1 Samuel 17 - Maung A Balita Biblia

Sinagyat nen Goliat a Milaban iray Israelita

¹ Saray Filisteo nantitipon irad Soco, sakey a baley ed Juda, ta mibakal ira; nanggawa ray kampo ed sakey a pasen a tatawagey Efes-dammin, diad nanleetan na Soco tan Azeca.

² Si Saul tan saray Israelita nantitipon ira tan nanggawa ray kampo ed Patar na Ela a dimay namparaanan dan mibakal ed saray Filisteo.

³ Nandarasig iray Filisteo ed toktok na sakey a pokdul tan saray Israelita diad sananey a pokdul, tan sakey a patar so nanleetan da.

⁴ Walay sakey a lakin manngaray Goliat a taga siudad na Gat, pinmaway ed kampo da ray Filisteo tan sinagyat ton milaban iray Israelita. Taloran mitro so kaatagey to,

⁵ tan akakawes na gansan limamplo tan liman kilo so belat to, tan akahilmit met na gansa.

⁶ Asolungan met na gansa ed bikking tan ulpo to, tan sankasakbat toy sakey a pikan gansa.

⁷ Say potan na gayang to et singa ngalngalowan so kabaleg to tan say tarem ton balatyang et mambelat na anemiran kilo. Walay sakey a sondalon manaakar ed onaan to a manaawit na samper to.

⁸ Nanalagey si Goliat tan inmeyag ed saray Israelita, “Antoy gagawaen yod tan et akadasig kayon mibakal? Sakey ak a Filisteo, sikayo ran aripen nen Saul! Mamili kayoy sakey ed saray totoo yo a milaban ed siak.

⁹ No manalo tan napatey to ak, magmaliw kamin aripen yo; balet no manalo ak tan napatey ko magmaliw kayon aripen mi.

¹⁰ Sagyaten ko dia natan iray sondaloy Israel. Mamili kayoy sakey a milaban ed siak!”

¹¹ Nen nadngel ya nen Saul tan saray totoo to, ataktakot ira.

Si David ed Kampo nen Saul

¹² Si David et anak nen Jesse ya Efratita, a taga Betlehem ed Juda. Si Jesse waloray anak ton lalaki, tan masikesiken la nen ari si Saul.

¹³ Akilad kinen Saul a mibakal iray taloran anak ton pangulowan. Eliab so ngaran na sankapangulowanan, Abinadab so kumadwa, Samma so kumatlo,

¹⁴ tan si David so sankayogtanan. Legan a kaiba nen Saul ira may taloran pangulowan,

¹⁵ si David nampawil-pawil ed Betlehem a manasikasoy karniro nen ama to.

¹⁶ Diad loob na apataplon agew, kabwasan tan labin sinasagyat nen Goliat a milaban iray Israelita.

¹⁷ Aminsan ya agew inkuanen Jesse ed kinen David, “Awit mo yay sansalup ya insanglil a trigo tan sarayay samploran tinapay, tan igangganat mon iter ed kindi kuyam diad kampo.

¹⁸ Awit mo met ira yay samploran kiso a para samay panguloy sanlibon sondalo. Nengneng mo no antoy kipapasen da ra may kuyam, tan mangawit ka diay bengatlan pakapatnagan ya anengneng mo ra tan maung so kipapasen da.

¹⁹ Si Ari Saul, saray kuyam, tan amin iray arum ya Israelita et wala rad Patar na Ela a mibabakal ed saray Filisteo.”

²⁰ Diad kaimbuas, asaksakbay a binmangon si David, impaasikaso tod sananey a too iray karniro, inala to may kakanen, tan linma la, onung na imbaga nen Jesse ed sikato. Nen sinmabid kampo, duga-rugan mandarasig lan mibakal iray Israelita tan maneeyag-eyag ira.

²¹ Nanaarapan la ran mambakal iray sondalo na Filistia tan saray sondalo na Israel.

²² Intilak nen David ed opisyal a managasikasoy abasto so awit to, linmad saray nandarasig a sondalon mibakal, dinago to ray kuya to, tan tinepet toy kipapasen da.

²³ Nen mitongtong si David ed sikara, linmad onaan da ray sondalon Filisteo si Goliat tan sinagyat ton milaban iray Israelita, a singa gagawaen ton gendat. Nadngel nen David.

²⁴ Nen anengneng na saray Israelita si Goliat, kibatiktik irad takot,

²⁵ “Nengneng yo!” inkuan na sakey tan sakey ed sikara. “Dengel yoy panasagyat to! Insipan nen Ari Saul ya itdan toy baleg a tumang so toon makapatey ed sikato; ipaasawa to nid sikato so anak ton marikit, tan ag to pambuisen iray kabyangay pamilya na ama to.”

²⁶ Tinepet nen David ed saray totoon asingger ed sikato, “Antoy nagamuran na toon makapatey ed sayan Filisteo tan makapangipaliis ed kababaingan na Israel? Ta siopa ta yan paganon Filisteo et sagyaten ton milaban iray sondalo na mabilay a Dios?”

²⁷ Imbaga rad sikato so nagamuran na toon makapatey ed kinen Goliat.

²⁸ Si Eliab a sankapangulowanan a kuya nen David, nadngel toy David a mitotongtong ed saray totoo. Asanukan ed kinen David tan kuanto, “Antoy gagawaen mo dia? Siopay manaasikasod saray pigaran karniro diad kalawakan? Mamaung ka! Linma ka dia labat a mambantay ed bakal!”

²⁹ “Anto tay ginawak a?” tepet nen David. “Ag nayariy anggan mantepet sirin?”

³⁰ Imbeneg toy kuya to tan akitongtong ed sakey a too, tan intepet to lamet imay tepet to, et kapag ontepet namparay iyebat dad sikato.

³¹ Nadngel na pigaran totoo so imbaga nen David insan da imbagad kinen Saul. Impatawag nen Saul si David.

³² Inkuanen David ed kinen Saul, “Anggapoy nepeg ya ontakot ed saman a Filisteo! Onla ak tan labanan ko.”

³³ “Andi,” ebat nen Saul. “Panoy pilaban mod sikato? Ogaw ka ni, tan sikato et sondalo lan nanlapud ogaw ni!”

³⁴ Inkuanen David, “Aasikasoen ko ray karniro nen amak. No walay lion o uson manegkem ed sakey a kordiro,

³⁵ osilan kon dogpaan, tan alaen ko may karnirod sangi to. No say lion o uso et poliktaran to ak a labanan, singkaten kod beklew tan pekpeken ko ya anggad ompatey.

³⁶ Akapatey ak la na saray lion tan saray uso, tan pateyen ko met iman a Filisteo a manasagyat a milaban iray sondalo na mabilay a Dios.

³⁷ Say Katawan inyagel to ak ed saray lion tan saray uso; iyagel to ak met ed saman a Filisteo.” Inmebat si Saul, “Sigi, laka, tan say Katawan wala komud sika.”

³⁸ Impaisolung tod David iray dilin armas to; say gansan hilmit ya insolung tod olo nen David, tan say kawes a para bakal.

³⁹ Imbalkes tod tapew na kawes ton para bakal so ispada nen Saul tan sinali toy onakar, balet ag to nayarian, ta ag to ra pasal ya isolung. Inkuantod kinen Saul, “Ag ak makapilaban no walad siak ira ya. Ag ko ra pasal.” Kanyan inekal to ran amin.

⁴⁰ Inala toy baston to, tan anokdok ed kolus na malinggas a limaran bato tan inyan to rad supot to. Akaparaan so bansut ton onabet ed kinen Goliat.

Tinalo nen David si Goliat

⁴¹ Inmakar ya onabet ed kinen David imay Filisteo, tan walad onaan to may managawit na samper ton balatyang. Manasingger,

⁴² et nen anengneng to lan maung si David, binalaw to, ta sakey labat a balolakin maung so alagey to tan guapo.

⁴³ Inkuantod kinen David, “Antoy gawaen mod satay baston? Abaloan mo sirin ya aso ak?” Kinerew to ya isamba na saray dios to si David.

⁴⁴ Inkuantod kinen David, “Gala dia, ta ipakan kod saray manok tan saray ayayep so bangkay mo.”

⁴⁵ Inmebat si David, “Onla kan milaban ed siak a sankaawit moy ispada, doyuk, tan pika, balet onla ak ed sikan milaban diad ngaran na Katawan a Makapanyarin-amin, say Dios na saray sondalon Israelita a sinagyat mon milaban.

⁴⁶ Diad sayan agew say Katawan iyawat to kad limak; taloen ta ka tan potuten koy olom. Saray bangkay da ray sondalon Filisteo et ipakan kod saray manok tan saray ayayep. Naamtaan ed satan na intiron mundo a say Israel et walay Dios to,

⁴⁷ tan nanengneng na amin da ray wadya ya ag to nakaukolay ispada o pika diad pangyagel tod saray totoo to. Sikatoy mananalo ed bakal, tan ipasilong to kayod pakayari mi.”

⁴⁸ Kinmurang lamet si Goliat ya onabet ed kinen David, et masiglat ya amaarap si David ed kawalaay dasig da ray Filisteo ta labanan toy Goliat.

⁴⁹ Kinaut toy supot to tan angalay sakey a bato, insan to imbansut ed kinen Goliat. Nakna tod moling, nabtag so lapis-lapis na olo to, tan atumban tikleb ed dalin.

⁵⁰ Kanyan, anggan anggapoy nikanan ispada, tinalo nen David si Goliat, tan pinatey to ed panamegley na bansut tan sakey a bato!

⁵¹ Binatik to, nanalagey ed abay to, inoyus toy ispada nen Goliat, tan pinatey to, insan to pinotutay olo. Nen anengneng na saray Filisteo ya inatey so palbayani ra, kibatiktik ira.

⁵² Inoosilan ira na saray totoo ed Israel tan Juda; naneeyag ira tan inoosilan da ra ya anggad Gat tan saray puirta ed Ecron. Saray Filisteo kibalatar iran sugatan ed dalan a mamaarap ed Saaraim ya anggad Gat tan Ecron.

⁵³ Nen amawil iray Israelita, kayari ran inoosilan iray Filisteo, inaala ray antokaman a walad kampo ra.

⁵⁴ Inala nen David so olo nen Goliat tan inawit tod Jerusalem, balet insinop tod tulda to ray armas nen Goliat.

Niarap si David ed kinen Saul

⁵⁵ Nen si Saul et anengneng toy David ya onlan milaban ed kinen Goliat, tinepet tod kinen Abner a pangulo na saray sondalo to, “Siopa man a balolaki?” “Ag ko amta, O ari,” ebat nen Abner.

⁵⁶ “Laka sirin, ta tepet mo,” inkuanen Saul.

⁵⁷ Kanyan nen pinmawil si David ed kampo, kayari ton pinatey si Goliat, inawit nen Abner ed kinen Saul. Sankaawit ni nen David so olo nen Goliat.

⁵⁸ Tinepet nen Saul, “Balolaki, siopay akan-anak ed sika?”