Salmo 124 - Manobo Western Bukidnon OT

Is Megbevayà Menlelavan te menge Etew Zin

¹ Emun wazè kiw levani te Nengazen, hengkey vuwa is egkehitavù kenitew? Tavak kew is menge tig-Israel!

² “Emun wazè kiw levani te Nengazen hein midsurung kiw te menge kuntada tew,

³ mibpenhimetayan kiw zan en geina tenged te utew zan kegkepeuki kenitew.

^4-5 Neiring kiw en pezem te naanud te zalem etawa nelened te meseleg he wahig.

⁶ Dait he edeliǥen is Nengazen, su wazè din ituǥut he zèdeeti kiw te menge kuntada tew he henduen be te menge langgam he zumezaas.

⁷ Nekepelaǥuy kiw iring te tagbis he nelitag he nekaawà su merunut en is tali.

⁸ Is tavang kenitew ne ziyà ebpuun te Nengazen he iyan mibaal te langit wey is kelibutan.”