Isaias 15 - Manobo Western Bukidnon OT

Is Lalag Mehitenged te Moab

¹ Heini he menge lalag ne mehitenged te Moab: Seled dà te sengekezukileman ne egkevengkag en is menge inged he Ar wey Kir he sakup te Moab.

² Edtekezeg is menge tig-Dibon diyà te lavew he simbahan dan wey ziyà te menge simbahan dan diyà te metikang he menge lugar su edsineǥew zan dutun. Edsineǥawan te menge tig-Moab is Nebo wey Medeba. Is kada sevaha kandan mibpevangul wey mibpemarbas su ibpeehè dan is kedlalew zan.

³ Ebivisti sikandan te saku zutun te kedhipanew zan diyà te kersada. Midsineǥew sikandan diyà te atep te menge valey zan wey ziyà te menge pelasa.

⁴ Edsineǥew is menge tig-Heshbon wey menge tig-Eleale, ne taman en te Jahaz is kegkezineǥa kayi. Umbe is menge sundaru ziyà te Moab nemengulahì tenged te kegkehandek dan.

⁵ Ingkeseeng ku is menge tig-Moab. Mibpelaǥuy is menge etew zutun pehendiyà te Zoar wey Eglat Shelishiya. Midsineǥew sikandan is edtekezeg diyà te Luhit. Is duma kandan nemen-eerang dutun te kedhendiyè dan te Horonaim, tenged te nehitavù kandan.

⁶ Nemezahan is wahig he Nimrim, ne neǥangu is menge sagbet. Wazè en midtuvù he pinemula.

⁷ Umbe, inlayun dan te zal-ug he Arabim is menge ketiǥeyunan he midheǥuan dan wey netiǥum dan.

⁸ Is kegkezineǥa te ked-erang dan ne taman en te zulunà te Moab wey Eglaim wey taman te Beer Elim.

⁹ Mibmeriǥà tenged te lengesa is wahig he Dibon, piru zuen ku pa ibpezezaat kandan he edhuna pa: erimaung is edsuǥuen ku wey zin mezawi is nemelaǥuy puun te Moab wey is nengesamà keniyan he inged.