Hibriyuhanen 13 - Manobo Western Bukidnon

Is Huziyan he Menge Telaan

¹ Kinahanglan he peniguduwi niw is kebmahala niw ziyà te g̵ehinawa niw te menge zuma niw he tumutuu.

² Kenè niw lipati he kinahanglan he ibpeehè niw is gag̵ew niw ziyà te menge etew he kenè niw kilala. Gelg̵elawa niw ziyà te valey niw su zuen dengan menge etew he zuen menge meg̵eliyug dan, iyan, wazè dan metueni he menge velinsug̵uen bes haazà te Megbevayà he ebpuun diyà te langit.

³ Kenè niw lipati is kedtavang niw te menge tumutuu he pirisu. Purungi niw sikandan he iring te iyan kew nepirisu. Tevangi niw zaan is menge tumutuu he ebpesipelahan he iring te iyan is keugelingen niw he lawa nepesipelahan.

⁴ Kinahanglan he tehuza niw te langun is ked-es-esawa niw. Kinahanglan he wazà minsan hentei he edselselaan din is esawa zin. Edsilutan te Megbevayà is etew he meremerik is ulaula zin wey is etew he edselselaan din is esawa zin.

⁵ Bantey kew su kela ke utew subra is suat niw te selapì. Kinahanglan he imeupiye en te g̵ehinawa niw is naazen niw, su migkag̵i is Megbevayà te, “Kenè ku sikiyu ed-ewaan ne kenè ku sikiyu ed-engkezan.”

⁶ Umba, menge suled, dekelà is kedsarig ta te Megbevayà ne ebpekekag̵i ki te, “Iyan edtavang kedì is Megbevayà, umba kenà a egkehandek te minsan hengkey he ed-ul-ulahan te etew zà duen dini te kediey.”

⁷ Kenè niw lipati is menge egalen niw te nengehuna he timpu he nekepenurù keniyu te Lalag te Megbevayà. Isipa niw is meupiya he nehimu pinaag̵i te menge ulaula zan ne iring kandan hemeni niw is kedtuu niw ki Jesu Kristu.

⁸ Su si Jesu Kristu, ne kenà egkehalin. Iyan ded sikandin gihapun dengan, wey g̵untaan, wey keuzemà te wazè din pidtemanan.

⁹ Umba, kenè niw tuuwi is menge selakew he tuluuwen he kenà iyan kes tutuu he impenurù keniyu. Iyan hustu he ibmelig-en te kedtuu tew is kedtevangi kenitew te Megbevayà, ne kenà iyan is kedlikayi te menge egkeenen he indawey te kesug̵uan su wazà heini ikezeyzey te menge etew he ebantey kayi.

¹⁰ Sikitew is menge tumutuu ki Kristu, duen tew en ingkepemuhat, iyan, haazà is menge memumuhat he Hudiyu he ziyà ebpemuhat te simbahan he ziyà te Hiruselim, wazè dan ketenged te kegkaan kayi.

¹¹ Netuenan niw he emun duen ibpemuhat te menge Hudiyu su ebpelisan dan is menge salè dan, ne is lengesa te ibpemuhat, ed-uwiten te lavew he memumuhat diyà te seled te utew mahal he rug̵u zutun te simbahan, iyan, is lawa te ibpemuhat ne ed-uwiten dan pehendiyà te g̵awas te inged ne zutun dan edtutunga.

¹² Iring din ded daan is neulaula ki Jesus su midhimetayan sikandin diyà te g̵awas te inged ne nehimu is lengesa zin he ibpalis te menge salè tew te menusiyà.

¹³ Umba, menge suled, egawas kiw zaan te inged ne edhendiyè kiw en te kandin, he ke và dà egkeg̵iya, kenè tew en edserig̵an is kedtumana te menge tuluuwen te menge Hudiyu, kekenà, iyan dà edserig̵an tew si Jesus. Edsundanan tew sikandin ne kenè tew igkehandek is ked-entusa tew te kedsudia kenitew tenged te kedtuu tew kandin.

¹⁴ Su kenà ebpedayun is kebpekeubpè tew kayi te kelibutan, kekenà, ebperetengen tew pa is tutuu he inged tew keuzemà he iyan ed-ubpaan tew te wazè din pidtemanan.

¹⁵ Ne tenged dutun kinahanglan he pinaag̵i ki Jesus he memumuhat tew, iyan tew layun ibpemuhat diyà te Megbevayà is kedelig̵a tew kandin. Layun tew ibpaahà diyà te Megbevayà is kebpeselamati tew kandin.

¹⁶ Kenè niw lipati is kebpurung niw te minsan hentei he zuma niw, ne mebpetebtevangè kew su is ulaula he iring kayi, ne iring te pemuhat he egkesuatan te Megbevayà.

¹⁷ Tumana niw is sug̵ù te menge egalen niw te menge tumutuu ne ipeehè niw is kedtehuza niw kandan su iyan sikandan ed-elima keniyu te edtuu, ne zuen timpu keuzemà he edsusiyen te Megbevayà ke metinumanen dan be is ed-elima keniyu. Emun ebpemineg̵en niw is sug̵ù dan, utew ibmeupiya te g̵ehinawa zan is baal zan. Ne emun kenè kew ebpemineg, utew mereg̵en is baal zan ne egkehimu zaan heini he idlised niw.

¹⁸ Menge suled, iampù key layun keniyu. Netuenan dey he wazà igkesawey te menge ulaula zey su iyan dà egkesuatan dey he meveeli zey is layun meupiya.

¹⁹ Ne iampù a zaan keniyu wey a meg̵aan ipeulì te Megbevayà diyan te keniyu.

²⁰ Is Megbevayà, mibanhew zin is Nengazen tew he si Jesus. Midtig̵is is lengesa zin he iyan tuus te veg̵u wey wazà pidtemanan he paag̵i te kebpekidsevaha tew te Megbevayà. Ne tenged dutun nehimu si Jesus he mekeg̵eg̵ehem he ed-elima kenitew te menge kerehidu zin.

²¹ Berakat he pinaag̵i ki Jesu Kristu, is Megbevayà he ebeg̵ey te kelinew, beg̵ayi kew zin te minsan hengkey he tavang wey niw tumana is egkesuatan din. Berakat daan he himuwa kiw zin he menge etew he utew zin egkesuati is menge ulaula. Edelig̵en tew si Jesu Kristu te wazà pidtemanan.

²² Menge suled, edhengyuan ku sikiyu he entusa niw is kebpemineg kayi te langun he menge lalag ku keniyu su kenà utew melug̵ayad heini is insurat ku.

²³ Iyan daan tudtul ku keniyu is: impeg̵awas en te pirisuwan is suled tew he si Timoteo. Emun petuluy ebpekeuma sikandin dini edumahan ku ke ebpekehendiyan a.

²⁴ Ipengemusta a keniyu te langun he menge egalen niw wey te langun he menge sakup te Megbevayà diyan. Is menge suled tew zini te Italya, ne ebpengemusta zaan sikandan keniyu.

²⁵ Berakat he ikeg̵ag̵ew kew is langun te Megbevayà.