Salmo 27 - Manobo Western Bukidnon OT

Ked-ampù he Egkezumahan te Kedalig

¹ Is Nengazen iyan kerayag ku, menluluwas ku, wey eputè ku, umbe wazà ereg he igkahandek ku.

² Emun edsurungen a te lalung he menge kuntada ku su edhimetayan e zan, ne iyan dan egkezaag ne kenà a iyan.

³ Minsan edliǥuyan a te mahabet he menge sundaru, ne kenà a egkahandek. Minsan pa ke edsurungen e zan, edsarig a te Megbevayà.

⁴ Duen sevaha he mibuyù ku ziyà te Nengazen he utew ku en egkesuati he iyan is: kebpekeubpè ku ziyà te valey zin seled te tivuuk he untung ku, ne zutun egkepurung ku egkengunùngunù is keupiya zin, ne ebpekahangyù a ziyà te kandin he giyahi e zin.

⁵ Emun timpu te kesamuk id-eles e zin wey edhimu sikandin te paaǥi wey a kenà memenu zutun te valey zin. Diyè e zin ibpehulenà te lugar he kenà a zuen egkekeizan.

⁶ Umbe, egkezaag ku is menge kuntada ku he edliǥuy kediey. Ne ebpemuhat a zutun te valey te Nengazen duma is ked-uruhuy ku su utew a egkelipey. Ne egkentahan ku sikandin.

⁷ Pemineǥa a, Nengazen, ke ebpengum-umawen ku sikew; kehizuwi a ne iveǥey nu kedì is ebuyuen ku.

⁸ Neǥezam ku kayi te ǥehinawa ku he ibpezangep a kenikew ziyan te kenikew, umbe kenà duwazuwa is kedangep ku ziyan te kenikew, Nengazen.

⁹ Kenà a kenikew elesi! Kenà a kenikew iselikwey tenged te pauk nu kedì te suluǥuen nu. Iyan ka neketavang kedì, umbe kenà a pesegdana wey iselikwey, Megbevayà he menluluwas ku.

¹⁰ Minsan pa ke ed-engkezan a te amey ku wey iney ku, ed-eturen e zed gihapun kenikew, Nengazen.

¹¹ Impenurù nu kedì is kenikew he menge paaǥi. Ne ziyà a kenikew ipeikul te hustu he zalan, su zuen ku menge kuntada.

¹² Kenà a kenikew ipalad diyà te kandan; edèdeetan e zan kun su egkeǥiyen dan he neveelan ku is wazè ku meveeli.

¹³ Piru midtuu a he egkeseǥazan ku is keupiya nu mintras ebpengungubpaan e pa kayì te tanà.

¹⁴ Sarig kew te Nengazen! Mebpekelig-en kew ne kenè kew medarà. Purung kew sarig diyà te Nengazen!