1 Samuel 10 - Maung A Balita Biblia

¹ Insan angalay Samuel na sakey a botilyan larak na oliba tan inkalbo tod olo nen Saul, inanguban to, tan kuanto, “Say Katawan lalanaan to kan manoley ed saray totoo ton Israelita. Oleyan mo ray totoo to tan iyagel mo rad saray kalaban da. Saya so pakapatnagan mo a pinili say Katawan a manoley ed saray totoo to.

² No taynan mo ak ed sayan agew, nasabat moy duaran lalaki diad abay na lobuk nen Raquel diad Selsa, diad pasen a sakop nen Benjamin. Ibaga rad sika a nalmo la ra may asno ya aanapen mo, kanyan ag la ra pampapagaan nen amam no ag ingen sika natan so pampapagaan to. Pitepet to, ‘Anto kasiy gawaen kon nipaakar ed samay anak ko?’

³ Ituloy moy kurang mo ya anggad pakasabim ed masanton kiew diad Tabor, a dimay pakaabetan mod taloran lalaki ya onlad Betel a diman ira mangisaklang na bagat ed Dios. Igagayugoy na sakey ed sikara so taloran kanding, sankaawit na sakey so taloran tinapay, tan sankaawit na kumatlo so katat a pananginan a napnoy alak.

⁴ Ilugay da ka tan itdan da kay duaran tinapay; awat mo ra.

⁵ Insan ka onla ed Pokdul na Dios diad Gabaa a kawalaay sakey a kampo da ray Filisteo. Kaloob mod baley, naabet moy sakey ya olup na saray propita ya onleleksab iran nanlapu ed altar a walad toktok na pokdul. Manotogtog ira na saray arpa, tambul, plauta, tan saray saltirio. Mansayaw-sayaw tan maneeyag-eyag ira.

⁶ Biglad satan ya onloob ed sika so ispiritu na Katawan; mikasakey kan manggawa na gagawaen da, tan magmaliw kan doma a too.

⁷ No nagawa ra ya, gawam so antokaman a pagawad sika na Dios.

⁸ Onaan mo ak ya onlad Gilgal, a diman ta ka banaen tan mangisaklang ak na saray bagat a popoolan tan saray bagat a para kareenan. Manalagar kad man na pitoy agew ya anggad isabik tan ibagak ed sika ray gawaen mo.”

⁹ Nen si Saul et tinaynan toy Samuel, say Dios initdan toy Saul na balon inkatoo. Amin ya imbagad sikato nen Samuel agawa ed saman ya agew.

¹⁰ Nen akasabid Gabaa si Saul tan samay aripen to, sakey ya olup na propita so angabet ed kinen Saul. Biglan linmoob ed sikatoy ispiritu na Dios, tan akikasakey ed gagawaen da.

¹¹ Saray totoon makaamtad sikato nen saman nantetepetan ira, “Antoy agawad anak nen Cis? Nagmaliw ta lan sakey a propita si Saul?”

¹² Tinepet na sakey a lakin tagad man, “Saratay arum ey—propita ta ray kaamaan da?” Onyay inggapo na sayan balikas, “Nagmaliw ta met lan sakey a propita si Saul?”

¹³ Nen ayari lay Saul ed ginawa to, linmad pokdul.

¹⁴ Say pangamaen nen Saul anengneng toy Saul tan samay aripen to, tan tinepet tod sikara, “Nanlapwan yo?” “Anapen mi ray asno,” ebat nen Saul. “Nen ag mi ra narumog, linma kamid kinen Samuel.”

¹⁵ “Antoy imbaga tod sikayo?” tepet na pangamaen to.

¹⁶ “Imbaga tod sikami a nalmo la ray asno,” ebat nen Saul—balet ag to imbagad kinen pangamaen to so imbaga nen Samuel nipaakar ed pagmaliw ton ari.

Nibawag ya Ari si Saul

¹⁷ Impantitipon nen Samuel ed Mizpa iray totoo, diad ngaray Katawan,

¹⁸ tan inkuantod sikara, “Say Katawan, say Dios na Israel, kuanto, ‘Siak so angipaway ed sikayo ed Egipto, tan angyagel ed sikayod saray Egipsio tan diad saray arum a totoon nampapairap ed sikayo.

¹⁹ Sikatoy Dios yo, say angyagel ed sikayod amin a gunigon tan kairapan yo, balet natan impolisay yo ak tan kinmerew kayo na sakey ya ari. Sigi sirin, mantitipon kayod arap na Katawan, onung ed tribu tan onung ed boleg.’”

²⁰ Pinarago nen Samuel so balang tribu, tan say Katawan pinili toy tribu nen Benjamin.

²¹ Insan lamet pinarago nen Samuel iray pamilyad tribu nen Benjamin, et say pamilya nen Matri so apili. Insan dinmago ray lalakid pamilya nen Matri et si Saul ya anak nen Cis so apili. Inanap da, baleg nen ag da narumog,

²² tinepet dad Katawan, “Wala niy arum?” Inmebat so Katawan, “Wadmay Saul, onaamut ed kawalaay abasto.”

²³ Kanyan batik ira tan inawit day Saul ed kawalaan da ray totoo, tan anengneng da ya atagey ni na sakey dangan nen say sikaran amin.

²⁴ Inkuanen Samuel ed saray totoo, “Nia so toon pinili na Katawan! Anggapoy mipara ed sikato.” Inmeyag iray amin a totoo, “Andokey komuy bilay na ari!”

²⁵ Impaliwawa nen Samuel ed saray totoo iray kanepegan tan saray kimey na sakey ya ari, insulat to rad sakey a libro, tan insinup to ed sakey a masanton pasen. Insan to la pinasempet iray totoo ed kaabungan da.

²⁶ Pinmawil met lay Saul ed abung to diad Gabaa. Wala ray akilad sikato a pigaran makapanyarin lalaki a tinenyeg na Dios so puso ra.

²⁷ Balet wala ray pigaran andi-kakanaan a totoo ya inkuanda, “Panon to itayon niyagel yan too?” Binalaw day Saul tan ag da initdan na antokaman.