Zacarias 6 - Marahay na Bareta Biblia

An Bisyon dapit sa Apat na Karwahe

¹ Nagkaigwa pa ako nin sarong bisyon. Sa bisyon na ini, nahiling ko an apat na karwahe na nagluluwas hale sa pagultanan kan duwang bronseng bukid.

² An enot na karwahe guyod nin pulang mga kabayo, an ikaduwa nin itom na mga kabayo,

³ an ikatolo nin puting mga kabayo, asin an ikaapat nin kabang na mga kabayo.

⁴ Dangan hinapot ko an anghel, “Kagurangnan, ano an kahulogan kan mga karwaheng iyan?”

⁵ Nagsimbag siya, “An mga iyan iyo an apat na doros; nag-abot pa sana sinda hale sa atubangan nin Kagurangnan kan bilog na kinaban.”

⁶ An karwaheng guyod kan itom na mga kabayo nagpapasiring sa Babilonia, an puting mga kabayo nagpapasiring sa solnopan, asin an kabang na mga kabayo nagpapasiring sa daga sa habagat.

⁷ Mantang nagluluwas an kabang na mga kabayo, nasisibot na sinda sa paglakaw tanganing siyasaton an bilog na kinaban. Nagtaram an anghel, “Lakaw asin siyasata nindo an kinaban!” Kaya siniyasat kan mga kabayo an kinaban.

⁸ Dangan kinurahawan ako kan anghel, “Pinakulpa na an kaanggotan kan Kagurangnan kan mga kabayong nagduman sa Babilonia sa amihan.”

An Pagboot na Koronahan si Josue

⁹ Itinao sako nin Kagurangnan an mensaheng ini.

¹⁰ Nagtaram siya, “Kuaha an mga regalong itinao kan mga itinapok na si Heldai, Tobias, asin Jedaias, dangan magduman ka tolos sa harong ni Josias na aking lalaki ni Sofonias. Nagbaralik na sinda hale sa pagkatapokan sa Babilonia.

¹¹ Gumibo ka nin sarong korona hale sa itinao nindang plata saka bulawan, dangan ibugtak mo iyan sa payo kan Halangkaw na Padi na si Josue na aking lalaki ni Jehozadak.

¹² Taraman mo siya na an Kagurangnan nin mga hukbo nagsasabi, ‘An lalaking inaapod An Sanga magtatalubo sa namumugtakan niya asin iyo an mapatindog giraray kan Templo nin Kagurangnan.

¹³ Siya an mapatindog kaiyan patin maako kan onra na maninigo sa sarong hade; siya man an mamamayo kan saiyang banwaan. Matindog sa kataed kan saiyang trono an sarong padi, asin magtatrabaho sindang duwa na igwa nin katoninongan saka katiwasayan.’

¹⁴ An korona magigin sarong giromdom sa Templo nin Kagurangnan sa kaomawan ni Heldai, Tobias, Jedaias, asin Josias.”

¹⁵ Maarabot an mga nag-eerok sa harayong lugar asin matarabang sinda sa pagpatindog giraray kan Templo nin Kagurangnan. Kun mahaman na iyan, maaaraman nindo na an Kagurangnan nin mga hukbo iyo an nagsugo sako sa saindo. Mangyayari an gabos na ini kun bilog nindong kukuyogon an mga pagboot kan Kagurangnan na saindong Dios.