1 Samuel 20 - Maung A Balita Biblia

Tinulongan nen Jonatan si David

¹ Insan tinmaynan si David manlapud Nayot, diad Rama, linmad kinen Jonatan tan kuantod sikato, “Antoy ginawak? Antoy kasalanan ko? Antoy maoges a ginawak ed kinen amam a pamateyan tod siak?”

² Inmebat si Jonatan, “Ag iyabuloy na Dios ya ompatey ka! Ibabaga na amak so amin a gagawaen da, makabaliksan man o andi, tan akin et iyamut da yad siak? Anggapoy katwaan to!”

³ Balet inmebat si David, “Kabkabat nen amam so ontan lan panangarom ed siak, kanyan ginetma to lan iyamut ed sikay gawaen to, pian ag ka nasakitan a maung. Sambaan kod sika diad ngaray mabilay a Katawan a wala ak lad sangabay lobuk!”

⁴ Inkuanen Jonatan, “Gawaen koy amin ya ibagam.”

⁵ Inmebat si David, “Nabwas et Pistay Balon Bulan; nepeg a mirongo ak ed ari. Balet abuloyan mon onla ak ya onamut ed alog, anggad labi na kumatlon agew.

⁶ No naimano nen amam ya anggapo ak ed lamisaan, ibagam ed sikaton nampatanir ak ed sika ya ongganggano ak ed Betlehem, ta asabiy tinaon a bagat a para intiron pamilyak.

⁷ No ikuanto, ‘Andi bali,’ andi ak ed kaatapan; balet no mampasnuk, naamtaan mo a talagan walay maoges a getma tod siak.

⁸ Ipangasim pan gawaen ya para siak, tan sumpal moy masanton sipanan ta. Balet no nankasalanan ak, sika lan diliy mamatey ed siak! Akin et abuloyan mon say amam so manggawa?”

⁹ Inmebat si Jonatan, “Ag ka mannununot na ontan! No amtak a talagan walay maoges a getma nen amak, imbagak la komun ed sika.”

¹⁰ Insan tinepet nen David, “Siopay mangipakabat ed siak no mamapasnuk ya onebat si amam ed sika?”

¹¹ “Talad alog,” ebat nen Jonatan. Kanyan linma ra,

¹² tan inkuanen Jonatan ed kinen David, “Say Katawan a Dios na Israel komun so tasi ta! Diad onyan oras nabwas tan diad ontombuk ya agew tepetan koy amak. No maung lay linawa tod sika, paipakabat kod sika.

¹³ No getma to ka nin pasakitan, pateyen ak komun na Katawan no ag ko paipakabat ed sika, pian nibatikan moy kaatapan. Wala komud sikay Katawan a singa inkiwala to nen saman ed kinen amak!

¹⁴ Legan kon mambilay, matoor ka komun ed siak tan sumpal moy masanton sipan mo; balet no ompatey ak,

¹⁵ ag napoltut komuy pangiter moy panangasi ed pamilyak. No sigput lan naoput na Katawan iray kalaban mo,

¹⁶ mansiansia ni komun so sipanan tan dua. No ag natoor, dusaen ka na Katawan.”

¹⁷ Si Jonatan impansamba to lamet si David ya aroen to, ta si Jonatan inaro toy David a singa panangaro tod sikaton dili.

¹⁸ Insan inkuanen Jonatan ed kinen David, “Lapud nabwas et Pista na Balon Bulan, naimano ya anggapo kad man ed pasen mo.

¹⁹ Nabwasa sakey, lalon naimano ya anggapo ka; laka sirin ed pasen ya inamutan mo nen saman, tan amut kad abonbonton iran batod man.

²⁰ Mangibolus ak na taloran pana, a singa dimay kekenaen ko.

²¹ Insan ko ibagad aripen ko ya alaen to ra. No ikuankod sikato, ‘Nengneng mo, wadtan ed sayan diking mo iray pana; alam ira,’ say labat ton ibaga arawi kad kaatapan, et nayarian moy ompaway. Sambaan kod ngaran na mabilay a Katawan ya arawi kad kaatapan.

²² Balet no ikuanko, ‘Wadtan ed sananey a diking mo ray pana,’ taynan kad satan, ta patataynanen kay Katawan.

²³ No nipaakar ed sipanan tan dua, andi-duaruwan tulongan ita na Katawan a tooren ta, anggad angga.”

²⁴ Kanyan inmamut ed alog si David. Diad agew na Pistay Balon Bulan, dinmongon mangan si Saul.

²⁵ Inmirung ed gendat a yorungan tod abay na dingding. Kaabay toy Abner, tan inmirung ed petek to si Jonatan. Anggapoy akayorung ed pasen nen David,

²⁶ balet anggapoy imbaga nen Saul, ta inisip to, “Wala angangkoy agawad sikato kanyan aliwan malinis onung ed ganggan.”

²⁷ Diad ontombuk ya agew, say agew kayariy Pistay Balon Bulan anggapo niy akayorung ed pasen nen David, kanyan tinepet tod kinen Jonatan, “Akin et ag dia angay David karuman tan natan?”

²⁸ Inmebat si Jonatan, “Akikasid siak ya abuloyan kon onlad Jerusalem.

²⁹ Inkuanto, ‘Abuloyan mo pan onla ak, ta say pamilyak et onla rad baley a mangibagat, tan imbilin nen kuyak a nepeg koy onlad man. Kanyan no talagan kaaro mo ak, abuloyan mo ak ya onla, pian nanengneng ko ray kakanayon ko!’ Sikato yay makasengeg no akin et anggapod pasen to diad lamisaan yo.”

³⁰ Ampetang so olo nen Saul ed kinen Jonatan tan kuantod sikato, “Anak kay maoges tan mananumpan bii! Amtak la natan a pipilaan moy David, tan papabandayen moy sikan dili tan si inam!

³¹ Ag mo ta amtan no mabilay si David et ag kan balut magmaliw ya ari ed sayan bansa? Laka, ta awit mo dia—nepeg ya ompatey!”

³² Inmebat si Jonatan, “Akin et nepeg ya ompatey? Antoy ginawa to?”

³³ Lapud saya, pinika nen Saul si Jonatan, ta labay ton pateyen; atalusan nen Jonatan a talagan getma nen ama to a patayen si David.

³⁴ Ampetang so olo nen Jonatan, tinmaynan ed lamisaan tan ag angan ed saman ya agew, say kumadwan agew na Pistay Balon Bulan. Nanermenan ton maung si David, ta pinabaingan nen Saul.

³⁵ Diad ontombuk a kabwasan linmay Jonatan ed alog, ta nengnengen toy David onung na paknaan dan dua. Kaiba toy sakey a ogaw a laki,

³⁶ tan kuantod sikato, “Batik ka ta anap moy panan ibolus ko.” Batik imay ogaw, insan angipanay Jonatan ed labas to.

³⁷ Nen asabi toy pasen a kawalaay pana, kinolyaotan nen Jonatan, “Say pana et wadman nid bandad man!

³⁸ Ag kad tan labat manalalagey! Ganatan mo!” Inala na samay ogaw imay pana tan pinmawil ed kinen amo to.

³⁹ Anggapoy amta tod nagagawa; si Jonatan tan si David labat so makaamta.

⁴⁰ Inter nen Jonatan iray armas to ed samay ogaw tan impaipawil to rad baley.

⁴¹ Kasiput to may ogaw, pinmaway ed abonbonton iran bato si David, tinmalimukor tan amitlon dinmakmomo ya anggad dalin. Manakis iran dua nen Jonatan legan dan nanlakapan; maermen niy David nen si Jonatan.

⁴² Insan inkuanen Jonatan ed kinen David, “Wala komuy Dios ed sika. Andi-duaruwan ontulong so Katawan pian sika tan siak, saray kabyangan na boleg mo tan saray kabyangan na boleg ko, et tooren tayon anggad angga so masanton sipanan tan dua.” Insan tinmaynan lay David tan amawil lad baley si Jonatan.