1 Samuel 1 - Maung A Balita Biblia

Si Elcana tan say Pamilya to ed Silo

¹ Walay sakey a lakin manngaray Elcana, a taga baley na Rama diad nipokdul a dalin na Efraim. Kabyangay tribu nen Efraim, anak nen Jeroham tan apo nen Eliu, a kabyangay pamilya nen Tohu, a kabyangay boleg nen Zuf.

² Si Elcana duaray asawa to, si Ana tan si Penina. Si Penina wala ray anak to, balet si Ana anggapo.

³ Tinaon ya ontataynan ed Rama si Elcana, ta onlad Silo a mangigalang tan mangibagat ed Katawan a Makapanyarin-amin. Diad Silo manaayam irad man di Ofni tan Finees ya anak nen Eli, ta papari ra na Katawan.

⁴ Kapag mangibagat si Elcana, sakey a betang so iter tod kinen Penina tan sansasakey a betang ed saray anak to.

⁵ Anggaman ya inararo ton maung si Ana sakey labat a betang so iter tod sikato, lapud say Katawan et ag to abuloyan a mananak.

⁶ Sotil-sotilen tan pabpaabebaen nen Penina a kalaban to diad sayan ag impangyabuloy na Katawan ed sikato ya ag mananak.

⁷ Tinaon yan nagagawa; kapag onla rad abung na Katawan sotil-sotilen nen Penina, kanyan onakis si Ana tan ag balut mangan.

⁸ Tepeten ed satan nen Elcana ya asawa to, “Ana, akin et onaakis ka? Akin et ag ka mangan? Ag ka la kari maneermen. Ag mo ak ta pinabli nen saray samploran anak a lalaki?”

Si Ana tan si Eli

^9-10 Aminsan diad Silo, kayari ran angan ed loob na abung na Katawan, inmalagey si Ana. Maerermen si Ana tan mannangnangis na ampaipait legan ton mampipikasid Katawan. Diad sayan bekta manyodyurong ed abay na puirta si Eli a pari.

¹¹ Si Ana nanggaway sipan a sinambaan to: “Katawan a Makapanyarin-amin, no imanoen mo ak ya aripen mon pangaskasiyan, no nonuten mo ak, ag mo ak lingwanan, tan itdan mo ak na anak a laki, isaklang kod sika legan a mabilay tan ag kon balut pakatlian.”

¹² Abaybayag a nampikasi tan inimano nen Eli so bibil to.

¹³ Marereen a mampipikasi; manggalaw so bibil to, balet anggapoy narengel a bosis to. Kanyan abaloan nen Eli ya abuek.

¹⁴ Inkuantod sikato, “Dakel amoy nainom mo? Mampamawmaw ka ni!”

¹⁵ Inmebat, “Aliwak ak pan abuek. Ag ak inminom na alak no ag ingen maermen ak a maung. Mampipikasi ak tan ibabagak ed Katawan iray gunigon ko.

¹⁶ Ag yo ak komun ipapasen ya andi-kakanaan a bii. Onyay pampipikasik ta maermen ak a maung tan pangakasiyan ak.”

¹⁷ Inkuanen Eli, “Laka lan mareen so kalakal mo. Iter komun na Dios na Israel so kinerew mod sikato.”

¹⁸ “Maabig lawas komun so linawa yod siak,” ebat nen Ana. Tinmaynan la, angan, tan nakal lay ermen to.

Say Inkianak nen Samuel tan say Impangisaklang ed Sikato

¹⁹ Kaimbuas binmangon a masakbay si Elcana tan say pamilya to, inggalang day Katawan, insan ira amawil ed Rama. Inakdulan nen Elcana si asawa ton Ana et inebatan na Katawan so pikakasi nen Ana.

²⁰ Nanlokun sirin tan nananak na sakey a laki. Inngaran to na Samuel, ta inkuanto, “Kinerew ko ed Katawan.”

²¹ Sinmabi lamet so panaon ya iyakar ed Silo nen Elcana tan say pamilya to a mangisaklang na tinaon a bagat tan say nidoma-doman bagat ya insipan to.

²² Balet ag akila natan si Ana. Inkuantod kinen asawa to, “No apakso lay ogaw, sikato lay pangawit kod abung na Katawan, tan diman lay panayaman to legan a mabilay.”

²³ Inkuanen Elcana, “Gawam so isisipen mon sankaabigan. Tilak ka dia sirin ed abung anggad napaksom. Tulongan ka komun na Katawan ed panumpal mod sipan mo.” Nanayam sirin ed abung si Ana tan inasikaso toy anak to.

²⁴ Nen apakso to lay ogaw, inyakar tod Silo. Nanawit na taloy taon a bakan kalakyan, sakey salup ya arina, tan sakey a pananginan a katat a napnoy alak. Ogaw ni sirin si Samuel nen inawit nen ina to ed abung na Katawan diad Silo.

²⁵ Kayari ran pinatey imay bakan kalakyan, inyakar da may ogaw ed kinen Eli.

²⁶ Inkuanen Ana ed kinen Eli, “Nabirbir yo ak ni? Siak imay biin anengneng yon manalalagey dian mampipikasi ed Katawan.

²⁷ Inebatan na Katawan so pikakasik tan sayan ogaw so inter tod siak.

²⁸ Kanyan isaklang ko natan ed Katawan. Legan a mabilay, kayaryay Katawan.” Insan da inggalang diman so Katawan.