Salmo 129 - Manobo Western Bukidnon OT

Ampù he Igkuntra te menge Kuntada te Israel

¹ Menge tig-Israel, keǥiya niw ke mibmenumenu kew te ebpaantus te menge kuntada niw puun pa te aney en he kegketukud te nasyun niw.

² “Dekelà is kebpeentusa zan kenami puun pa te kebpuun te nasyun dey. Piru wazè key zan mezèdeeti.

³ Mibpelian dan te mezalem is menge peka zey; henduen be heini te tanà he mid-eradu.

⁴ Piru metazeng is Nengazen, su impelingkawas key zin te kebpen-uripen te lalung he menge etew.”

⁵ Berakat he ebpekepekeziyù tenged te kegkeeled is langun he edumut te Zion.

⁶ Berakat he meiring sikandan te menge sagbet he nenuvù diyà te atep, he iyan pa kedtuvù dan ne egkeǥangu zan en.

⁷ Wazà edseǥipà te kedtiǥum kayi he menge sagbet wey wazà ed-uwit kayi he vinagkes.

⁸ Berakat he sikan is edsaǥad kenà megkaǥi ziyà te kandan te, “Berakat he tuvazi kew te Nengazen! Ebpenubtuvazan dey sikiyu pinaaǥi te ngazan te Nengazen.”