Salmo 42 - Manobo Western Bukidnon OT

Is Suat te Sevaha he Etew he Mekeuvey ziyà te Etuvangan te Nengazen

¹ Is kebpenginahanglan ku kenikew te Megbevayè ku, iring te kebpenginahanglan te selazeng te wahig emun egkemezahan sikandin.

² Egkemezahan a kenikew he iyan uuyag he Megbevayà. Keenu e pa vuwa ebpekehendiyà te valey nu te ked-uvey ziyà te etuvangan nu?

³ Maandew wey mezukilem is kebpekesineǥew ku ne samè dà kenè ku meinum is luhè ku, ne zutun edtulung ed-insà is menge etew te, “Hendei en be is Megbevayè nu he edtavang kenikew?”

⁴ Kenà meupiya is isip ku emun egketenuzan ku he zutun te nehuna he timpu iyan a nengulu te mezakel he menge etew te kedhendiyà te valey nu. Ne edsilibra key zuma is ked-ugyab te kegkelipey wey kebpeselamat kenikew.

⁵ Piru kenà a ereg he egkeseeng wey egkeǥiyaǥiya. Ereg a he edsarig kenikew. Uya, ed-umanan ku sikew edeliǥa, is menluluwas wey Megbevayè ku.

^6-7 Utew a neseeng; is kegkeseeng ku iring te edeǥurus he seleg te evaǥa he ebpeketambun kediey. Umbe edtentenuzan ku sikew ǥuntaan te kayi a te tanà he uvey te Jordan wey Hermon, kayi te Buntud he Mizar.

⁸ Emun maandew ibpeehè nu is gaǥew nu Nengazen, umbe emun mezukilem en, egkanta a te ked-ampù diyà te kenikew te Megbevayà he mibeǥey kedì te untung ku.

⁹ He Megbevayà he endilungè ku, egkaǥi a ziyà te kenikew te, “Maan is edlipatan a kenikew? Maan is kinahanglan pa he egkeseeng a tenged te kedèdaaǥa kedì te menge kuntada ku?”

¹⁰ Henduen be te nerupet en is menge tulan ku tenged te kebpeel-elezi zan kedì. Egkeǥiyan e zan te, “Hendei en be is Megbevayè nu he edtavang kenikew?”

¹¹ Maan is egkeseeng a wey egkeǥiyaǥiya? Te ereg e man he edsarig kenikew, ne ed-umanan ku sikew edeliǥa is menluluwas ku he Megbevayè ku.