1 Samuel 16 - Maung A Balita Biblia

Alanaan ya Ari si David

¹ Inkuan na Katawan ed kinen Samuel, “Kaonungay kabayag so panermen mo lapud kinen Saul? Impolisay ko lan ari na Israel. Mangala kay larak na oliba tan lakad lakin say ngaran to et Jesse, a walad Betlehem, ta pinilik ya ari so sakey ed saray anak ton lalaki.”

² “Panoy panggawak ed satan?” tepet nen Samuel. “No narengelan nen Saul, pateyen to ak!” Inmebat so Katawan, “Mangawit kay kilaw a baka tan ibagam a wadman kan mangibagat ed Katawan.

³ Imbitaan moy Jesse ed bagat, tan ibagak ed sikay gawaen mo. Lanaan mon manari so lakin ibagak ed sika.”

⁴ Ginawa nen Samuel so imbaga na Katawan a gawaen to. Linmad Betlehem, a diman inabet na saray manggiwgiw a panguloy siudad tan tinepet da, “Mangiter kasiy kareenan yan imbisitam, managparles?”

⁵ “On,” ebat to. “Linma ak dian mangibagat ed Katawan. Linisan yoy sikayon dili tan mila kayod siak.” Impanpalinis to ra di Jesse tan saray anak ton lalaki, tan inimbitaan to rad bagat.

⁶ Kasabi ra, anengneng nen Samuel si Eliab a lakin anak nen Jesse tan kuantod sikaton dili, “Sayan lakin manalalagey ed arap na Katawan et andi-duaruwan sikatoy pinili ton manari.”

⁷ Balet inkuan na Katawan ed sikato, “Ag mo iimanoen no panoy kinabaleg tan kinaguapo to. Impolisay ko, ta say panagpilik aliwan singa panagpili na too. Say too say walad paway so nenengnengen to, balet say puso so nenengnengen ko.”

⁸ Insan tinawag nen Jesse si anak ton Abinadab tan inyakar tod kinen Samuel. Balet inkuanen Samuel, “Andi, say Katawan ag to met ya pinili.”

⁹ Insan inyakar nen Jesse si Samma. “Andi, say Katawan ag to met ya pinili,” kuanen Samuel.

¹⁰ Onyay impangyakar nen Jesse ed saray pitoran anak ton lalakin diad kinen Samuel. Inkuanen Samuel ed sikato, “Andi, say Katawan anggapoy pinili tod saraya.”

¹¹ Insan to tinepet, “Wala ni ray anak mon lalaki?” Inmebat si Jesse, “Wala ni, say sankayogtanan, balet andi dia ta aasikasoen to ray karniro.” “Paonlam dia,” kuanen Samuel. “Ag itayo mangibagat, no ag ni sinmabi.”

¹² Kanyan nampabakian nen Jesse. Guapon laki, maung a laman, tan manimimis so mata to. Inkuan na Katawan ed kinen Samuel, “Sikato ya—lanaan mo!”

¹³ Inala nen Samuel so larak na oliba tan nilanaan toy David diad arap da ray agagi to. Linmoob a tampol ed kinen David so ispiritu na Katawan tan walad sikato manlapud saman ya agew. Insan amawil lad Rama si Samuel.

Si David diad Ayaman nen Saul

¹⁴ Tinaynan na ispiritu na Katawan si Saul, tan pinairap na sakey a ispiritun maoges ya imbakiy Katawan.

¹⁵ Inkuan ed sikato na saray managlingkur to, “Amta min papairapen kay sakey ya ispiritun maoges ya imbakiy Dios.

¹⁶ Iganggan mo kami et mananap kamiy sakey a lakin amta toy manogtog na arpa. No onloob ed sika so ispiritun maoges, say laki manogtog na arpa et diad satan onmaung kayo lamet.”

¹⁷ Ingganggan ira nen Saul, “Iyanapan yo ak sirin na lakin maung a manogtog tan iyakar yo dia.”

¹⁸ Inkuan na sakey ed saray managlingkur to, “Si Jesse a taga Betlehem et walay anak ton laki a maung a manogtog. Masebeg met tan guapon laki, maung a sondalo, tan maung a manalita. Walad sikato so Katawan.”

¹⁹ Angibaki sirin ed kinen Jesse si Saul tan impaikuanto, “Ibakim ed siak si David ya anak mon managasikasoy karniro.”

²⁰ Si Jesse imbaki toy David ed kinen Saul tan impanawit toy katat a pananginan a napnoy alak, sakey a malangwer a kanding, tan sakey ya asno a napnoy tinapay so beneg to.

²¹ Linmay David ed kinen Saul tan nilingkuran to. Labalabay nen Saul tan pinili ton umaawit na saray armas to.

²² Insan si Saul impaikuan tod kinen Jesse, “Labay koy David. Iyabuloy mon manayam la dian manlingkur.”

²³ Nanlapud saman, kapag say ispiritun maoges ya imbaki na Dios et onloob ed kinen Saul, alaen nen David so arpa to tan manogtog. Ontaynan ed satan so ispiritun maoges, tan onmaung si Saul et ompawil so gendat a liknaan to.