Hibriyuhanen 8 - Manobo Western Bukidnon

Is Beg̵u he Paag̵i

¹ Ne iyan kehulug̵an te langun he impesavut ku en keniyu is: duen tew en lavew he memumuhat he iring kayi ne iyan si Jesus. Impepinuu en sikandin diyà te utew lavew he pinuuwà su ziyà te zapit te egkekewanan te mekeg̵eg̵ehem he Megbevayà diyà te langit.

² Edtumanen din is kegkememumuhat din diyà te etuvangan te Megbevayà, diyà te tutuu he valey he ed-ezapan he wazà beeli te etew, kekenà, mibeelan te Megbevayà su ziyà te langit.

³ Is lavew he memumuhat dini te kelibutan, insug̵ù kandin is kebpemuhata te menge ibpelengesa wey is kebeg̵aya te menge halad diyà te Megbevayà. Ne iring din ded daan kinahanglan he zuen daan ibpemuhat te kenitew he lavew he memumuhat.

⁴ Iyan, dutun te kemulu pa sikandin dini te kelibutan, kenà egkehimu he memumuhat sikandin su puun pa te zengan dà taman guntaan duen menge memumuhat he ebpemuhat sumalà is insug̵ù kandan dutun te kesug̵uan he imbilinbilin ni Moises.

⁵ Alung dà is kandan he vaal su ed-iringan dan dà haazà is tutuu he ebpeiringan kandan he ziyà te langit. Netuenan ta heini su zutun te kebeeli ni Moises te simbahan he terapal he iyan dengan baley te Megbevayà dini te kelibutan, migkeg̵iyan sikandin te Megbevayà te, “Purungi nu te ed-iring is simbahan diyà te langit he impeehè ku kenikew ziyà te vuntud.

⁶ Ne is baal ni Jesus te memumuhat, ne lavew pa utew he meupiya, kenà is baal te menge memumuhat dini te kelibutan. Ne iring din ded daan, meupiya pa utew is beg̵u he paag̵i he ed-ikulen din wey kiw mezawat te Megbevayà, kenà is daan he paag̵i. Su heini is beg̵u, ne nevig̵eran te tuwas pa he meupiya he penaad te Megbevayà.

⁷ Haazà is nehuna he paag̵i, ne kenà ebpeketavang kenitew. Su ke neketavang haazà is nehuna kenè en kinahanglan he ed-ilisan pa maan te veg̵u.

⁸ Iyan, wazà mesuat is Megbevayà te menge ulaula te menge etew he nekesundan duen te nehuna he paag̵i su zuen insurat he Lalag te Nengazen he edhenduen te, “Duen timpu keuzemà he zutun edhimuwen ku is beg̵u en he paag̵i wey ku mezawat is langun he menge etew he kevuwazan ni Israyil.

⁹ Ne heini is beg̵u he paag̵i, ne kenà iring te nehuna he paag̵i he imbeg̵ey ku ziyà te menge lukes dan dengan te ked-eg̵aka ku kandan dutun te kebpeewaa ku kandan dutun te tanà he Ihiptu. Wazè dan tumana is menge sug̵ù ku zutun te nehuna he paag̵i ne tenged kayi mid-iniyug̵an ku sikandan,” ke sikandin.

¹⁰ Ne mid-uman megkag̵i is Nengazen te, “Is beg̵u he paag̵i he edtukuzen ku wey ku mezawat is menge kevuwazan ni Israyil, ne iyan heini: is menge sug̵ù ku, ne idsurat ku ziyà te g̵ehinawa zan wey ziyà te isip dan ne egkesuatan dan human te edtuman heini. Ne human a egkehimu he Megbevayà dan ne egkehimu sikandan he menge g̵aked ku.

¹¹ Ne tenged kayi, dutun he timpu keuzemà kenè en kinahanglan te minsan hentei he ebpepenurù te zuma zin mehitenged kedì, ne kenè en daan kinahanglan dutun he zuen pa maan etew he edseysey ziyà te zuma zin ke hentei a is Megbevayà su zutun egketuenan te minsan hentei, lavew se kenà lavew, ke hentei a.

¹² Ne egkehizuwan ku sikandan, ne ebpeseyluwen ku sikandan te mezaat he mid-ulaula zan, ne edlipatan ku en is menge salè dan,” ke sikandin.

¹³ Ne g̵eina te migkag̵i te Megbevayà he zuen beg̵u en he paag̵i, egkesavut tew he kenè en ebpulus haazà is daan. Ne ke zuen minsan hengkey he zaan en he kenè en egkeg̵amit ne ed-engkezan en su ed-ilisan te veg̵u.