Hibriyuhanen 11 - Manobo Western Bukidnon

Is Kedtuu

¹ Emun duen kedtuu ta te Megbevayà, egketuenan ta he egkezawat ta is meupiya he ebperetengen ta. Pinaag̵i te kedtuu ta, egketag̵ù dini te g̵ehinawa ta is kedewata ta keuzemà te menge vutang he wazè te pa maahà.

² Is menge tipehuna he etew, nezelig̵an sikandan te Megbevayà tenged te midtuuwan dan sikandin.

³ Netuenan ta he is minsan hengkey he egkeahà he midlimbag te Megbevayà, ne nehimu pinaag̵i zà te lalag din. Ne tenged kayi egketuenan ta he is minsan hengkey he egkeahà ne ziyà ebpuun te kenà egkeahà.

⁴ Si Abel zengan, tenged te kedtuu zin te Megbevayà ne nehimu zin is utew pa meupiya he pemuhat kenà te impemuhat te kakey zin he si Kain. Ne tenged kayi te kedtuu ni Abel mid-isip te Megbevayà sikandin he metazeng su midawat te Megbevayà is impemuhat din. Ne minsan pa te zengan dà minatey si Abel zuen ketudluanan din kenitew tenged te mezesen is kedtuu zin.

⁵ Ne si Inuk daan. Tenged te kedtuu zin wazà sikandin mebpatey su midtulus sikandin te Megbevayà ne kenè en sikandin egkeahà dini te kelibutan su ziyè en sikandin te Megbevayà. Duen insurat he Lalag te Megbevayà he ibpesavut he te wazè pa tulusa si Inuk, nesuat is Megbevayà te menge ulaula zin.

⁶ Is etew he wazè din kedtuu te Megbevayà, kenà egkehimu he egkesuatan te Megbevayà is menge ulaula zin. Su is etew he ebpetavang te Megbevayà, kinahanglan he edtuuwen din he zuen Megbevayà, ne kinahanglan daan he edtuuwen din he edtuvazan te Megbevayà te meupiya is minsan hentei he edhag̵ù he ebpen-ahà te paag̵i wey sikandin mekepekid-emig̵u te Megbevayà.

⁷ Ne zuen daan kedtuu ni Noe su hein midleg̵uyan sikandin te Megbevayà te limas he egkehitavù, midtuuwan din, minsan te wazè din pa maahà haazà is limas. Ne mibeelan din is dekelà he avang he egngezanan te arka ne hein midlapey is dag̵at, nelibri sikandin wey is pemilya zin ne wazè dan melened. Ne pinaag̵i zutun te kedtuu zin, impesavut din he zait he edlimasen te Megbevayà is tivuuk he mekesesalà he menusiyà. Ne zutun mid-isip sikandin te Megbevayà he metazeng tenged te midtuuwan din is migkag̵i te Megbevayà.

⁸ Ne si Abraham daan, duen kandin he kedtuu. Su neketuu sikandin te Lalag te Megbevayà he ewai zin is inged din ne medhendiyà te selakew en he tanà he impenaad te Megbevayà he ibeg̵ey ziyà te kandin wey ziyà te menge kevuwazan din. Ne zutun mid-ewaan din is kandin he inged minsan pa te wazè din hanew zutun te tanà he impenaad kandin.

⁹ Ne hein nekeuma sikandin dutun te tanà, midtuuwan din he egkeuma is timpu keuzemà he idata kandin te Megbevayà haazà is tanà. Ne minsan pa zutun, is ed-ubpaan din dutun, ne menge lawig dà he mid-etepan te terapal he henduen te kenà sikandin meg̵inged dutun te tanà. Ne iring din ded daan is mid-ulaula zutun te anak din he si Isaak wey is apù din he si Hakub, minsan pa te impenaad daan kandan te Megbevayà he egkeangken dan haazà is tanà.

¹⁰ Su si Abraham, ne iyan hustu he ebperetengen din he inged sikan is inged diyà te langit he kenà egkezeetan te wazè din pidtemanan. Ne iyan mibpelanu wey mibaal kayi is Megbevayà.

¹¹ Ne si Sara zaan is esawa ni Abraham, duen kandin he kedtuu su minsan te wazà sikandin mekeanak wey utew en sikandin meg̵urang, mibmeg̵ingey g̵ihapun tenged te kedtuu zin te Megbevayà. Umba mibmeg̵ingey sikandin su midtuuwan din is penaad kandin te Megbevayà he egkeuma is timpu he ed-anak sikandin.

¹² Ne is esawa zin he si Abraham he utew en meg̵urang daan he kenè en pezem egkehimu he ebmeg̵ingey si Sara pinaag̵i kandin, nevuwad gihapun ne nehimu sikandin he kepuun te utew mezakel he menge etew. Iring sikandan te pantad diyà te zag̵at wey te menge vituen diyà te langit su kenè en egkengevilang.

¹³ Ne heini sikandan he neketuu te Megbevayà, pudu zan minatey te wazè dan pa mezawat haazà is impenaad kandan te Megbevayà he egkeangken dan haazà is tanà. Ne minsan pa zutun te wazè dan pa mezawat haazà is impenaad te Megbevayà, wazè dan engkezi is kedtuu zan su netuenan dan he egkeug̵et pa zutun egkezawat dan is ebperetengen dan he impenaad te Megbevayà. Ne ingkepesavut dan he kenà sikandan hustu he meg̵inged dini te kelibutan su iyan hustu he inged dan is langit.

¹⁴ Ne is menge etew he iring kayi g̵untaan, kenè dan ed-isipen he iyan hustu he inged dan heini is kelibutan, kekenà, ebperetengen dan he zuen selakew he inged he iyan hustu he inged dan.

¹⁵ Ensi Abraham, wazè dan daan isipa he iyan hustu he inged dan haazà is mid-ewaan dan su emun iyan haazà, egkehimu he ed-ulì dan dutun.

¹⁶ Su ebpen-ahaan dan is inged he utew pa meupiya, kenà haazà is mid-ewaan dan su iyan ebperetengen dan is egkeubpaan dan he inged diyà te langit. Ne g̵eina te iyan haazà, ne mid-angken sikandan te Megbevayà ne netuenan ta he kenè din igkeeled is kegngezani zan kandin he Megbevayà dan su mid-andam din en is inged he egkeubpaan dan.

^17-18 Netuenan ta he impenaad te Megbevayà ki Abraham he pinaag̵i te anak din he si Isaak egkehimu he utew mezakel is kevuwazan din. Ne hein migezaman te Megbevayà is kedtuu ni Abraham, migkeg̵iyan din si Abraham he ipemuhat din si Isaak. Iyan, utew zekelà is kedtuu ni Abraham te penaad te Megbevayà ne tenged dutun wazè din isipa he kenà egkehimu he kenè din ibpemuhat si Isaak.

¹⁹ Su neisip ni Abraham he ke ebpatey si Isaak, egkehimu he ebenhawen te Megbevayà. Ne henduen be te nevanhew iyan si Isaak dutun su neisip ni Abraham he kenè en ebperis he ebpatey sikandin.

²⁰ Ne si Isaak daan, midtuu sikandin te penaad kandin te Megbevayà su mibpenubtuvazan din is menge anak din si Hakub wey si Esau.

²¹ Ne si Hakub, midtuu zaan sikandin te Megbevayà su zutun te meg̵aan din en kebpatey, mibpenubtuvazan din is menge apù din he menge anak ni Jose ne zutun mid-usazey ziyà te tuked din ne mid-azap din is Megbevayà.

²² Ne si Jose zaan tenged te kedtuu zin, dutun te meg̵aan din en kebpatey, netagnè din is ked-awà te langun he menge kevuwazan te lukes din he si Israyil ziyà te tanà te Ihiptu. Ne intelaan din daan dutun he ke egenat dan en, uwita zan daan is lawa zin te minatey.

²³ Ne sikan daan is menge g̵inikanan ni Moises, ne zekelà is kedtuu zan te Megbevayà. Su minsan pa te insug̵ù te hadì he edhimatayan is langun he menge vatà he maama te menge Hudiyu, wazè dan mahandek ne zutun te ked-enaka ki Moises in-eles dan sikandin seled te tetelu he vulan su wey kenà sikandin mehimetayi su neehè dan he utew mekempet sikandin he vatà.

²⁴ Ne si Moises, duen daan kedtuu zin te Megbevayà, su hein meg̵urang en sikandin, mid-ewaan din is meupiya he kebpekesavuk din diyà te valey te anak te hadì te Ihiptu, ne wazà sikandin mesuat he ed-umawen he anak te anak he vahi te hadì.

²⁵ Su iyan din midtumù he merasey sikandin duma te menge etew he sakup te Megbevayà, kenà te kedlipey pinaag̵i te menge salà dini te kelibutan he egkehitavù te mevavè dà he timpu.

²⁶ Neisip din he tuwas pa he meupiya is ked-entusa zin te kedlupig̵i kandin tenged te kedsarig din te mibpilì he hadì he ibpevulus te Megbevayà keuzemà, kenà is dekelà he ketig̵eyunan he egkekuwa zin diyà te Ihiptu. Su iyan hustu he edteg̵azan din is langun he meupiya he ibeg̵ey kandin te Megbevayà keuzemà.

²⁷ Ne tenged te kedtuu zin mid-awà sikandin dutun te Ihiptu su wazè din ikehandek is kepauk te hadì te Ihiptu. Ne minsan pa te utew mereg̵en is egkengeseg̵azan din wazà sikandin medlikù su henduen be te egkeehè din he eduma kandin is Megbevayà he kenà egkeahà.

²⁸ Ne tenged te kedtuu zin midtuman din is Pista te Kedlevayi ne insug̵ù din he ebpelisan te lengesa te nati he kerehidu is gemawan te menge valey te menge kevuwazan ni Israyil. Umba midhimu zin heini su wey kenà mehimetayi is menge penganey he anak dan te velinsug̵uen te Megbevayà he ibpepenhimatey te langun he menge penganey he anak te menge etew ziyà te Ihiptu.

²⁹ Ne is menge kevuwazan ni Israyil, pinaag̵i te kedtuu zan te Megbevayà, nekerapas dan te zag̵at he egngezanan te Merig̵à he impedsuwey te Megbevayà, ne neiring te tanà he memazà haazà is imbayè dan. Iyan, is menge tig-Ihiptu he edal-as kandan, ne nengelened dan pudu su imped-uliey te Megbevayà haazà is dag̵at he impedsuwey zin.

³⁰ Ne zuen daan kedtuu te menge kevuwazan ni Israyil, su hein nemekeuma zan dutun te ingkutà te inged he Hiriku ne kada andew seled te pitu he andew ed-elingkus dan dutun te kutà, ne zutun migevà te Megbevayà haazà is kutà.

³¹ Duen dutun te inged he Hiriku bahi he meremerik is ulaula zin he egngezanan ki Rahab. Ne minsan pa zutun, hein nekeuma is ed-eles-eles he menge sug̵ù ni Moises he edsusi te kelig-en dutun te inged, midtuu si Rahab te Megbevayà ne midtevangan din haazà is menge etew. Ne neug̵et pa zutun hein migerà is menge zuma zin he wazà medtuu te Megbevayà, wazà sikandin iragkes tenged te kedtuu zin te Megbevayà.

³² Kayi ku zà edtemana heini is gug̵ud su emun ibpelaus ku pa kenè en egkampet is timpu emun egug̵uzen ku pa keniyu is kedtuu te menge zuma pa he menge etew iring ki Gidyun, si Barak, si Samsun, si Hipti, si David, si Samuel wey is ebpemeneuven dengan te Megbevayà.

³³ Su pinaag̵i te kedtuu zan te Megbevayà nengezaag te zuma kandan is menge sundaru te menge zekelà he inged. Ne is menge zuma pa, metazeng is kedhedii zan te menge sakup dan, ne is duma pa, nezawat dan is impenaad kandan te Megbevayà, ne is duma, nezaag dan is ebpekekaid he erimaung ne wazè dan mekag̵at.

³⁴ Ne is duma pa, tenged te kedtuu zan, wazè dan metutung te utew meinit he hapuy, ne is duma pa, wazà sikandan mehimetayi te menge kuntada zan. Ne is duma he utew meg̵uyà, nehimu sikandan he utew mezesen pinaag̵i te kedtuu zan. Nehimu zan he utew mevurut te kebpekidtebek ne nengezaag dan is menge sundaru te menge kuntada zan.

³⁵ Ne zuen daan menge vahi zengan he zekelà is kedtuu zan ne pinaag̵i kayi nevanhew is menge anak dan he minatey en. Ne zuen pa zaan menge tumutuu zengan te Megbevayà he midakep, ne minsan pa te midrasey sikandan taman te kebpatey, wazè dan medlekà te kedtuu zan su wey sikandan keuzemà egkevanhew zutun te tuwas pa he meupiya he untung.

³⁶ Duen pa tumutuu zengan he utew mid-eled-eled ne mibug̵el, ne is duma pa ne midhiketan ne mibpirisu.

³⁷ Duen daan mibpenhimetayan pinaag̵i te kedtulenga te vatu. Ne zuen pa zaan midliwazà tempeza, ne zuen pa zaan mibpenhimetayan pinaag̵i te tibas. Ne is duma pa, ne tenged te kenè dan ked-engkezi te kedtuu zan, ne iyan dà ugelingen dan is lundis te kerehidu wey kambing. Utew zan nengeayuayu. Mibpemesipelahan wey midlupig̵an sikandan te menge etew.

³⁸ Is menge mezaat he etew zini te kelibutan, kenè dan dait he ebpekiduma kayi te menge utew metazeng he etew! Ne is duma kayi te menge etew he tumutuu, ne nengeewaan dan is baley zan ne ziyè dan mengetazintazin te tanà he wazà ubpai te etew, wey ziyà te menge vuntud. Ne ziyè dan mekeubpà te menge surung diyà te menge pangpang wey te menge vudsi te tanà.

³⁹ Ne utew igkelipey te Megbevayà is menge etew he iring kayi, iyan, minsan pa zutun wazè dan pa zutun mezawat is penaad kandan te Megbevayà.

⁴⁰ Su zuen meupiya pa utew he paag̵i he mid-isip te Megbevayà su mid-isip din he wey zin edtumana haazà is menge penaad din kandan ke ebpekeragkes kiw zutun te menge etew he edawat te menge penaad din.