Salmo 61 - Manobo Western Bukidnon OT

Ampù para te Kebpelavan te Megbevayà

¹ He Megbevayà, pemineǥa nu is ked-umew ku, pemineǥa nu is ked-ampù ku.

² Puun dini te meziyù he lugar ebpengumew a kenikew su neewaan ad te perateng. Uwita a kenikew ziyà te lugar he wazà duen ebpekekaid,

³ su iyan ka pengalang ku; iring ka te turi he iyan kenà ibpekeseled te menge kuntada ziyà te inged.

⁴ Ipeubpà a ziyà te valey nu te wazà pidtemanan. Ipaaput a ziyà te kenikew iring te kebpeeputa te tagbis te menge pispis din pinaaǥi te kedlekupi zin kandan.

⁵ Su nezineg nu, Megbevayè ku, is menge penaad ku kenikew, ne mibeǥayan a kenikew te menge vutang he ibeǥey nu ziyà te menge etew he edtahud kenikew.

⁶ Pekeluǥeyaza nu is untung te hadì ne ipahadì nu seled te wazà pidtemanan pinaaǥi te kegkehimu he hadì te menge kevuwazan din.

⁷ Berakat he medhadì sikandin te wazà pidtemanan he iyan ka eduma kandin, is Megbevayà. Levani nu sikandin tenged te ǥaǥew nu wey kebmetinumanen nu.

⁸ Ne zutun layun a egkanta te kedalig kenikew, ne layun ku edtumana is menge penaad ku kenikew.