Salmo 91 - Marahay na Bareta Biblia

An Dios na Satong Parasurog

¹ An siisay man na magpaili sa Kagurangnan, asin magdanay sa pag-ingat kan Makakamhan,

² makakasabi sa Kagurangnan, “Ika an sakong pailihan, sakong bantayan; sakuyang Dios, na sakong sinasarigan.”

³ Ililigtas ka niya sa siod nin paralitag asin sa nakakagadan na peste.

⁴ Tatahoban ka niya kan saiyang mga pakpak; magigin ligtas ka sa saiyang pangataman; iingatan ka asin susurogon kan saiyang kaimbodan.

⁵ Dai ka dapat matakot sa diklom nin banggi, ni sa bosog na minalayog sa aldaw;

⁶ ni sa mga peste na minahampak sa kadikloman, ni sa mga karatan na nakakagadan sa kaodtohan nin aldaw.

⁷ Pwedeng magadan an sangribo sa kataed mo, an sampolong ribo sa palibot mo, alagad dai ka nanggad maaano.

⁸ Mahihiling mo asin mamamasdan kun paano pinapadusahan an tampalasan.

⁹ Huli ta ginibo mong pailihan an Kagurangnan, an Kahorohalangkawe an saimong erokan,

¹⁰ mayong karatan na maabot saimo, mayong kadahasan na madolok sa saimong erokan.

¹¹ Huli ta ibubugtak nin Dios an saiyang mga anghel tanganing atamanon ka saen ka man magduman.

¹² Dadarahon ka ninda sa saindang mga kamot, ta tibaad tumama sa kagapoan an saimong mga bitis.

¹³ An mga leon saka halas saimong tutungtongan; an ogbon nin leon asin an rimoranon saimong titimaktimakan.

¹⁴ “Ililigtas ko siya, huli ta ako saiyang namomotan,” olay nin Kagurangnan. “Aatamanon ko siya, huli ta aram niya an sakong ngaran.

¹⁵ Kun apodon niya ako, sisimbagon ko siya; iibahan ko siya sa kasakitan. Ililigtas ko siya asin oomawon.

¹⁶ Babalosan ko siya nin halawig na buhay, asin ipapahiling ko saiya an sakong kaligtasan.”