Salmo 121 - Manobo Western Bukidnon OT

Nengazen is Ed-ipat Kedì

¹ Midtengtengan ku is menge vuvungan; hendei ves ebpuun is tavang kediey?

² Is tavang kediey ne ziyà ebpuun te Nengazen, he iyan mibaal te langit wey kelibutan.

³ Kenè din idtuǥut he meseligkat ka. Sikandin is ed-ipat kenikew, ne kenà ebpekelipezeng.

⁴ Pemineg kew! Is ed-ipat te Israel ne kenà ebpekelipezeng wey kenà edlipezeng.

⁵ Is Nengazen, iyan ed-ipat kenikew; diyà sikandin te uvey nu is edlavan kenikew.

⁶ Is keinit te andew wey siǥa te vulan ke mezukilem, kenà ebpekezezaat kenikew.

⁷ Ed-ipaten ka te Nengazen ne kenà ebpekezezaat kenikew is minsan hengkey he vangkit; ebpekeventayan din is untung nu.

⁸ Is Nengazen iyan ed-ipat kenikew ǥuntaan wey taman te taman, minsan hendei ka ebpevayà.