Solomon 1 - Manobo Western Bukidnon OT

¹ Is utew meupiya he kentahan ni Solomon.

Bahi

² Diǥua a kenikew te menge hazek nu, su is kebmahal nu edhuna pa he meemis te vinu.

³ Mehemut utew is menge pehemut nu, ne utew meupiya is ngazan nu. Umbe, kenà igkeinuinu is kegkesuati kenikew te menge raǥa.

⁴ Dumaha a kenikew ne egaangaan ki egenat. Iyan ka hadì ku, ne uwita a ziyà te ruǥu nu. Utew zey sikew igkelipey! Edhuna is kegkesuati zey te kebmahal nu kenà te vinu. Ereg iyan he egkesuatan ke zan!

Menge Bahi ziyà te Jerusalem Bahi

⁵ Menge vahi ziyà te Jerusalem, meitem a iring te tulda ziyà te Kedar, piru mekempet a iring te menge kurtina ziyà te turuǥan ni Solomon.

⁶ Kenè niw idemdemerì is keitem ku tenged te subra he kegkekagkag. Nepeukan a te menge suled ku he menge maama, ne impeterebahu e zan diyà te pemuleey te paras. Umbe wazè ku en timpu te ked-atur te keugelingen ku.

⁷ Tezemi a kenikew, pelanggè ku, ke hendei nu ibpepenabtab is menge kerehidu nu? Ne hendei nu sikandan ibpehimeley emun meudtu? Tezemi a kenikew su wey ku sikew kenè en mepengahà diyà te menge emiǥu nu he ebpemepenabtab daan te menge kerehidu. Su kela ke kunaan dan ke vahi a he ebelegyà te dengeg din.

Maama

⁸ Emun wazè nu metueni, te utew mekempet he vahi, ikula nu is imbayà te menge kerehidu ku pehendiyà te menge tulda te menge vantey te menge kerehidu, ne zutun nu ipepenabtab is menge kambing nu.

⁹ He pelanggè ku, iring ka te behiyan he kudà he nesuatan te meemahan he kudà he eguyud te kerwahi te hadì te Ehipto.

¹⁰ Utew mekempet is dagwey nu he mid-iseg mebmekempet tenged te menge eritis nu. Mekempet is lieg nu he mibelieǥan.

¹¹ Ebeelan dey sikew te eritis he vulawan he edsehuǥan te pelata.

Bahi

¹² Ebpimpinuu is hadì diyà te pinuuwè din, ne ebmeǥuymuyan is pehemut ku.

¹³ Is minahal ku mehemut iring te veyewà dutun te ed-ulun sikandin diyà te kumeng ku.

¹⁴ Iring sikandin te rupung te vulak he hina, he nemekar ziyà te menge pemuleey te paras diyà te En Gedi.

Maama

¹⁵ Utew ka mekempet is pelanggè ku. Mekempet he ed-ahaan is menge mata nu, iring te menge mata te merepatik.

Bahi

¹⁶ Utew ka iyan mekempet, pelanggè ku. Mekewiwili ka zutun te kedhidhizeǥè ta ziyà te meilem he menge sagbet,

¹⁷ he egkelembungan te menge kayu he sidru wey sipris.