Salmo 12 - Manobo Western Bukidnon OT

Ampù para te Kebuyù te Tavang te Megbevayà

¹ Tevangi a, Nengazen, su wazè en etew he nesamà he metinumanen wey egkeseriǥan.

² Langun he menge etew ne ebpemenarùtarù diyà te menge zuma zan. Egemiten dan is meungangen he menge lalag te kebpenlimbung dan.

³ Deyzey pezem Nengazen ke ibpetiem nu sikandan is ebpemenlimbung pinaaǥi te meungangen he menge lalag wey sikan is menge gelbuwen.

⁴ Ke sikandan te, “Ebmezeeǥen key pinaaǥi te kebpahambug dey. Ebpekehimu key he egkaǥi te minsan hengkey he egkesuatan dey, ne wazà ebpekezawey kenami.”

⁵ Migkaǥi is Nengazen te, “Edtevangan ku is menge egkaayuayu su edèdaaǥen sikandan, ne utew subra is kebpekeantus dan. Egkelesaǥan ku sikandan su iyan heini ebperetengen dan.”

⁶ Egkeseriǥan utew is menge saad te Nengazen. Iring heini te pelata he ebpekesarig ki he lunsey heini su kepipitu ipaaǥi ziyà te hapuy para maawà is menge sahug din.

⁷ Nengazen, layun key kenikew ventayi, ne ilikey key te lalung he menge etew te minsan hengkey he timpu.

⁸ Su nekeelingkus kenami is lalung he menge etew ne edeliǥen pa te kezekelan is kelelalung dan.