Salmo 114 - Manobo Western Bukidnon OT

Kanta Mehitenged te Kegawas te menge Israilihanen Puun te Ehipto

¹ Is menge Israilihanen he menge kevuwazan ni Jacob, mid-ubpè dan dengan diyà te Ehipto, he selakew is kineǥiyan te menge etew zutun.

² Ne hein migawas dan en diyà te Ehipto, ne midhimu te Megbevayà is Juda he segradu he lugar zin, ne midumala zin is Israel.

³ Is Daǥat he Meriǥà mibpelaǥuy te kegkaahaa zin kandin. Ne is Wahig he Jordan mid-endud.

⁴ Neyunggat is menge vuntud wey menge vuvungan he henduen be te ebpemenlinglingketew he menge kambing wey menge kerehidu.

⁵ Maan is mibpelaǥuy is Daǥat he Meriǥà wey mid-engked te kedtudà is Wahig he Jordan?

⁶ Maan is neyunggat is menge vuntud wey is menge vuvungan he henduen be te ebpemenlinglingketew he menge kambing wey menge kerehidu?

⁷ Egkeyunggat daan minsan is tivuuk he kelibutan diyà te etuvangan te Nengazen he Megbevayà ni Jacob;

⁸ ne midhimu zin he peneng wey serebseb he edtudà sikan is lintikan he vatu.