Zacarias 5 - Marahay na Bareta Biblia

An Bisyon dapit sa Naglalayog na Libro

¹ Nagtingkalag giraray ako, asin nakahiling ako nin sarong librong naglalayog.

² Hinapot ako kan anghel kun ano an sakong nahiling. Nagsimbag ako, “Sarong naglalayog na libro; siyam na metros an laba kaiyan asin apat may kabangang metros an lakbang.”

³ Dangan sinabihan niya ako, “Nasusurat sa librong iyan an maldisyon na maluwas sa bilog na daga. Sa sarong lado kan libro nasusurat na an lambang mahabon gagadanon, asin sa ibong kaiyan nasusurat na an lambang magsaksi nin putik gagadanon man.

⁴ Nagtataram an Kagurangnan nin mga hukbo na papaluwason niya an maldisyon na ini, asin malaog iyan sa harong kan lambang mahabon asin lambang parasaksi nin putik; maontok iyan sa saindang mga harong dangan mahale kun gaba na an mga harong.”

An Bisyon dapit sa Babaeng nasa Basket

⁵ Nagtunga giraray an anghel asin nagsabi, “Hilinga! Igwa pa nin nagdadangadang!”

⁶ Naghapot ako, “Ano iyan?” “Sarong basket, asin simbolo iyan kan makuring kasalan kan bilog na daga,” an simbag niya.

⁷ An takop kan basket gibo sa timga. Mantang naghihiling ako, buminukas an takop asin sa laog kan basket nagtutukaw an sarong babae!

⁸ Nagsabi an anghel, “An babaeng iyan iyo an simbolo kan karatan.” Dangan isinulnok niya sa laog kan basket an babae asin sinerahan.

⁹ Nagtingkalag ako asin nahiling ko an duwang babaeng naglalayog pasiring sako. Igwa sinda nin makokosog na mga pakpak na arog kan sa dakulang gamgam. Sinaklot ninda an basket dangan ilinayog paharayo.

¹⁰ Hinapot ko an anghel, “Saen ninda dadarahon idto?”

¹¹ Nagsimbag siya, “Sa Babilonia, saen mapatindog sinda nin sarong templo para saiya. Kun haman na an templo, ibubugtak ninda duman an basket tanganing pagsambahon.”