Salmo 4 - Manobo Western Bukidnon OT

Ampù te Kebpetavang

¹ Sikew is metazeng he Megbevayè ku, tevaka a kenikew zutun te ked-umawa ku kenikew. Hein nekebmerasey a zengan, midtevangan a kenikew. Umbe ǥuntaan, pemineǥa nu is menge kebpengemuyù ku wey kehizuwi a.

² Sikiyu is menge etew he egkuntada kediey, sengemenu keluǥayad is kebpeel-elezi niw kedì? Sengemenu keluǥayad is kebmahala niw te menge tuluuwen he wazè dan pulus wey kedsunud te ketetarù?

³ Tentenuzi niw he mibpilì te Nengazen is menge etew he edsunud kandin para mehimu he ǥaked din. Tenged kayi, ebpemineǥen e zin emun ebpengumew-umew a kandin.

⁴ Emun egkepauk kew, kinahanglan he kenè kew ebpekesalà tenged dutun. Ne emun edhizeǥè kew en diyà te menge hizeǥaan niw, pekelinawa niw is gehinawa niw ne purung kew ngunùngunù.

⁵ Sarig kew ziyà te Nengazen ne iyan niw layun ul-ulaha is kebpemuhat te hustu he menge pemuhat.

⁶ Mahabet is egkaǥi te, “Nengazen kehizuwi key; iyan ka metau he uzara key. Ipeehè nu is keupiya nu kenami!”

⁷ Piru lavew pa is kelipey he ibeǥey nu kediey; kenà is kelipey te menge etew he zekelà is keenen dan wey inumen dan.

⁸ Su iyan ka is Nengazen ed-ipat kedì, umbe kenà a egkehandek su wazà ebpekekaid kedì minsan dutun te timpu te kedlipezeng ku.