, balet ag ipalima na Dios ed sikato.

¹⁵ Antakot si David, ta anapen nen Saul a pateyen. Si David walad Hores, diad kalawakan ya asingger ed Zif.

¹⁶ Nilad man nen Jonatan, pinabiskeg toy linawa to tan impanonut to ya ag paolyan na Dios.

¹⁷ Inkuanto, “Ag ka natatakot, ta ag ka nadiwit nen amak. Kabkabat to a sikay manari ed Israel tan siak so onkumaduad sika ed betang.”

¹⁸ Nanggawa ray masanton sipanan a mankaaro ra lawas. Tinmilak ed Hores si David, tan sinmempet lay Jonatan.

¹⁹ Walay pigaran taga Zif a linmad kinen Saul diad Gabaa tan kuanda, “Si David et manaamut ed Hores a lugar mi, diad palandey na Hakila a nisagur na kalawakad Juda.

²⁰ Amta mi, O Ari, ya ontan lay pilalek mon mangerel ed sikato; lakad man tan andi-duaruwan nipalima mid sika.”

²¹ Inmebat si Saul, “Bindisionan kayo komun na Katawan lapud mapangasi kayod siak!

²² Laka yo tan palinew yo nin maminsan; anap yo no iner so talagan kawalaan to tan no siopay akanengneng ed sikatod man. Nadngelan kon masilib a maung.

²³ Anap yo ray petepeteg a pasen a panaamutan to, insan ki dia ompawil a tampol a mangibagad siak. Et no wadman nid saman a pasen, laen kon anapen ed anggan intiron dalin na Juda.”

²⁴ Kanyan amawil irad Zif tan akaona la ra nen si Saul. Si David tan saray totoo to et wala rad kalawakan na Maon, diad nisolinek a patar a nisagur na kalawakay Juda.

²⁵ Linmay Saul tan saray totoo to a mananap ed kinen David. Balet nadngelan ya nen David, kanyan linmad mabaton pokdul a walad kalawakan na Maon tan nanayam diman. Nen nadngelan ya nen Saul, nila ton tinombuk si David.

²⁶ Si Saul tan saray totoo to et wala rad sakey a dapag na pokdul, balet si David tan saray totoo to et wala rad biek a dapag to man a pokdul. Maganat dan ibabatikan si Saul tan saray totoo to, ta manasingger la rad sikara tan ngalngali la ra nadakep.

²⁷ Balet sinmabiy sakey ya ibabaki tan kuantod kinen Saul, “Pawil kayon tampol! Lolooban na saray Filisteo so bansa!”

²⁸ Kanyan tinondaan ton inosilan si David tan linman akilaban ed saray Filisteo. Lapud saya, atawag iman a pasen na Pokdul a Nansianan.

²⁹ Tinmaynan diman si David tan linmad lugar na Engadi, tan dimay nanamutan to.