Salmo 108 - Manobo Western Bukidnon OT

Ampù para te Kebuyù te Tavang te Megbevayà

¹ He Megbevayà, utew zekelà is kedsarig ku kenikew. Egkentahan ku sikew te menge kedalig kayi te tivuuk he ǥehinawa ku.

² Egkeriwaswas pa ne egimerat e en, su wey ku maandam en is menge instrumintu ku he zuen dan menge kuwirdas para meǥamit ku te kedalig kenikew.

³ Nengazen, edeliǥen ku sikew ziyà te teliwazà te menge etew. Egkentahan ku sikew ziyà te teliwazà te menge etew he meǥinged diyà te senge nenasyun.

⁴ Su kenà egkesukud is gaǥew nu wey kebmetinumanen nu.

⁵ He Megbevayà, ipeehè nu is kegkemekeǥeǥehem nu ziyà te langit wey kayi te tivuuk he kelibutan.

⁶ Libriya key pinaaǥi te ǥehem nu. Tevaka nu is ked-ampù ku su para melibri key is menge minahal nu.

⁷ He Megbevayà, migkaǥi ka ziyà te valey nu te, “Ebpekezaag a; ebehinen ku is Shekem wey is Suǥud he Sucot, ne ibpemeǥey ku heini te menge etew ku.

⁸ Kediey is Gilead wey is Manase. Is Efraim iyan pengalang ku te menge etew ku ne is Juda iyan ibpezumala ku kandan.

⁹ Is Moab suluǥuen ku, ne ǥaked ku is Edom. Igkulahì ku is kegkezeeǥa ku te Filistia.”

¹⁰ He Megbevayà, hentei is ed-uwit kedì diyà te Edom wey ziyà te inged kayi he neliǥuy te verengbeng?

¹¹ Kenè be iyan ka, is Megbevayà he mid-iniyug kenami ne wazè en meduma te menge sundaru zey?

¹² Tevangi key te ked-asdang te menge kuntada zey, su kenà ebpulus is tavang te etew.

¹³ Ebpekezaag key pinaaǥi te tavang nu, He Megbevayà, su edaaǥen nu is menge kuntada zey.