Zacarias 12 - Marahay na Bareta Biblia

An Maabot na Kaligtasan nin Jerusalem

¹ Iyo ini an mensahe dapit sa Israel hale sa Kagurangnan, an Kagurangnan na nagbiklad kan kalangitan, naglalang kan kinaban, asin nagtao nin buhay sa tawo. Nagsasabi siya,

² “An Jerusalem gigibohon kong arog sa sarong kalis nin arak; mainom an mga nasyon sa palibot niya asin magsasayasay sinda siring sa mga burat. Kun palibotan na ninda an Jerusalem, an mga syudad sa natatada pang kabtang nin Juda mapapalibotan man.

³ Alagad pag-abot kan panahon na iyan, an Jerusalem gigibohon kong arog sa sarong magabat na gapo—an arin man na nasyon na maghingowang alsahon iyan makukulogan. Pagsasaroon kan gabos na nasyon sa kinaban an saindang kosog tanganing salakayon an Jerusalem.

⁴ Sa panahon na iyan, tatakoton ko an gabos nindang kabayo asin riribongon ko an mga nakalunad diyan. Babantayan ko an banwaan nin Juda, alagad bubutahon ko an mga kabayo kan saindang mga kaiwal.

⁵ Dangan masaboot an mga kamaganakan nin Juda, ‘Pinapakosog kan Kagurangnan nin mga hukbo, an saiyang banwaan na nag-eerok sa Jerusalem.’

⁶ “Sa panahon na iyan, gigibohon ko an mga kamaganakan nin Juda na magin arog sa kalayo sa sarong kadlagan o sa sarong oma na madali nang anihon—raraoton ninda an gabos na nasyon sa palibot. An mga taga Jerusalem magdadanay na ligtas sa laog kan syudad.

⁷ “Ako, an Kagurangnan, an matao nin kapangganahan enot sa mga hukbo nin Juda, tanganing an onra na aakoon kan mga kapagarakian ni David asin kan banwaan nin Jerusalem dai makaorog kan aakoon kan ibang kabtang nin Juda.

⁸ Sa panahon na iyan, iingatan nin Kagurangnan an mga nag-eerok sa Jerusalem; maski an pinakamaluya sa sainda magigin siring kakosog ni David. An mga kapagarakian ni David an mangengenot sa sainda arog sa sarong anghel nin Kagurangnan, arog sa Dios mismo.

⁹ Sa panahon na iyan, roronoton ko an arin man na nasyon na maghingowang salakayon an Jerusalem.

¹⁰ “An mga kapagarakian ni David asin an mga nag-eerok sa Jerusalem tatawan ko kan espiritu nin pagkaherak saka kan pagpamibi, tanganing paghiling ninda sa tawong saindang binuno, matangis sinda arog kan mga nagtatangis para sa bugtong na aki. Magtatangis sinda nin mapait arog kan nagadanan kan saindang matuang aking lalaki.

¹¹ Sa panahon na iyan, an pagtangis sa Jerusalem makakaarog sa pagtangis para ki Hadad-rimmon sa kapantayan nin Megiddo.

^12-14 An lambang pamilya magtatangis: an pamilya na gikan ki David, an pamilya na gikan ki Natan, an pamilya na gikan ki Levi, an pamilya na gikan ki Simei; asin an iba pang pamilya. An lambang pamilya magtatangis, asin an kalalakihan sa lambang pamilya magtatangis na siblag sa kababaehan.