Santiago 5 - Manobo Western Bukidnon

Is Sepian he Menge Etew

¹ Pemineg kew zaan, sikiyu is sepian. Sineg̵ew kew; erang kew, su utew merasey is egkeulaula niw keuzemà.

² Egkeredak en is menge ketig̵eyunan niw. Egketketen te ipes is manggad niw.

³ Midtangis is menge selapì niw wey vulawan su wazè niw g̵emita he idtavang. Ne is tangis, iyan tuus te keleleg̵ed niw ne tenged dutun utew mepait is silut keniyu keuzemà te andew te kedlimasa te menusiyà; su midtipig̵an niw is dekelà he kewasa kayi te menge ketepusan he andew.

⁴ Is selapì he wazè niw isuhul te edterebahu ziyà te menge tanè niw, ne iyan idsumbunga zan keniyu ziyà te Megbevayà. Is sumbung keniyu te nemenlegtey ziyà te menge luti niw, nezineg en te utew mekeg̵eg̵ehem he Nengazen.

⁵ Dini te kelibutan utew meupiya is kebpekesavuk niw ne edlipey kew layun, iyan, iring kew g̵untaan te nati he ibpelambù he edlepaan su kunaan niw ke kenè kew egkesaut te andew te kedsilut.

⁶ Su impesilutan niw wey mibunù niw is menge metazeng he etew, minsan pa te wazè dan medsukul keniyu.

Is Kebmeinentusen wey is Ked-ampù

⁷ Ne sikiyu is menge zuma ku he tumutuu, kinahanglan he meinentusen kew taman te kedlikù te Nengazen. Su is ebasuk, ebpekeantus te kedtag̵ad din taman te edsebpet en is impemula zin diyà te tanè din. Edteg̵azan din is uzan he ebpetuvù te pinemula zin wey is ebpeketesan te pinemula zin.

⁸ Ne sikitew zaan, kinahanglan he ed-entusen tew is kebpeketag̵ad tew. Edheg̵eten tew is kedsarig tew su meg̵aan en is andew te kedlikù te Nengazen.

⁹ Kenè kew, menge suled, meked-eepesà su wey kenè kew mesiluti te Megbevayà. Meg̵aan en ebpekeuma is edsusi te menge ulaula ta; iring te ziyè en te g̵emawan.

¹⁰ Menge suled, ed-iringan ta is kebmeinentusen te menge ebpeneuven dengan te Megbevayà su zutun te kebpesevuta zan te Lalag te Nengazen nekeantus dan te kemeresayan.

¹¹ Netuenan ta he utew sikandan deyzey su nekeantus dan te merasey. Netuenan niw en is kebmeinentusen dengan ni Hob wey is kedtuvazi kandin te Megbevayà dutun te nepasad en is penggezam kandin. Hihizuwen wey velig̵eg̵awen is Nengazen.

¹² Menge suled, ebeleuzan ku sikiyu he emun duen ibpesarig niw kenè niw heg̵eta pinaag̵i te kebpengulivet wey kedsesapà. Kenè kew medsesapà pinaag̵i te kegemita niw te minsan hengkey ziyà te langit wey zini te tanà te kebenara niw te menge lalag niw. Uya zà wey wazà is gemita niw su wey kenè kew mesiluti te Megbevayà.

¹³ Ke zuen minsan hentei keniyu he egkeseeng, kinahanglan he med-ampù. Ke zuen egkelipey, megkanta sikandin te kedalig te Megbevayà.

¹⁴ Ke zuen egkezeruwan, kinahanglan he tewag̵a zin is menge ebmeg̵urangen te menge tumutuu wey zan ikeampù wey meitisi sikandin te lana he ebpengumawen dan is ngazan te Nengazen.

¹⁵ Is ked-ampù dan, emun hustu is kedsarig dan te Megbevayà, ne iyan igkeulii te egkezeruwan su ebewian sikandin te Nengazen, ne egkepesaylu sikandin te menge salè din.

¹⁶ Ne tenged dutun kinahanglan he petudtudtulè kew te menge salè niw su wey iampù te kada sevaha is duma zin ne wey meulii is egkengezeruwan. Utew mekeg̵eg̵ehem is ked-ampù te metazeng he etew.

¹⁷ Si Elias dengan, etew zà sikandin he iring kenitew. Ne minsan pa zutun mezesen is ked-ampù din he kenà med-uzan ne wazà iyan mekeuzan taman te tetelu he tuig wey tengà.

¹⁸ Ne mid-ampù en maan, ne mid-uzan te mereg̵es ne human meketuvù is menge pinemula.

¹⁹ Menge suled, ke zuen sevaha keniyu he egkesuwey zin wey egkelipatan din is tutuu he tuluuwen ne zuen ebpeketavang kandin wey mekelikù,

²⁰ tentenuzi niw he is neketavang kandin, nehimu en he paag̵i wey melibri sikandin te silut. Ne pinaag̵i zutun egkepesaylu is utew mezakel he menge salà dutun he etew.