Salmo 96 - Marahay na Bareta Biblia

Pinakahalangkaw na Hade an Dios

¹ Mag-awit kamo nin bagong awit sa Kagurangnan! Mag-awit sa Kagurangnan an bilog na kinaban!

² Mag-awit sa Kagurangnan, omawon an saiyang ngaran; ipagrukyaw aroaldaw an saiyang kaligtasan.

³ Ipahayag sa mga nasyon an saiyang kamurawayan, an mga ngangalasan niya sa tahaw kan gabos na banwaan.

⁴ Huli ta dakula an Kagurangnan, asin maninigo nanggad na omawon; dapat siyang katakotan orog sa gabos na dios.

⁵ An mga dios kan ibang nasyon mga dios-dios sana, alagad an kalangitan linalang nin Kagurangnan.

⁶ Omaw asin kamahalan yaon sa saiyang atubang; kosog asin gayon yaon sa saiyang santwaryo.

⁷ Itao nindo sa Kagurangnan, O mga pamilya nin mga banwaan, itao nindo sa Kagurangnan an kamurawayan asin kosog.

⁸ Itao sa Kagurangnan an kamurawayan na maninigo sa saiyang ngaran; magdara nin dolot asin maglaog sa saiyang Templo!

⁹ Sambahon nindo an Kagurangnan sa saiyang pagdatong; magtakig sa saiyang atubang an bilog na kinaban!

¹⁰ Sabihan nindo an gabos na nasyon, “Hade an Kagurangnan! An kinaban, masarig na pinamugtak asin dai nanggad mahihiro; matanos niyang huhukoman an mga banwaan.”

¹¹ Mag-ogma an langit, mag-ogma an daga! Maghagubohob an dagat, asin an gabos na yaon diyan;

¹² mag-ogma an kaomahan, asin an gabos na yaon diyan! Dangan gabos na kahoy sa kadlagan mag-aawit sa kaogmahan

¹³ sa atubang nin Kagurangnan, huli ta siya minadatong, huli ta siya minadatong tanganing hukoman an daga. Huhukoman niya an kinaban sa katanosan, asin an mga banwaan, sa saiyang katotoohan.