Salmo 8 - Manobo Western Bukidnon OT

Is Kegkemekeǥeǥehem te Megbevayà Egkaahà kayi te Tivuuk he Kelibutan

¹ He Nengazen he iyan Egalen dey, is kegkemekeǥeǥehem nu egkaahà kayi te tivuuk he kelibutan! Egkezineg nu ziyan te langit is kedeliǥa te menge etew kenikew.

² Minsan is dezeisey pa he menge vatà mibpenurù nu te kedalig kenikew, su wey mepeel-elezi is menge kuntada nu he ebpeninguhà he mekavales.

³ Emun edtengteng a ziyà te langit he mibeelan nu, ne egkeehè ku is bulan wey menge vituen he insavuk nu ziyà te nengesevukan dan,

⁴ ebpekeinsà a ziyà te ǥehinawa ku te hengkey ves is menusiyà, maan is utew nu edseǥipaa? Menusiyè dà sikandin, piru maan is utew nu igkeseeng?

⁵ Midhimu nu sikandin he minus pa is gehem din, kenà haazà is menge velinsuǥuen nu, piru imbeǥey nu kandin is dengeg, in-iring nu sikandin te hadì.

⁶ Midhimu nu sikandin he iyan edumala te menge linimbag nu; ne mibpeveyveyaan nu kandin is langun,

⁷ ragkes en kayi is langun he menge langgam wey menge keranapranap: sikan is ebpenhipanew,

⁸ sikan is ebpemenlayang, wey sikan is diyà ebpen-ubpà te wahig.

⁹ He Nengazen he iyan Egalen dey, is kegkemekeǥeǥehem nu egkaahà kayi te tivuuk he kelibutan!