Salmo 41 - Manobo Western Bukidnon OT

Is Ampù te Etew he Nezeruwan

¹ Utew zeyzey is etew he edtevang te menge egkaayuayu. Su edtevangan sikandan te Nengazen emun timpu te kelised.

² Egkelesaǥan sikandin te Nengazen wey edtipiǥan is untung din. Edtuvazan sikandin te Nengazen kayi te tanà he Israel; kenà sikandin ibeǥey ziyà te menge kuntada zin.

³ Edtevangan sikandin te Nengazen ke egkezeruwan; ebewian din sikandin te egkeǥezam din.

⁴ Migkaǥi a te, “Nengazen, kehizuwi a kenikew. Bewii a, su edtug-an a he nekesalà a ziyà te kenikew.”

⁵ Mezaat is migkaǥi te menge kuntada ku mehitenged kedì. Ke sikandan te, “Deyzey ke ebpatey en sikandin su wey melipati en.”

⁶ Uvag kun edleuyen e zan, piru ebpen-ehè dan bes te mezaat he egketudtul zan mehitenged kediey. Ne emun diyè dan en te ǥawas ne ebpenudtulen dan haazà diyà te zuma.

⁷ Is langun he egkeepes kedì ne ebpenèneesà mehitenged kediey, ne ed-isip-isip dan te mezaat ke ebmenumenu zan para mezeeti a.

⁸ Ke sikandan te, “Utew en gerabi is daru zin, umbe kenè ne sikandin ebpekeenew.”

⁹ Minsan is emiǥu ku utew he egkeseriǥan ku he mibpekidtuǥen kedì te egkaan ne iyan midluib kedì.

¹⁰ Piru sikew, Nengazen, kehizuwi a kenikew; bewii a kenikew su wey a mekevales te menge kuntada ku.

¹¹ Ne egketuenan ku he nekepenunuat a kenikew, su kenè nu idtuǥut he mezaag a te menge kuntada ku.

¹² Tenged te wazà mezaat he vaal ku, ne idtuǥut nu he mekeubpà a zuma kenikew te wazà pidtemanan.

¹³ Edeliǥen is Nengazen he Megbevayà te Israel te wazà pidtemanan. Amen! Amen!