1 CORINTO 1 - Maung A Balita Biblia

¹ Sayan sulat nanlapud kinen Pablo, ya atawag a magmaliw ya apostol nen Cristo Jesus onung ed linaway Dios, tan nanlapud agi tayon si Sostenes—

² Diad iglisia na Dios a walad Corinto, diad amin da ray tinawag na Dios a magmaliw a masanton totoo to, diad panamegley na pikakasakey ed Cristo Jesus, ontan met a diad saray amin a totood inerman a pasen, saray ontatawag ed ngaran na Katawan dan Jesu-Cristo a Katawan tayo met:

³ Itdan kayo komun na Dios ya Ama tayo tan say Katawan tayon Jesu-Cristo na bindision tan kareenan.

Saray Bindision na Dios diad Panamegley nen Cristo

⁴ Misasalamat ak lawas ed Dios para sikayo, lapud baleg a panangaron inter tod sikayo diad panamegley nen Cristo Jesus.

⁵ Ta diad pikakasakey yod Cristo nagmaliw kayon mayaman ed amin a bengatla, anggan diad amin a panagsalita tan amin a karunongan.

⁶ Saray bangat a nipaakar ed Cristo et kinmetket la rad sikayo,

⁷ kanyan amin a bindision aawaten yo, legan ya aalagden yon ompanengneng so Katawan tin Jesu-Cristo.

⁸ Antabayen kayoy Dios anggad kaonuran, pian anggapoy pakadusaan yo no Agew na Katawan tin Jesu-Cristo.

⁹ Matoor so Dios, say Dios ya anawag ed impikasakey yod Anak ton Jesu-Cristo a Katawan tayo.

Naapag-apag so Iglisia

¹⁰ Agagi, sisimbawaen ta kayo diad panamegley na ngaran na Katawan tin Jesu-Cristo: mankakasakey kayod amin a salitaen yo, pian ag kayo naapag-apag. Ayadyari komuy pankakasakey yo diad kanunotan tan getma.

¹¹ Ta, agagik, imbalitad siak na saray totoo nen Cloe a wala rad sikayoy mankokolkol.

¹² Say labay kon ibaga, say pandoromaay ibabaga yo. Kuay sakey, “Si Pablo so kaibak”; kuay sananey, “Si Apolos so kaibak”; kuay sakey, “Si Cefas so kaibak”; kuay sananey, “Si Cristo so kaibak.”

¹³ Naapag-apag sirin si Cristo? Si Pablo siriy nipasak ed krus para sikayo? Abinyagan kayo sirin ed ngaran nen Pablo?

¹⁴ Misalamat ak ed Dios, ta si Crispo tan si Gayo labat so bininyagan kod sikayo.

¹⁵ Kanyan anggapoy makapangibagad sikayo a bininyagan kayod ngaran ko.

¹⁶ (Anunotan ko, bininyagan ko met manayay Estefanas tan say pamilya to. Likud ed sikara, anggapo lay arum a nanunotan kon bininyagan ko.)

¹⁷ Ta si Cristo ag to ak imbaki a maminyag, no ag ingen mangipulong, na Maung a Balita. Mampupulong ak, aliwan diad panamegley na panagsalitan manlapud kakabatan na sankamundoan, pian ag naekalay pakayari so impatey nen Cristo ed krus.

Si Cristo so Pakayari tan Kakabatan na Dios

¹⁸ Ta diad saray nababalang, anggapoy kabaliksan na balitan nipaakar ed impatey nen Cristo ed krus; balet diad sikatayon nilalaban, sikatoy pakayari na Dios.

¹⁹ Ta ibabagay Masanton Sulat, “Deralen koy kakabatan da ray makabat, pagmaliwen kon andi-kakanaan so pakatalus da ray marunong.”

²⁰ No ontan sirin, antoy kana da ray makabat? Odino saray iskriba? Odino saray maung a dibatista ed sayan mundo? Ag ta impagmaliw na Dios ya anggapoy kabaliksan so kakabatan na sankamundoan?

²¹ Ta lapud kakabatay Dios, ag to inyabuloy a sikatoy nakabatay too diad panamegley na kakabatan na sankamundoan. Ingen nilabay ton ilaban iray totoon manisia diad panamegley na ipupulong min Maung a Balita ya ipapasen ya andi-kakanaan na sankamundoan.

²² Saray Judio pilalek da ray milagro a pamaneknek, tan saray Grigo aanapen da so kakabatan.

²³ Balet no nipaakar ed sikami, ipupulong miy Cristo a nipasak ed krus, sakey a bangat a diad saray Judio et pakatumbaan tan diad saray Hintil et anggapoy kabaliksan.

²⁴ Balet diad saray tinawag na Dios, Judio o Grigo man ira, si Cristo so pakayari tan kakabatan na Dios.

²⁵ Ta say singa kakulang-kulangan na Dios et makabat nen say kakabatay too, tan say singa kakapoyay Dios et mabiskeg nen say biskeg na too.

²⁶ Agagi, nunot yo pay kipapasen yo nen tawagen kayoy Dios. Pigpigarad sikayoy makabat, o makapanyari, o bibirbiren ed baley, onung ed panangipasey too.

²⁷ Balet pinili na Dios so ipapasen ya andi-kakanaan na sankamundoan, pian napabaingan to ray makabat a totoo, tan pinili to so ipapasen a makapoy na sankamundoan, pian napabaingan to ray mabiskeg.

²⁸ Pinili na Dios so pabpaabebaen, balbalawen, tan ibanbantak na sankamundoan, pian naderal to ray pinabpabli na sankamundoan.

²⁹ Kanyan anggapoy toon makapampasirayew ed arap na Dios.

³⁰ Balet say Dios impikasakey to itayod Cristo Jesus tan ginawa to a kakabatan tayo. Diad panamegley nen Cristo, apirdona ray kasalanan tayo ed arap na Dios, nagmaliw itayon masanton totooy Dios, tan arondon itayo la.

³¹ Kanyan sirin, onung na ibabagay Masanton Sulat, “Siopamay mampasirayew, saray ginagaway Katawan so nepeg ton ipasirayew.”