Salmo 11 - Manobo Western Bukidnon OT

Kedsarig te Nengazen

¹ Diyà a te Nengazen edhangyù he kelesaǥi e zin. Ne maan is egkaǥi kew kayi te kedì te, “Pelaǥuy ka iring te tagbis pehendiyà te menge vuvungan,

² su zutun te merusirem edhingaten en te menge mezaat he etew is menge panè dan, su ebpenaan dan en is menge etew he edtinazeng.

³ Wazè en egkehimu te menge metazeng emun naawè en diyà te inged is metazeng he kukuman.”

⁴ Diyà is Nengazen ed ubpà te segradu he valey zin; diyà te langit is pinuuwè din te kedhadì. Ed-ahaan din wey edsusiyen din is langun he menge etew.

⁵ Edsusiyen din is menge metazeng wey is menge lalung he menge etew. Ne egkeepesan din is menge mesipala.

⁶ Ebpeuzanan din te egkeregreg he menge vaǥa wey esupri is menge lalung he etew; ne edsilutan din sikandan pinaaǥi te meinit he keramag he ebpekelupa kandan.

⁷ Su metazeng is Nengazen ne iyan igkelipey zin is metazeng he menge vaal. Umbe, is etew he edtinazeng ebpekeuvey ziyà te etuvangan din.