Salmo 93 - Marahay na Bareta Biblia

Hade an Dios

¹ Hade an Kagurangnan. Siya nagugubingan nin kamahalan asin kosog. Masarig an namumugtakan kan kinaban asin dai matatanyog.

² An saimong trono, Kagurangnan, masarig poon kaidto; ika nabubuhay na mayong kapinonan asin mayong kataposan.

³ O Kagurangnan, ilinangkaw kan mga baha an saindang mga tingog, kinosog kan mga baha an saindang hagubohob.

⁴ Orog na makosog ki sa hagubohob nin mga katubigan, orog na makosog ki sa alon nin kadagatan, an Kagurangnan mapangyari sa kaitaasan.

⁵ An saimong mga togon mayo nin kataposan, Kagurangnan, asin totoong banal an saimong Templo, sa panahon na daing kataposan.