Salmo 110 - Manobo Western Bukidnon OT

Is Nengazen wey is Pinilì Din he Hadì

¹ Migkaǥi is Nengazen diyà te Nengazen ku he hadì te, “Pinuu ka kayi te egkekewanan ku, taman te igkepezizalem ku ziyà te menge paa nu is menge kuntada nu.”

² Mahal he Hadì, ebpuun te Zion ibpemeluag te Nengazen is ginhedian nu, ne edhedian nu is menge kuntada nu.

³ Dutun te andew te kedtebeka nu te menge kuntada nu, andam is menge etew nu te ked-uǥup kenikew. Is menge vetan-en he menge etew nu edhendiyà te kenikew zutun te segradu he menge vuvungan he henduen be sikandan te menge zehemug emun meselem.

⁴ Nenangdù is Nengazen, ne kenà egkahalin is isip din, he memumuhat ka te wazà pidtemanan, iring te kegkememumuhat ni Melkizedek.

⁵ Is Nengazen diyà te egkekewanan nu; edèdeetan din is menge hadì emun ibpeehè din en is pauk din.

⁶ Edsilutan din is menge nasyun ne mahabet is ebpenhimetayan din. Edèdeetan din is ebpemendumala seled te tivuuk he kelibutan.

⁷ Sikew, Mahal he Hadì, ed-inum ka ziyà te wahig he edtudà he ziyà te kilid te zalan, umbe edlikù is desen nu ne ebpekezaag ka.