Salmo 13 - Manobo Western Bukidnon OT

Kebpenganduy te Tavang te Megbevayà

¹ Nengazen, sengemenu keluǥayad is kenè nu kedseǥipaa kediey? Taman en be heini te wazà pidtemanan? Sengemenu keluǥayad is ked-elesi nu kediey?

² Sengemenu keluǥayad is kebpekaantus ku te kegkeliveg. Sengemenu keluǥayad is kebpekaantus ku te kegketeǥui te seeng te ǥehinawa ku? Sengemenu keluǥayad is kegkezeeǥa kedì te menge kuntada ku?

³ Nengazen he Megbevayè ku kenà a kenikew pesegdana; iveǥey nu en kedì is mibuyù ku pinaaǥi te ked-ampù ku. Ilikù nu kayi te kedì is desen ku su para kenà a mebpatey.

⁴ Su utew egkelipey is menge kuntada ku emun egkezaag e zan. Kenè nu ituǥut he mekezayandayan sikandan pinaaǥi te kegkezeeǥa zan kedì.

⁵ Ebpekesarig a kenikew, Nengazen, su ǥeina te kenà egkaawà is kebmahala nu kediey. Ne utew a egkelipey su edlibriyen e man kenikew.

⁶ Egkentahan ku sikew, Nengazen, su puun pa zengan mibpurungan a kenikew.