Salmo 92 - Marahay na Bareta Biblia

Sarong Awit nin Pag-omaw

¹ Marahay an pagpasalamat saimo, Kagurangnan, an pag-awit nin mga pag-omaw sa saimong ngaran, O Kahorohalangkaweng Dios,

² an pagbalangibog kan danay mong pagkamoot sa pagkaaga asin kan saimong pagkamaimbod pagkabanggi,

³ sa tugtog nin plawta asin nin arpa asin sa tanog nin lira.

⁴ Huli ta ika, Kagurangnan, nagpaogma sako; sa mga gibo nin saimong mga kamot, minaawit ako sa kaogmahan.

⁵ Kadakula kan saimong mga gibo, Kagurangnan! Hararom na gayo an saimong mga kaisipan!

⁶ An sarong mangmang dai kaini makakasabot; an sarong patal dai man kaini makakasabot,

⁷ maski magtalubo an mga tampalasan arog sa mga doot, asin mag-uswag an gabos na paragibong maraot; alagad gabos sinda mapupuho sagkod pa man,

⁸ huli ta ika, Kagurangnan, an pinakahalangkaw sagkod lamang.

⁹ Naaaraman nyamo na magagadan an saimong mga kaiwal, asin madadaog an gabos na maraot.

¹⁰ Pinakosog mo ako siring kan lalaw na toro; benendisyonan mo ako nin kaogmahan.

¹¹ Nahiling ko an pagkadaog kan sakong mga kaiwal asin nadangog ko an inagrangay kan mga maraot.

¹² Siring sa palma mauswag an mga matanos na tawo; matalubo sinda arog kan sedro sa Lebanon.

¹³ Siring sinda sa mga kahoy na itinanom sa harong nin Kagurangnan, nagtatalubo sinda sa mga patyo nin satong Dios,

¹⁴ danay na mabunga, maski gurang na; danay na makosog, danay na berde.

¹⁵ Nagpapahiling ini na an Kagurangnan matanos, na mayo nin karatan sa sakong parasurog.