Salmo 97 - Marahay na Bareta Biblia

Pinakahalangkaw na Pamayo an Dios

¹ Hade an Kagurangnan; mag-ogma logod an daga! Mag-ogma logod an mga baybayon kan dagat!

² Panganoron asin kadikloman an nasa palibot niya; katanosan asin hustisya an mga pundasyon kan saiyang trono.

³ Kalayo an nangengenot sa atubang niya asin sinusulo an saiyang mga kaiwal sa palibot niya.

⁴ An saiyang kikilat nagtatao nin liwanag sa kinaban; nahihiling ini kan daga asin tinatakigan.

⁵ An mga bukid natutunaw siring sa taro sa atubang nin Kagurangnan, sa atubang nin Kagurangnan kan bilog na daga.

⁶ An kalangitan nagbabareta kan saiyang katanosan, asin an gabos na nasyon nakakahiling kan saiyang kamurawayan.

⁷ Sinosopog an gabos na nagsasamba sa mga ladawan, na naghahambog kan saindang mga dios na mayo nin halaga; gabos na dios minaduko sa atubang niya.

⁸ Naghihimate an banwaan nin Sion asin naoogma; naoogma an mga aking babae ni Juda huli kan saimong mga paghukom, O Dios.

⁹ Huli ta ika, Kagurangnan, an pinakahalangkaw sa bilog na daga; orog na dakula ki sa gabos na mga dios.

¹⁰ Namomotan nin Kagurangnan an naoongis sa karatan; inaataman niya an buhay kan saiyang mga banal; iliniligtas niya sinda sa kamot kan mga tampalasan.

¹¹ Ilaw minaliwanag sa mga matanos asin kaogmahan sa mga malinig an puso.

¹² Kamong mga matanos, mag-ogma sa Kagurangnan; asin magpasalamat sa banal niyang ngaran!