1 Samuel 12 - Maung A Balita Biblia

Say Paliwawa nen Samuel

¹ Insan inkuanen Samuel ed saray totood Israel, “Ginawak lay labay yon gawaen ko. Initdan ta ki lay arin manoley ed sikayo,

² tan natan sikato lay mangiwanwan ed sikayo. Para say siak, masiken ak la tan ampoti lay buek ko, kanyan saray anak ko lay kaiba yo. Siak so pangulo yo nanlapud lad balolaki ak ya anggad natan.

³ Nia ak natan ya akatalindeg ed arap yo. No walay ginawak a makapoy, akusa yo ak natan ed arap na Katawan tan diad arap na pinili ton ari. Walay inalak a bakan kayaryan na arum o asnon kayaryan na arum? Sinaol o pinairap koy siopaman? Angawat ak na pasoksok ed siopaman, kanyan nambulag-bulagan ak? No walay ginawak ed saraya, ipawil koy inalak.”

⁴ Inmebat iray totoo, “Ag mo kami sinaol o pinairap; anggapoy antokaman ya inalam ed sikami.”

⁵ Inmebat si Samuel, “Say Katawan tan say pinili ton ari, sikaray tasik ed sayan agew ya anggapoy nalmoan yon kasalanan ko.” “On, say Katawan so tasi mi,” ebat da.

⁶ Intuloy nen Samuel so nansalita, “Say Katawan so amili ed kinen Moises tan si Aaron tan sikatoy angipaway ed Egipto ed saray lalaki yo.

⁷ Alagey kayo natan ed kawalaan yo, tan akusaen ta kayod arap na Katawan. Ipanunot kod sikayoy amin a pakelaw a ginagaway Katawan diad impangilaban tod sikayo tan saray lalaki yo.

⁸ Nen linmad Egipto si Jacob tan say pamilya to, pinapairap iray tagad man. Kinmerew na tulong iray lalaki yo. Imbaki na Katawan ed satan ira di Moises tan Aaron, a sikaray angipangulo ed intaynan dad Egipto tan angiter na panayaman da ed sayan dalin.

⁹ Balet impolisay na saray lalaki yo so Katawan a Dios da. Kanyan inabuloyan na Katawan a taloen ira na saray Filisteo, tan say ari na Moab, tan si Sisera, say pangulo da ray sondalo na siudad na Hazor.

¹⁰ Insan kinmerew iray tulong ed Katawan tan kuanda, ‘Nankasalanan kami, ta impolisay mi ka, Katawan, tan nanlingkur kamid saray talintaoy diriyos di Baal tan Astarot. Iyagel mo kami pad saray kalaban mi, et panlingkuran mi ka!’

¹¹ Imbaki na Katawan si Gideon, insan si Barak, insan si Jefte, insan siak. Balang sakey ed sikami inyagel mi kayod saray kalaban yo, tan niarawi kayod kaatapan.

¹² Balet nen ngalngali kayo la labanan nen Nahas ya ari ed Ammon, impolisay yon ari yo so Katawan tan kuanyod siak, ‘Labay miy sakey ya arin manoley ed sikami.’”

¹³ “Nia natan so arin pinili yo; kinerew yo, et natan inter lad sikayo na Katawan.

¹⁴ Maung so kipapasen yo no takotan yoy Katawan a Dios yo, panlingkuran yo, dengelen yo, tan onuren yo ray ganggan to, tan no sikayo tan say ari yo et tumboken yo.

¹⁵ Balet no ag yo dengelen so Katawan no ag ingen sumlangen yo ray ganggan to, sumpaen to kayo tan say ari yo.

¹⁶ Kanyan sirin, manalagey kayod kawalaan yo, et nanengneng yoy bengatlan makapakelaw a gawaen na Katawan.

¹⁷ Tiagew ed natan, anto? Balet mampikasi ak, et say Katawan pakarulen tan paoranen to. No nagawa ya, nabirbir yon nanggawa kayoy baleg a kasalanan ed Katawan nen kinmerew kayod sikato na sakey ya ari.”

¹⁸ Kanyan nampikasiy Samuel, tan diad saman ya agew pinakarul tan pinaoran na Katawan. Insan tinmakot ed Katawan tan diad kinen Samuel, iray totoo tan

¹⁹ inkuandad kinen Samuel, “Ipikasi mo kami pad Katawan a Dios mo, pian ag kami ompatey. Abirbir mi la natan, a likud ed saray arum a kasalanan nankasalanan kamid impankerew miy sakey ya ari.”

²⁰ “Ag kayo natatakot,” ebat nen Samuel. “Anggaman a ginawa yo yan kaogsan, ag yo komun ipopolisay so Katawan, no ag ingen panlingkuran yod intiron puso yo.

²¹ Ag kayo manlilingkur ed saray tila-tilan diriyos; ag da kayo natulongan odino nilaban, ta aliwa ran peteg a Dios.

²² Sinambaan na Katawan ya ag to kayo ikaindan, ta ginetma to lan pagmaliwen kayo a totoo to.

²³ Para say siak, ag komun iyabuloy na Katawan a mankasalanan ak diad pangitondak na pangipikasik ed sikayo. Ingen, ibangat kod sikayo no anto ray maung tan maptek a gawaen yo.

²⁴ Takotan yoy Katawan, tan matoor so panlingkur yod sikato diad intiron puso yo. Ag yo lilingwanan iray makapakelaw a ginagawa ton para sikayo.

²⁵ Balet no itoluy yoy mankasalanan, napatey kayo tan say ari yo.”